બોમ્બે હાઈકોર્ટે સોમવારે વિડીયોકોન લોન કેસમાં સેન્ટ્રલ બ્યુરો ઓફ ઈન્વેસ્ટિગેશન (CBI) દ્વારા ધરપકડ કર્યા બાદ ICICI બેંકના ભૂતપૂર્વ મેનેજિંગ ડિરેક્ટર અને ચીફ એક્ઝિક્યુટિવ ઓફિસર (CEO) ચંદા કોચર અને તેમના પતિ દીપક કોચરને ન્યાયિક કસ્ટડીમાંથી મુક્ત કરવાનો આદેશ આપ્યો હતો.
હાઈકોર્ટે આપ્યો હુકમ
જસ્ટિસ રેવતી મોહિતે ડેર અને પીકે ચવ્હાણની ડિવિઝન બેન્ચે જણાવ્યું હતું કે ધરપકડ ફોજદારી કાર્યવાહી સંહિતા (CrPC) ની કલમ 41A નું ઉલ્લંઘન છે જે સંબંધિત પોલીસ અધિકારી સમક્ષ હાજર થવા માટે નોટિસ મોકલવાનું ફરજિયાત છે. “તથ્યો અનુસાર અરજદારોની ધરપકડ કાયદા અને CrPCની કલમ 41A અનુસાર નથી,” કોર્ટે નિર્દેશ આપ્યો. દરેકને રૂ. 1 લાખના કામચલાઉ રોકડ જામીન આપવાને આધીન તેમને મુક્ત કરવામાં આવશે.
જાણો શું હતો આક્ષેપ
ચંદા અને તેના પતિ દીપક કોચરની સીબીઆઈ દ્વારા 24 ડિસેમ્બરે વિડિયોકોન ગ્રુપને 2012માં આપવામાં આવેલી રૂ. 3,250 કરોડની લોનમાં છેતરપિંડી અને અનિયમિતતાના આરોપમાં ધરપકડ કરવામાં આવી હતી. ફરિયાદીએ આક્ષેપ કર્યો હતો કે કોચરના પતિ અને તેના પરિવારના સભ્યોને આ સોદાથી ફાયદો થયો હતો. એવો આક્ષેપ કરવામાં આવ્યો હતો કે જ્યારે કોચર ICICI બેંકનું સુકાન સંભાળતા હતા ત્યારે તેમણે વીડિયોકોન ગ્રુપ ઓફ કંપનીઝ માટે લોન ક્લિયર કરી હતી. ક્વિડ પ્રો ક્વો તરીકે, તેમના પતિની કંપની નુ રિન્યુએબલે કથિત રીતે વિડિયોકોન પાસેથી રોકાણ મેળવ્યું હતું. બાદમાં લોન એનપીએમાં ફેરવાઈ અને તેને બેંક ફ્રોડ તરીકે ઓળખવામાં આવી.
કાયદા મુજબ ધરપકડ થઈ નથી
પ્રારંભિક સીબીઆઈ કસ્ટડી પછી, વિશેષ સીબીઆઈ કોર્ટે 29 ડિસેમ્બરે તેમને ન્યાયિક કસ્ટડીમાં મોકલ્યા હતા. વરિષ્ઠ એડવોકેટ અમિત દેસાઈએ એડવોકેટ કુશલ મોર સાથે, ચંદા માટે હાજર રહી દલીલ કરી હતી કે ક્રિમિનલ પ્રોસિજર કોડની કલમ 46(4) નું પાલન કર્યા વિના તેની ધરપકડ કરવામાં આવી હતી કારણ કે તેની ધરપકડ દરમિયાન મહિલા પોલીસ અધિકારીની હાજરી નહોતી. તેઓએ એ પણ રજૂ કર્યું કે મની લોન્ડરિંગ સાથે જોડાયેલા કેસમાં એન્ફોર્સમેન્ટ ડિરેક્ટોરેટ (ED) એ સુપ્રીમ કોર્ટ સમક્ષ નિવેદન આપ્યું હતું કે તેમને આ કેસમાં ચંદાની કસ્ટડીની જરૂર નથી. ભૂતપૂર્વ CEOએ ત્યારપછી, ED સાથે પણ સહકાર આપ્યો હતો, જેણે પ્રિવેન્શન ઓફ મની લોન્ડરિંગ એક્ટ (PMLA) ની કલમ 50 હેઠળ 14 નિવેદનો નોંધ્યા હતા, જે વકીલે સબમિટ કર્યા હતા. તેઓએ કોર્ટનું એ પણ ધ્યાન દોર્યું કે કેવી રીતે ચંદાએ સીબીઆઈ દ્વારા તેને જારી કરાયેલા દરેક સમન્સ સાથે સહકાર આપ્યો હતો.
ચંદા કોચર અને તેમના પતિનો તપાસમાં સહકાર
દીપક તરફથી હાજર રહેલા વરિષ્ઠ વકીલ વિક્રમ ચૌધરીએ કોર્ટને માહિતી આપી હતી કે માર્ચ 2021માં દીપકને PMLA કેસમાં જામીન આપવામાં આવ્યા હતા.ત્યારબાદ ટ્રાયલ કોર્ટ દ્વારા તે કાર્યવાહી પર પણ સ્ટે મુકવામાં આવ્યો હતો. તે તપાસમાં પણ સહકાર આપી રહ્યા છે. સીબીઆઈ તરફથી હાજર રહેલા વરિષ્ઠ એડવોકેટ રાજા ઠાકરેએ કોચરની ધરપકડ દરમિયાન કોઈપણ કાયદાકીય અથવા બંધારણીય જોગવાઈઓનું ઉલ્લંઘન કર્યું હોવાનો સ્પષ્ટપણે ઈન્કાર કર્યો હતો. તેમણે રજૂઆત કરી હતી કે એજન્સીની ધરપકડનો હેતુ સ્પષ્ટતા મેળવવા અને આરોપીઓની પૂછપરછ દ્વારા સંબંધિત તમામ વ્યવહારોને ક્રમિક રીતે સમજવા માટે હતો.
આ પણ વાંચો : અદાણીના CNG ભાવમાં વધારો, સામાન્ય જનતાને મોંઘવારીનો ડોઝ
