ભગવાન શિવની અભયમુદ્રા શું છે, જેનો રાહુલ ગાંધીએ સંસદમાં ઉલ્લેખ કર્યો હતો

નવી દિલ્હી, 01 જુલાઇ :રાષ્ટ્રપતિના અભિભાષણ પર લોકસભામાં આભાર પ્રસ્તાવ પર ચર્ચા દરમિયાન, વિપક્ષના નેતા રાહુલ ગાંધીએ વડા પ્રધાન નરેન્દ્ર મોદી અને સત્તાધારી ભારતીય જનતા પાર્ટી પર આકરા પ્રહારો કર્યા, અને ભાજપને ડરાવી અને હિંસક પાર્ટી ગણાવી. લોકસભામાં વિપક્ષના નેતા તરીકે પોતાના પ્રથમ ભાષણમાં રાહુલે પહેલા ભગવાન શિવનો ફોટો બતાવ્યો અને પછી તેમની અભય મુદ્રાનો ઉલ્લેખ કરીને ભાજપ પર નિશાન સાધ્યું. રાહુલે કહ્યું કે હિંદુ ધર્મ સહિત અન્ય ધર્મોમાં અભયમુદ્રાનું ખૂબ મહત્ત્વ છે, જે ભયથી મુક્તિ અને સુરક્ષાની લાગણી દર્શાવે છે. તેમણે કહ્યું કે કોંગ્રેસ પાર્ટીનું ચૂંટણી ચિન્હ પણ આ અભયમુદ્રા જેવું છે.

રાહુલે વધુમાં કહ્યું કે અભયમુદ્રાનો અર્થ છે, “ડરો નહીં, ડરાવો નહીં.” તેમણે કહ્યું કે ભગવાન શિવ, ગુરુ નાનક, જીસસ ક્રાઇસ્ટ, ભગવાન બુદ્ધ અને ભગવાન મહાવીરે પણ સમગ્ર વિશ્વને અભયમુદ્રાની નિશાની આપી છે અને સ્પષ્ટ સંદેશ આપ્યો છે કે ડરવાની અને ડરાવવાની મનાઈ છે. રાહુલે કહ્યું કે કુરાનમાં પણ લખ્યું છે કે ધાકધમકી પર પ્રતિબંધ છે પરંતુ શાસક પક્ષના લોકો ધાકધમકી અને હિંસા ફેલાવે છે.

રાહુલે કહ્યું, “જે લોકો પોતાને હિંદુ કહે છે, 24 કલાક હિંસા-હિંસા, અસત્ય-અસત્ય બોલે છે. તે લોકો હિંદુ ન હોઈ શકે.” શાસક પક્ષ તરફ ઈશારો કરતાં તેમણે કહ્યું કે, “તમે બિલકુલ હિંદુ નથી કારણ કે હિંદુ ધર્મમાં સ્પષ્ટ લખેલું છે કે સત્યની સાથે ઊભા રહેવું જોઈએ અને સત્યથી ડરવું નહીં. અહિંસા આપણો ધર્મ છે. આ દેશ અહિંસાનો દેશ છે.” દરમિયાન, જ્યારે શાસક પક્ષના કેટલાક સભ્યોએ ગૃહમાં વાંધો ઉઠાવ્યો, ત્યારે રાહુલે કહ્યું, “તેઓ બૂમો પાડી રહ્યા છે કારણ કે તિર સીધું તેમના દિલમાં વાગ્યું છે.” રાહુલે કહ્યું કે, અમે અહિંસાથી ભાજપ સામે લડ્યા છે.

ત્યારબાદ ગૃહમાં હોબાળો શરૂ થયો હતો. આ દરમિયાન વડાપ્રધાન નરેન્દ્ર મોદીએ કહ્યું કે આ મુદ્દો ખૂબ જ ગંભીર છે. સમગ્ર હિન્દુ સમાજને હિંસક કહ્યો છે જે ખોટું છે. તેના પર રાહુલે સ્પષ્ટ શબ્દોમાં કહ્યું કે, હિંદુનો અર્થ ભાજપ, આરએસએસ અને પીએમ મોદી નથી. કેન્દ્રીય ગૃહમંત્રી અમિત શાહે પણ રાહુલ ગાંધીના નિવેદનની આકરી ટીકા કરી હતી અને કહ્યું હતું કે સમગ્ર હિન્દુ સમાજને હિંસક કહેવું ખોટું છે. શાહે રાહુલ ગાંધીને તેમના નિવેદન માટે ગૃહમાં માફી માંગવાની માંગ કરી હતી.

આ પણ વાંચોઃસાયક્લોનિક સર્ક્યુલેશન સિસ્ટમ સક્રિય થતા ગુજરાતના આ વિસ્તારોમાં પડશે ભારેથી અતિભારે વરસાદ