વાસ્તુ શાસ્ત્રમાં દિશાઓનું શું મહત્ત્વ છે? કઈ દિશા ઘરમાં ખુશીઓ લાવશે?

• વાસ્તુ શાસ્ત્રમાં દિશાઓનું ખૂબ જ મહત્ત્વ છે. વિવિધ દિશાઓ જુદા જુદા ગ્રહો સાથે સંબંધિત છે. માનવ જીવનમાં સુખ-શાંતિ માટે દિશાઓ યોગ્ય રાખવી જરૂરી માનવામાં આવે છે

HD ન્યુઝ ડેસ્કઃ વાસ્તુ શાસ્ત્રમાં દિશાઓનું ખૂબ જ મહત્ત્વ છે. વાસ્તુ અનુસાર 8 દિશાઓ છે એટલે કે 4 મુખ્ય દિશાઓ (પૂર્વ, પશ્ચિમ, ઉત્તર અને દક્ષિણ) સાથે ચાર કોણીય દિશાઓ ઈશાન કોણ (ઉત્તર-પૂર્વ), અગ્નિ કોણ (દક્ષિણ-પૂર્વ), નૈઋત્ય કોણ (દક્ષિણ-પશ્ચિમ), વાયવ્ય કોણ (ઉત્તર-પશ્ચિમ)ના આધારે વાસ્તુની ગણતરી કરવામાં આવે છે. વાસ્તુમાં દરેક દિશાનું વિશેષ મહત્ત્વ છે. વિવિધ દિશાઓ જુદા જુદા ગ્રહો સાથે સંબંધિત છે. માનવ જીવનમાં સુખ-શાંતિ માટે દિશાઓ યોગ્ય રાખવી જરૂરી માનવામાં આવે છે. ચાલો જાણીએ વાસ્તુમાં દરેક દિશાનું શું મહત્ત્વ છે?

પૂર્વ દિશા

પૂર્વ દિશાના સ્વામી ગ્રહ ભગવાન સૂર્ય અને દેવરાજ ઈન્દ્ર માનવામાં આવે છે. આ દિશાને સારા સ્વાસ્થ્ય, બુદ્ધિ, ધન, સુખ અને સૌભાગ્યનું પ્રતિક માનવામાં આવે છે. એવું માનવામાં આવે છે કે ઘર બનાવતી વખતે ઘરની પૂર્વ દિશામાં થોડી જગ્યા ખુલ્લી રાખવી જોઈએ. આ સ્થાન નીચું રાખવું જોઈએ. એવું માનવામાં આવે છે કે જો આવું ન થાય તો ઘરના મુખ્ય સભ્યની હેલ્થને અસર થઈ શકે છે.

પશ્ચિમ દિશા

પશ્ચિમ દિશાના સ્વામી ગ્રહ શનિ અને વરુણદેવ છે. આ દિશા માન-સન્માન, સફળતા, સારા ભવિષ્ય અને સન્માનનું પ્રતીક માનવામાં આવે છે. એવું માનવામાં આવે છે કે જો આ દિશામાં ખાડો, તિરાડ, નીચું સ્તર અથવા ખામી હોય તો માનસિક મૂંઝવણની સ્થિતિ ઊભી થાય છે અને કામકાજમાં અડચણો આવી શકે છે.

ઉત્તર દિશા

ઉત્તર દિશાના શાસક ગ્રહો બુધ અને ભગવાન કુબેર છે. આ દિશા જીવનમાં દરેક પ્રકારનું સુખ પ્રદાન કરે છે. આ દિશા બુદ્ધિ, જ્ઞાન, ચિંતન, ધ્યાન અને ધન માટે શુભ માનવામાં આવે છે. ઉત્તર દિશામાં ખાલી જગ્યા છોડીને ઘર બાંધવાથી દરેક પ્રકારના ભૌતિક સુખ અને સમૃદ્ધિની પ્રાપ્તિ થાય છે

દક્ષિણ દિશા

દક્ષિણ દિશાના શાસક ગ્રહો મંગળ અને યમ છે. આ દિશાને સફળતા, કીર્તિ, પ્રતિષ્ઠા અને ધૈર્યનું પ્રતિક માનવામાં આવે છે. આ દિશા પિતાની પ્રસન્નતાની કારક પણ માનવામાં આવે છે. દક્ષિણ દિશાને જેટલી ભારે રાખશો તેટલું જ તે ફાયદાકારક સાબિત થઈ શકે છે.

અગ્નિ કોણ

વાસ્તુમાં અગ્નિ કોણનો શાસક ગ્રહ શુક્ર અને અગ્નિ દેવ માનવામાં આવે છે. આ દિશા સ્વાસ્થ્ય સાથે સંબંધિત છે. આ દિશા ઊંઘ અને યોગ્ય શયન સુખ દર્શાવે છે. અગ્નિ અંડરગ્રાઉન્ડ ટેન્ક રાખવી સારી બાબત માનવામાં આવતી નથી. તેનાથી હેલ્થ ખરાબ થાય છે.

નૈઋત્ય કોણ

આ દિશાનો સ્વામી રાહુ અને નૈઋતિ નામનો રાક્ષસ છે. આ દિશા રાક્ષસ, ખરાબ કાર્યો કરનાર વ્યક્તિ કે ભૂતપ્રેતની દિશા છે. તેથી, વાસ્તુમાં, આ દિશાને ક્યારેય ખાલી ન રાખવાની સલાહ આપવામાં આવે છે.

વાયવ્ય કોણ

આ દિશાને ચંદ્ર દેવ અને પવન દેવતાનો વાસ માનવામાં આવે છે. તે મિત્રતા અને દુશ્મનીનો સંકેત આપે છે. આ દિશાને માનસિક વિકાસની દિશા માનવામાં આવે છે. આ દિશામાં કોઈપણ ખામી શત્રુઓની સંખ્યામાં વધારો થવાનો સંકેત માનવામાં આવે છે.

ઈશાન કોણ

ઈશાન કોણનો સ્વામી ગ્રહ ગુરુ માનવામાં આવે છે. આ દિશાને બુદ્ધિ, જ્ઞાન, સમજદારી, ધૈર્ય અને હિંમતનું પ્રતીક માનવામાં આવે છે. વાસ્તુ અનુસાર ઉત્તર-પૂર્વ ખૂણાની સ્વચ્છતાનું વિશેષ ધ્યાન રાખવું જોઈએ. આ દિશા ખુલ્લી રાખવી જોઈએ અને બાંધકામનું કામ ઓછામાં ઓછું કરવું જોઈએ. જો આ દિશા દોષમુક્ત હોય તો આધ્યાત્મિક, માનસિક અને આર્થિક સમૃદ્ધિ આવે છે. વાસ્તુ અનુસાર આ દિશામાં શૌચાલય, સેપ્ટિક ટેન્ક કે ડસ્ટબિન ન મૂકવી જોઈએ.

આ પણ વાંચોઃ આ સરળ વાસ્તુ ઉપાયોથી ઘરમાં વધશે પોઝિટિવીટી, ખુલશે પ્રગતિના માર્ગ