બંગાળના મુર્શિદાબાદમાં બે સમૂહો વચ્ચે ભડકી હિંસા, કેટલાક વિસ્તારોમાં 163 લાગુ
પશ્ચિમ બંગાળ, 18 નવેમ્બર 2024 : પશ્ચિમ બંગાળનો મુર્શિદાબાદ જિલ્લો ફરી એકવાર સાંપ્રદાયિક હિંસાને લઈને સમાચારોમાં છે. મુર્શિદાબાદના બેલડાંગા વિસ્તારમાં લોકોના બે જૂથો વચ્ચે અથડામણ થઈ હતી, જેના પગલે અધિકારીઓએ આ વિસ્તારમાં પ્રતિબંધિત આદેશો લગાવવા પડ્યા હતા. મળતી માહિતી મુજબ, આ અથડામણ ડિજિટલ ડિસ્પ્લે બોર્ડ પર કથિત વાંધાજનક મેસેજને લઈને થઈ હતી. આ અથડામણમાં પોલીસે 15 લોકોની ધરપકડ કરી છે. ચાલો જાણીએ આ સમગ્ર મામલા વિશે.
કેવી રીતે શરૂ થઈ અથડામણ?
એક પોલીસ અધિકારીએ માહિતી આપી છે કે બેલડાંગામાં થયેલી અથડામણમાં કેટલાક લોકોને સામાન્ય ઈજા થઈ છે. અસરગ્રસ્ત વિસ્તારમાં ઈન્ટરનેટ સેવાઓ પણ બંધ કરી દેવામાં આવી છે. કાર્તિક પૂજા પંડાલ પાસેના ગેટ પર લગાવેલા ડિસ્પ્લે બોર્ડ પર લખેલા મેસેજ વિશે એક જૂથના લોકોને જાણ થતાં બંને જૂથો વચ્ચે અથડામણ શરૂ થઈ હતી. પોલીસે કહ્યું છે કે અથડામણમાં કથિત રીતે સામેલ 15 લોકોની ધરપકડ કરવામાં આવી છે.
દેશી બોમ્બનો પણ ઉપયોગ
વિવાદ બાદ એક જૂથ એકત્ર થઈ ગયું અને અથડામણ શરૂ થઈ. આ દરમિયાન બંને તરફથી એકબીજા પર પથ્થરમારો કરવામાં આવ્યો હતો. મળતી માહિતી મુજબ, ઘણી દુકાનો અને ઘરોમાં તોડફોડ કરવામાં આવી હતી અને દેશી બનાવટના બોમ્બનો પણ ઉપયોગ કરવામાં આવ્યો હતો. અથડામણમાં પોલીસના વાહન પર પણ હુમલો કરવામાં આવ્યો હતો, જેના પગલે પોલીસે ભીડ પર લાઠીચાર્જ કર્યો હતો. સવાર સુધીમાં પરિસ્થિતિ કાબૂમાં આવી ગઈ હતી પરંતુ વિસ્તારમાં તણાવ યથાવત છે.
ઈન્ટરનેટ સેવાઓ સ્થગિત
પોલીસના જણાવ્યા અનુસાર, મુર્શિદાબાદના બેલડાંગા અને નજીકના કાઝીસાહા અને બેગુરબન વિસ્તારોમાં BNSની કલમ 163 હેઠળ પ્રતિબંધિત આદેશો લાદવામાં આવ્યા છે. આ વિસ્તારમાં ઇન્ટરનેટ સેવાઓ સ્થગિત કરી દેવામાં આવી છે. આ અથડામણને કારણે સિયાલદહથી મુર્શિદાબાદ જતી ભાગીરથી એક્સપ્રેસ કેટલાંક કલાકો સુધી ફસાઈ ગઈ હતી. જ્યારે ભાજપે આ ઘટનાને લઈને મમતા બેનર્જીની સરકાર પર નિશાન સાધ્યું છે, ત્યારે તૃણમૂલ કોંગ્રેસના એક નેતાએ કહ્યું કે પરિસ્થિતિ હવે નિયંત્રણમાં છે અને વહીવટીતંત્ર તોફાની તત્વોને ઓળખીને કાર્યવાહી કરી રહ્યું છે.
આ પણ વાંચો : જામનગર-રાજકોટ ધોરી માર્ગ પર ગમખ્વાર અકસ્માત, બાળકી સહિત 3 મૃત્યુ પામ્યા
