અમે 25 કરોડ લોકોને ગરીબીમાંથી મુક્ત કર્યા : PM મોદી

• કૂચ બિહારમાં વડાપ્રધાનની જંગી જાહેરસભા

કૂચ બિહાર, 4 એપ્રિલ : દેશભરમાં લોકસભાની ચૂંટણીને લઈને ઉત્તેજના વધી ગઈ છે. તમામ પક્ષો પોતાના સ્ટાર પ્રચારકોના આધારે લોકોનું ધ્યાન આકર્ષિત કરવા માંગે છે. આ દરમિયાન વડાપ્રધાન નરેન્દ્ર મોદી પણ રેલીઓ કરી રહ્યા છે. તેમણે કૂચ બિહારમાં એક વિશાળ જનસભાને સંબોધિત કરી હતી. આ દરમિયાન તેમણે કોંગ્રેસ પર નિશાન સાધતા કહ્યું કે કોંગ્રેસ દાયકાઓ સુધી ગરીબ હટાવોનો નારો આપતી રહી. ભાજપ સરકારે છેલ્લા 10 વર્ષમાં 25 કરોડ લોકોને ગરીબીમાંથી મુક્ત કર્યા છે. આવું એટલા માટે થયું કારણ કે અમે ઈમાનદારીથી કામ કરી રહ્યા છીએ અને અમારા ઈરાદા સાચા છે.

વડાપ્રધાન નરેન્દ્ર મોદીએ જનમેદનીને સંબોધતા કહ્યું કે આઝાદી બાદ 6-7 દાયકા સુધી કેન્દ્ર સરકારમાં આપણા દેશની જનતાએ માત્ર કોંગ્રેસ મોડલ જ જોયું. હવે છેલ્લા 10 વર્ષમાં પહેલીવાર દેશે પૂર્ણ બહુમતીવાળી ભાજપ સરકારનું વિકાસ મોડલ જોયું છે. તેમણે કહ્યું કે આજે દુનિયા કહે છે કે મોદી એક એવા નેતા છે જે મજબૂત, કઠિન અને મોટા નિર્ણયો લે છે.

વિપક્ષ જુઠ્ઠાણા અને અફવાઓની રાજનીતિમાં વ્યસ્ત

વિપક્ષ પર નિશાન સાધતા પીએમ મોદીએ કહ્યું કે ટીએમસી, લેફ્ટ અને કોંગ્રેસનુ ગઠબંધન માત્ર જુઠ્ઠાણા અને અફવાઓની રાજનીતિમાં વ્યસ્ત છે. તેઓએ ક્યારેય મટુઆ, રાજબંશી અને નમશુદ્ર સાથીઓની પરવા કરી નથી, પરંતુ આજે જ્યારે ભાજપ સરકાર CAA લાવી છે, ત્યારે તેઓ અફવાઓ ફેલાવી રહ્યા છે.

સંદેશખલી મુદ્દે પીએમ મોદીએ વાત કરી

વડાપ્રધાને સંદેશખલી મુદ્દે પશ્ચિમ બંગાળ સરકારને પણ આડે હાથ લીધી હતી. તેમણે કહ્યું કે માત્ર બંગાળ જ નહીં પરંતુ સમગ્ર દેશે જોયું છે કે કેવી રીતે TMC સરકારે સંદેશખલીના ગુનેગારોને બચાવવા માટે પોતાની તમામ તાકાત લગાવી દીધી. વડાપ્રધાને વધુમાં કહ્યું કે સંદેશખાલીની મહિલાઓ સાથે જે થયું તે પશ્ચિમ બંગાળ સરકારના અત્યાચારની ચરમસીમા છે.

સંદેશખલીના ગુનેગારોને સજા કરવાનું ચાલુ રાખીશું

આ દરમિયાન વડાપ્રધાન મોદીએ સંદેશખાલી ઘટનાને લઈને પશ્ચિમ બંગાળની તૃણમૂલ કોંગ્રેસ સરકાર પર પ્રહારો કર્યા હતા. તેમણે ચેતવણી આપી હતી કે સંદેશખલીની ઘટના માટે માત્ર તૃણમૂલ જ જવાબદાર છે અને તેમણે પરિણામ ભોગવવા પડશે.

મોદીએ CAA વિશે વાત કરી

આ દરમિયાન વડાપ્રધાન મોદીએ બંગાળના લોકોને CAA અંગે આશ્વાસન આપ્યું અને કહ્યું કે ભાજપ સરકાર CAA લાવી છે. આવી સ્થિતિમાં દરેક પરિવારને નાગરિકતા મોદીની ગેરંટી છે. તેમણે લોકોને ચેતવણી આપી કે તૃણમૂલ કોંગ્રેસ અને ડાબેરીઓ CAAને લઈને લોકોને ડરાવી શકે છે. મોદીએ કહ્યું કે તમે મારું દસ વર્ષનું કામ જોયું છે. મોદીની ગેરંટી પર વિશ્વાસ કરો.