આ ઉંમરે માતા-પિતાએ બાળકો સાથે સૂવાનું કરી દેવું જોઈએ બંધ, જાણો કારણ

અમેરિકન એક્ટ્રેસ એલિસિયા સિલ્વરસ્ટોન તેની પેરેન્ટિંગ સ્ટાઇલના કારણે ઘણીવાર ચર્ચામાં રહે છે. તાજેતરમાં, એલિસિયાએ ખુલાસો કર્યો છે કે તે તેના 11 વર્ષના પુત્ર બીયર સાથે સૂવે છે. એલિસિયાએ કહ્યું, ‘બિયર અને હું હજુ પણ સાથે સૂઈએ છીએ.’ એલિસિયાના કહેવા પ્રમાણે, તે માત્ર નેચરને ફોલો કરી રહી છે. એલિસિયાના આ નિવેદન પર તેને સોશિયલ મીડિયા પર ઘણી ટ્રોલ કરવામાં આવી રહી છે.આવી સ્થિતિમાં સવાલ એ થાય છે કે શું બાળકો સાથે એક જ પલંગ પર સૂવું યોગ્ય છે? અથવા માતાપિતાએ તેમના બાળકો સાથે કઈ ઉંમર સુધી સૂવું જોઈએ? તો ચાલો જાણીએ કે બાળ ચિકિત્સકો અને મનોવૈજ્ઞાનિકોનું આ બાબતે શું કહેવું છે.

ન્યૂયોર્ક સ્થિત બાળરોગ નિષ્ણાત ડૉ. રેબેકા ફિસ્કે કહ્યું, ‘હું હંમેશા માતાપિતાને કહું છું કે તેમના બાળકો સાથે એક જ પથારીમાં સૂવું એ તેમનો પોતાનો વ્યક્તિગત નિર્ણય છે. આ તબીબી નિર્ણય નથી. ફિસ્કે કહ્યું કે માતા-પિતાએ 12 મહિનાથી ઓછી ઉંમરના બાળકો સાથે ક્યારેય પથારી શેર કરવી જોઈએ નહીં કારણ કે તે SIDS (સડન ઇન્ફન્ટ ડેથ સિન્ડ્રોમ) અને ગૂંગળામણને કારણે મૃત્યુનું જોખમ વધારે છે.

ફિસ્ક વધુમાં કહે છે કે દરેક વ્યક્તિની ઊંઘ સંબંધિત અલગ-અલગ જરૂરિયાતોને કારણે, એકસાથે સૂવાથી ક્યારેક તમને અને બાળકને યોગ્ય રીતે ઊંઘવામાં સમસ્યા થઈ શકે છે. જો તમે તમારા બાળક સાથે સૂતા હોવ, તો ખાતરી કરો કે તેને આખો દિવસ આરામ મળ્યો છે. જો આવું ન થઈ રહ્યું હોય તો સાથે સૂવા સિવાય તમારી પાસે બીજા ઘણા વિકલ્પો છે. જેમ કે તમે રૂમમાં એક વધારાનો બેડ રાખી શકો છો. બાળકના સૂઈ ગયા પછી તમે તેમાં સૂઈ શકો છો જેથી તમારું બાળક પલંગ પર મુક્તપણે સૂઈ શકે અને તેને ઊંઘ દરમિયાન કોઈ સમસ્યાનો સામનો ન કરવો પડે. જો તમે ઈચ્છો તો બાળકને સૂઈ ગયા પછી તમે બીજા રૂમમાં પણ સૂઈ શકો છો. બાળ મનોવૈજ્ઞાનિક એલિઝાબેથ મેથિસે જણાવ્યું હતું કે બાળકો સાથે બેડ શેર કરવું ક્યારેક ખૂબ સારું સાબિત થાય છે. ખાસ કરીને જ્યારે બંને માતાપિતા અલગ રહે છે. મેથીસ કહે છે કે જે લોકોની સાથે તમે સુરક્ષિત અનુભવો છો તેની આસપાસ રહેવાથી તમને સારું લાગે છે.

આ તબક્કે બાળકો સાથે સૂવાનું બંધ કરવું જોઈએ

તે જાણવું ખૂબ જ મહત્વપૂર્ણ છે કે તમારે કયા તબક્કે તમારા બાળક સાથે સૂવાનું બંધ કરવું જોઈએ. જ્યારે તમે તમારા બાળકમાં શારીરિક ફેરફારો જોવાનું શરૂ કરો છો. ત્યારે તમારે તેમની સાથે સૂવાનું બંધ કરવું જોઈએ. આને પ્રી-પ્યુબર્ટી કહેવાય છે. તરુણાવસ્થા અથવા પૂર્વ-તરુણાવસ્થા એ સમય છે જ્યારે તમારા બાળકનું શરીર જાતીય રીતે પરિપક્વ થવાનું શરૂ કરે છે. આ દરમિયાન છોકરીઓમાં સ્તનનો વિકાસ અને પુરુષોમાં દાઢી અને મૂછનો વધારો, પ્રાઈવેટ પાર્ટની સાઈઝમાં વધારો જેવા શારીરિક ફેરફારો થાય છે. ત્યારે તમારે તમારા બાળકો સાથે સૂવાનું બંધ કરી દેવું જોઈએ.’

મેથિસે પણ ફિસ્કની વાતને સમર્થન આપતાં કહ્યું કે તરુણાવસ્થા એ સમય છે જ્યારે તમારે અલગ-અલગ પથારીમાં સૂવાનું શરૂ કરવું જોઈએ. તરુણાવસ્થાના તબક્કાની શરૂઆતની સરેરાશ ઉંમર છોકરીઓ માટે 11 વર્ષ અને છોકરાઓ માટે 12 વર્ષ છે. જો કે છોકરીઓ માટે 8 થી 13 વર્ષની વય વચ્ચે તરુણાવસ્થા શરૂ થવી એ પણ સામાન્ય છે. તો છોકરાઓમાં તરુણાવસ્થા 9 વર્ષથી 14 વર્ષની વય વચ્ચે શરૂ થઈ શકે છે.મેથિસે કહ્યું, તરુણાવસ્થા દરમિયાન બાળકોના શરીરમાં ઘણા ફેરફારો થતા હોય છે. તેથી તમારે બાળકોને જગ્યા આપવી જરૂરી છે. આ તેને આરામદાયક બનાવશે. જો તમે તમારા બાળકોને એક જ પલંગ પર સુવડાવો છો તો તેની અસર તમારી પ્રાઈવસી પર પણ પડે છે. જો કે તમારે એ સુનિશ્ચિત કરવું જોઈએ કે જો તમારું બાળક બીજા રૂમમાં અથવા અલગ પલંગ પર સૂઈ જાય તો તે સુરક્ષિત અને આરામદાયક અનુભવે છે.