ઉપરાષ્ટ્રપતિની ચૂંટણીઃ 6 ઓગસ્ટે થશે મતદાન, એ જ દિવસે પરિણામ પણ જાહેર

નવી દિલ્હી, ચૂંટણી પંચે ઉપરાષ્ટ્રપતિની ચૂંટણીનો કાર્યક્રમ જાહેર કરી દીધો છે. ઉપરાષ્ટ્રપતિની ચૂંટણી માટે 6 ઓગસ્ટે મતદાન થશે અને તે જ દિવસે મતગણતરી પણ થશે. એટલે કે 6 ઓગસ્ટે ઉપરાષ્ટ્રપતિની ચૂંટણીનું પરિણામ આવશે. વર્તમાન ઉપરાષ્ટ્રપતિ એમ વેંકૈયા નાયડુનો કાર્યકાળ 10 ઓગસ્ટે સમાપ્ત થઈ રહ્યો છે.

ચૂંટણી પંચે કહ્યું કે, ઉપરાષ્ટ્રપતિની ચૂંટણી માટે 5 જુલાઈના રોજ જાહેરનામું બહાર પાડવામાં આવશે. ઉમેદવારી પત્ર ભરવાની છેલ્લી તારીખ 19 જુલાઈ રહેશે. ઉમેદવારી પત્રોની ચકાસણી 20 જુલાઈએ થશે અને નામાંકન પરત ખેંચવાની છેલ્લી તારીખ 22 જુલાઈ છે. મુખ્ય ચૂંટણી કમિશનર રાજીવ કુમાર અને ચૂંટણી કમિશનર અનૂપ ચંદ્ર પાંડેની બેઠકમાં ઉપરાષ્ટ્રપતિની ચૂંટણીનો કાર્યક્રમ નક્કી કરવામાં આવ્યો છે.

ઉપરાષ્ટ્રપતિની ચૂંટણી કેવી રીતે થાય છે?
સંસદના બંને ગૃહોના સભ્યોનો સમાવેશ કરતી ચૂંટણી મંડળ દ્વારા પ્રમાણસર પ્રતિનિધિત્વની પદ્ધતિ દ્વારા ઉપરાષ્ટ્રપતિની પસંદગી કરવામાં આવે છે. બંને ગૃહોના સભ્યો તેમાં ભાગ લે છે અને દરેક સભ્ય માત્ર એક જ મત આપી શકે છે. રાષ્ટ્રપતિની ચૂંટણીમાં ચૂંટાયેલા સાંસદોની સાથે ધારાસભ્યો પણ મતદાન કરે છે, પરંતુ ઉપરાષ્ટ્રપતિની ચૂંટણીમાં માત્ર લોકસભા અને રાજ્યસભાના સાંસદો જ મતદાન કરી શકે છે. બંને ગૃહો માટે નામાંકિત સાંસદો રાષ્ટ્રપતિની ચૂંટણીમાં મતદાન કરી શકતા નથી પરંતુ તેઓ ઉપરાષ્ટ્રપતિની ચૂંટણીમાં મતદાન કરી શકે છે. જો આ રીતે જોવામાં આવે તો ઉપરાષ્ટ્રપતિની ચૂંટણીમાં બંને ગૃહોના 790 મતદારો ભાગ લેશે.

દેશમાં 16માં રાષ્ટ્રપતિની ચૂંટણી માટે 18 જુલાઈએ મતદાન થશે અને 21 જુલાઈએ મતગણતરી થશે. એનડીએએ ઝારખંડના ભૂતપૂર્વ રાજ્યપાલ અને આદિવાસી મહિલા નેતા દ્રૌપદી મુર્મુને તેના રાષ્ટ્રપતિ પદના ઉમેદવાર તરીકે મેદાનમાં ઉતાર્યા છે. જ્યારે વિરોધ પક્ષોએ ભૂતપૂર્વ કેન્દ્રીય મંત્રી યશવંત સિંહાને મેદાનમાં ઉતાર્યા છે.