સ્પેસમાં આજથી નવો યુગ ! પ્રથમ ખાનગી રોકેટ થશે લોન્ચ
આજે ભારતીય સ્પેસમાં એક નવા યુગની શરૂઆત થવા જઈ રહી છે. ઈન્ડિયન સ્પેસ રિસર્ચ ઓર્ગેનાઈઝેશન એટલે કે ISRO દેશનું પ્રથમ પ્રાઈવેટ રોકેટ ‘Vikram-S’ લોન્ચ કરવા જઈ રહ્યું છે. આ રોકેટ હૈદરાબાદ સ્થિત સ્કાયરૂટ એરોસ્પેસ કંપની દ્વારા બનાવવામાં આવ્યું છે. ‘Vikram-S’નું પ્રક્ષેપણ સવારે 11:30 વાગ્યે શ્રીહરિકોટાના સતીશ ધવન સ્પેસ સેન્ટરથી થશે. આ મિશનને ‘પ્રારંભ’ નામ આપવામાં આવ્યું હતું. આનાથી દેશના અવકાશ ઉદ્યોગમાં ખાનગી ક્ષેત્રના પ્રવેશને પણ નવી ઊંચાઈ મળશે.
There it is!
Catch a glimpse of our Vikram-S at the rocket integration facility at Sriharikota, as it gets ready for the momentous day. Weather seems great for the launch on 18 Nov 11:30 AM.#Prarambh #OpeningSpaceForAll pic.twitter.com/b0nptNlA1N— Skyroot Aerospace (@SkyrootA) November 14, 2022
રોકેટનું નામ ‘Vikram-S’ ભારતના મહાન વૈજ્ઞાનિક અને ઈસરોના સ્થાપક ડૉ.વિક્રમ સારાભાઈના નામ પરથી રાખવામાં આવ્યું છે. ઈન્ડિયન નેશનલ સ્પેસ પ્રમોશન એન્ડ ઓથોરાઈઝેશન સેન્ટરના ચેરમેન પવન ગોએન્કાએ જણાવ્યું હતું કે ભારતમાં ખાનગી ક્ષેત્ર માટે આ એક મોટી છલાંગ છે. તેમણે સ્કાયરૂટને રોકેટ લોન્ચ કરવા માટે અધિકૃત પ્રથમ ભારતીય કંપની બનવા બદલ અભિનંદન પાઠવ્યા છે. કેન્દ્રીય કર્મચારી રાજ્ય મંત્રી જિતેન્દ્ર સિંહે કહ્યું કે ભારત ISROની માર્ગદર્શિકા હેઠળ શ્રીહરિકોટાથી ‘સ્કાયરૂટ એરોસ્પેસ’ દ્વારા વિકસિત પ્રથમ ખાનગી રોકેટ લોન્ચ કરીને ઇતિહાસ રચવા જઈ રહ્યું છે.
ભારત માટે આ ખૂબ જ મહત્વપૂર્ણ ક્ષણ
Vikram-S સબ-ઓર્બિટલમાં ઉડાન ભરશે. આ એક પ્રકારની ટેસ્ટ ફાઇલ હશે, જો ભારતને આ મિશનમાં સફળતા મળશે તો તેનું નામ પ્રાઈવેટ સ્પેસ રોકેટ લોન્ચિંગના મામલે વિશ્વના અગ્રણી દેશોમાં સામેલ થઈ જશે. વિક્રમ-એસ સતીશ ધવન સ્પેસ સેન્ટરથી લોન્ચ થયા બાદ 81 કિમીની ઊંચાઈએ પહોંચશે. આ મિશનમાં બે સ્થાનિક અને એક વિદેશી ગ્રાહકના ત્રણ પેલોડ વહન કરવામાં આવશે. વિક્રમ-એસ સબ-ઓર્બિટલ ફ્લાઇટ ચેન્નાઈના સ્ટાર્ટઅપ સ્પેસ કિડ્ઝ, આંધ્ર પ્રદેશના સ્ટાર્ટઅપ એન-સ્પેસ ટેક અને આર્મેનિયન સ્ટાર્ટઅપ બાઝુમક્યુ સ્પેસ રિસર્ચ લેબના ત્રણ પેલોડ વહન કરશે.
સસ્તામાં રોકેટ લોન્ચ કરાશે
ઓછા બજેટમાં રોકેટ લોન્ચ કરવાની યોજના બનાવવામાં આવી છે. સસ્તા લોન્ચિંગ માટે તેના ઇંધણમાં ફેરફાર કરવામાં આવ્યો છે. આ લોન્ચિંગમાં સામાન્ય ઈંધણને બદલે એલએનજી એટલે કે લિક્વિડ નેચરલ ગેસ અને લિક્વિડ ઓક્સિજન (LoX)નો ઉપયોગ કરવામાં આવશે. આ બળતણ આર્થિક હોવાની સાથે પ્રદૂષણ મુક્ત પણ છે. સ્કાયરૂટ એરોસ્પેસ કંપની રોકેટના સફળ પ્રક્ષેપણને લઈને ઘણી ગંભીર છે. કંપનીએ લોન્ચિંગ પહેલા રોકેટનું ઘણી રીતે પરીક્ષણ કર્યું છે. 25 નવેમ્બર 2021ના રોજ, નાગપુર સ્થિત સોલાર ઇન્ડસ્ટ્રી લિ. તેના પ્રથમ 3D પ્રિન્ટેડ ક્રાયોજેનિક એન્જિનનું તેની પરીક્ષણ સુવિધામાં સફળતાપૂર્વક પરીક્ષણ કરવામાં આવ્યું હતું.
