મહાકુંભ મેળો ક્યારથી શરૂ થશે? જાણો સ્નાનની તારીખ અને તિથિ

• ઉત્તર પ્રદેશના પ્રયાગરાજમાં 13 જાન્યુઆરી 2025થી મહાકુંભ મેળો શરૂ થશે. આ વર્ષે મહાકુંભના પ્રથમ દિવસે સિદ્ધિ યોગનો શુભ સંયોગ બની રહ્યો છે

HD ન્યુઝ ડેસ્કઃ હિન્દુ ધર્મમાં કુંભ મેળાનું વિશેષ મહત્ત્વ છે. કુંભ મેળો દર ત્રણ વર્ષે યોજાય છે. અર્ધકુંભ મેળાનું આયોજન દર 6 વર્ષે થાય છે. દર 12 વર્ષે મહાકુંભનું આયોજન કરવામાં આવે છે. વર્ષ 2025માં પ્રયાગરાજમાં મહાકુંભનું આયોજન કરવામાં આવશે. આ સિવાય હરિદ્વાર, નાસિક અને ઉજ્જૈનમાં કુંભનું આયોજન કરવામાં આવે છે.

2025માં મહાકુંભ ક્યારે?

ઉત્તર પ્રદેશના પ્રયાગરાજમાં 13 જાન્યુઆરી 2025થી મહાકુંભ મેળો શરૂ થશે. આ વર્ષે મહાકુંભના પ્રથમ દિવસે સિદ્ધિ યોગનો શુભ સંયોગ બની રહ્યો છે. મહાકુંભ એ હિન્દુ ધર્મનો સૌથી મોટો ઉત્સવ અને મેળો છે. જેમાં વિશ્વભરમાંથી લાખો ભક્તો ભાગ લે છે. 13 જાન્યુઆરીથી 26 ફેબ્રુઆરી દરમિયાન મહાકુંભ મેળાનું આયોજન કરવામાં આવશે.

મહાકુંભ 2025 ના શાહી સ્નાનની તારીખો

• 13 જાન્યુઆરી 2025- પોષ પૂર્ણિમા
• 14 જાન્યુઆરી 2025- મકર સંક્રાંતિ
• 29 જાન્યુઆરી 2025 – મૌની અમાવસ્યા
• 3 ફેબ્રુઆરી 2025 – વસંત પંચમી
• 4 ફેબ્રુઆરી 2025- અચલા નવમી
• 12 ફેબ્રુઆરી 2025- મહા પૂર્ણિમા
• 26 ફેબ્રુઆરી 2025- મહાશિવરાત્રી

મહાકુંભ મેળાની ઉત્પત્તિને લગતી વાર્તા

મહા કુંભ મેળાની ઉત્પત્તિની વાર્તા દેવતાઓ અને દાનવો વચ્ચેના સમુદ્ર મંથનની ઘટના સાથે જોડાયેલી છે. દંતકથા અનુસાર સમુદ્ર મંથન દરમિયાન, અમૃતના કળશ માટે દેવતાઓ અને દાનવો વચ્ચે 12 દિવસ સુધી ભયંકર યુદ્ધ થયું. અમૃત મેળવવાની લડાઈમાં કળશમાંથી અમૃતની કેટલીક બુંદો ધરતીની ચાર જગ્યાઓ પર પડી, જેમાં પ્રયાગરાજ, ઉજ્જૈન, હરિદ્વાર અને નાસિકનો સમાવેશ થાય છે. તેથી આ સ્થાનોને પવિત્ર માનવામાં આવે છે અને કુંભ મેળાનું આયોજન આ સ્થળો પર જ થાય છે.

દેવગુરુ ગુરુની ગતિનું મહત્ત્વ

જ્યારે ગુરુ વૃષભ રાશિમાં અને સૂર્ય મકર રાશિમાં હોય ત્યારે પ્રયાગરાજમાં કુંભ મેળાનું આયોજન કરવામાં આવે છે. જ્યારે ગુરુ અને સૂર્ય સિંહ રાશિમાં હોય ત્યારે નાસિકમાં કુંભ મેળો યોજાય છે. જ્યારે ગુરુ સિંહ રાશિમાં અને સૂર્ય મેષ રાશિમાં હોય ત્યારે ઉજ્જૈનમાં કુંભ મેળાનું આયોજન કરવામાં આવે છે. જ્યારે સૂર્ય મેષ રાશિમાં અને ગુરુ કુંભ રાશિમાં હોય ત્યારે હરિદ્વારમાં કુંભ મેળો યોજાય છે.

આ પણ વાંચોઃ સંકટ ટાળવા માટે દેવઉઠી એકાદશી પર કરો આ ઉપાય