PM મોદી અને પ્રમુખ ડોનાલ્ડ ટ્રમ્પ વચ્ચે શું વાતચીત થઈ? વ્હાઈટ હાઉસે જાહેર કરી માહિતી

નવી દિલ્હી, 28 જાન્યુઆરી : ભારતના વડા પ્રધાન નરેન્દ્ર મોદી અને અમેરિકી પ્રમુખ ડોનાલ્ડ ટ્રમ્પે સોમવારે રાત્રે ફોન પર વાતચીત કરી હતી. પીએમ મોદીએ ગઈકાલે રાત્રે આ વાતચીતની માહિતી આપી હતી. હવે અમેરિકન વ્હાઇટ હાઉસે પણ ટ્રમ્પ અને પીએમ મોદી વચ્ચે થયેલી વાતચીતની માહિતી શેર કરી છે. મળતી માહિતી મુજબ, બંને નેતાઓએ ભારત અને અમેરિકા વચ્ચે પરસ્પર સહયોગ વધારવા અને ગાઢ બનાવવા પર ચર્ચા કરી છે.

અમેરિકન ઉત્પાદનોની ખરીદી પર ભાર

વ્હાઇટ હાઉસ દ્વારા જારી પ્રેસ નોટમાં કહેવામાં આવ્યું છે કે અમેરિકી પ્રમુખ ડોનાલ્ડ ટ્રમ્પે પીએમ મોદી સાથે અર્થપૂર્ણ વાતચીત કરી છે. બંને નેતાઓએ ઈન્ડો-પેસિફિક, મધ્ય પૂર્વ અને યુરોપમાં સુરક્ષા સહિત અનેક ક્ષેત્રીય મુદ્દાઓ પર પણ ચર્ચા કરી હતી. આ સિવાય ડોનાલ્ડ ટ્રમ્પે ભારત દ્વારા અમેરિકન સુરક્ષા સાધનોની ખરીદી વધારવા અને વાજબી દ્વિપક્ષીય વેપાર સંબંધો તરફ આગળ વધવાના મહત્વ પર ભાર મૂક્યો છે.

પીએમ મોદીની વ્હાઇટ હાઉસ મુલાકાત અંગે ચર્ચા

અમેરિકી પ્રમુખ ડોનાલ્ડ ટ્રમ્પે ભારતીય પીએમ નરેન્દ્ર મોદી સાથે બંને દેશો વચ્ચેની મિત્રતા અને વ્યૂહાત્મક સંબંધોની મજબૂતી પર ભાર મૂક્યો છે. આ સિવાય પીએમ મોદીની વ્હાઇટ હાઉસ મુલાકાતની યોજના પર પણ ચર્ચા કરવામાં આવી છે. આ સાથે બંને નેતાઓએ અમેરિકા અને ભારત વચ્ચેની વ્યૂહાત્મક ભાગીદારી અને ક્વાડ પાર્ટનરશિપને આગળ વધારવા માટે પ્રતિબદ્ધતા વ્યક્ત કરી છે.  તમને જણાવી દઈએ કે ભારત આ વર્ષના અંતમાં ક્વોડ લીડર્સની બેઠકનું આયોજન કરશે.

આ પણ વાંચો :- હરિયાણા સરકારની અરવિંદ કેજરીવાલને કોર્ટમાં ઢસડી જવાની ચીમકી, ચૂંટણીપંચ પણ જશે