કિર્ગિસ્તાનમાં ભારતીય વિદ્યાર્થીઓ પર હિંસક હુમલા, ભારત સરકાર પાસેથી મદદની અપીલ

• કિર્ગિસ્તાનમાં અભ્યાસ કરતા ભારતીય વિદ્યાર્થીઓ પર હિંસક હુમલા
• પાકિસ્તાની વિદ્યાર્થીઓની સાથે ભારતીય યુવાનોને પણ નિશાન બનાવવામાં આવ્યા
• વિદેશ મંત્રાલયે એડવાઈઝરી જારી કરી

નવી દિલ્હી, 19 મે: કિર્ગિસ્તાનમાં અભ્યાસ કરતા ભારતીય વિદ્યાર્થીઓને હિંસક હુમલાઓનો સામનો કરવો પડ્યો છે. કિર્ગિસ્તાનના સ્થાનિક યુવાનો ભારતીય વિદ્યાર્થીઓને નિશાન બનાવીને હુમલા કરી રહ્યા છે. આ હુમલાઓ ખુલ્લેઆમ થઈ રહ્યા છે. વિદ્યાર્થીઓ પર હુમલાની ઘટના પર કિર્ગિસ્તાનના સ્થાનિક વહીવટીતંત્ર અને પોલીસની નજર છે. વિદ્યાર્થીઓની સુરક્ષા માટે ન તો પગલાં લેવાઈ રહ્યા છે કે ન તો કોઈ નક્કર કાર્યવાહી થઈ રહી છે. આવી સ્થિતિમાં નિરાશ ભારતીય વિદ્યાર્થીઓ સ્થાનિક દૂતાવાસને અપીલ કરી રહ્યા છે. પરંતુ દૂતાવાસ તરફથી પણ પૂરતી મદદ મળી શકી નથી. નિરાશ થયેલા વિદ્યાર્થીઓના વાલીઓએ હવે ભારત સરકાર પાસે મદદ માંગી છે.

ભારતીય વિદ્યાર્થીઓ પર ખુલ્લેઆમ હુમલા

ગુજરાત સહિત અન્ય રાજ્યોના ઘણા વિદ્યાર્થીઓ કિર્ગિસ્તાનમાં રહે છે અને અભ્યાસ કરે છે. બે દિવસ પહેલા પાકિસ્તાની વિદ્યાર્થીઓએ સ્થાનિક યુવકની હત્યા કરી હતી. જેનાથી રોષે ભરાયેલા સ્થાનિક યુવાનોએ બલદેશ હોસ્ટેલમાં ઘૂસી હુમલો કર્યો હતો. પાકિસ્તાની વિદ્યાર્થીઓની સાથે ભારતીય યુવાનોને પણ નિશાન બનાવવામાં આવ્યા હતા. હવે ત્યાં ભારતીય વિદ્યાર્થીઓ પર પણ ખુલ્લેઆમ હુમલા થઈ રહ્યા છે. આ હુમલાઓને રોકવા માટે સ્થાનિક વહીવટીતંત્ર અને પોલીસ દ્વારા કોઈ પગલાં લેવામાં આવી રહ્યાં નથી. સ્થાનિક વહીવટીતંત્ર અને પોલીસ મૂક પ્રેક્ષક બની જોઈ રહ્યા છે. પોલીસની સામે ભારતીય વિદ્યાર્થીઓ પર હુમલા થઈ રહ્યા છે.

વિદેશ મંત્રાલયે એડવાઈઝરી જારી કરી છે

કિર્ગિસ્તાનમાં સ્થાનિક લોકોએ ત્રણ પાકિસ્તાની વિદ્યાર્થીઓને ઢોર માર માર્યો છે. દરમિયાન, ભારત સરકારે કિર્ગિસ્તાનમાં અભ્યાસ કરતા ભારતીય વિદ્યાર્થીઓને ઘરની અંદર રહેવાની અપીલ કરી છે. આ અંગે એડવાઈઝરી પણ જારી કરવામાં આવી છે. દરમિયાન વિદેશ મંત્રી એસ જયશંકરે ભારતીય વિદ્યાર્થીઓને દૂતાવાસ સાથે નિયમિત સંપર્કમાં રહેવાની સલાહ આપી છે. કિર્ગિસ્તાનમાં બગડતી પરિસ્થિતિને ધ્યાનમાં રાખીને ભારતીય કોન્સ્યુલેટે વિદ્યાર્થીઓને એમ્બેસી સાથે સંપર્કમાં રહેવા અને ઘરની બહાર ન આવવા જણાવ્યું છે. તેમજ સંપર્ક નંબર 0555710041 જારી કરવામાં આવ્યો છે. આ નંબર પર 24×7 સંપર્ક કરી શકાય છે.

હિંસા પાછળનું નક્કર કારણ હજુ સુધી બહાર આવ્યું નથી

કિર્ગિસ્તાનમાં પાકિસ્તાની વિદ્યાર્થીઓ સામેની હિંસા માટે કોઈ નક્કર કારણ બહાર આવ્યું નથી. મીડિયા રિપોર્ટ્સ અનુસાર, વિદ્યાર્થીઓની કેટલાક સ્થાનિક લોકો સાથે ઝઘડો થયો હતો, ત્યારબાદ હિંસા ફાટી નીકળી હતી. કિર્ગિસ્તાનની રાજધાનીમાં ગુસ્સે ભરાયેલા ટોળાને એકઠા થતા રોકવા માટે પોલીસ તૈનાત કરવામાં આવી છે. પરંતુ ભારતીય વિદ્યાર્થીઓનું કહેવું છે કે હજુ સુધી તેમને સ્થાનિક પ્રશાસન તરફથી કોઈ ખાસ મદદ મળી નથી.

આ પણ વાંચો: બંગાળમાં રાજભવન ખાતે છેડતી વિવાદ: 3 અધિકારીઓ સામે FIR નોંધાઈ