ડોનાલ્ડ ટ્રમ્પે વર્ષ 2024માં યોજાનારી યુએસ પ્રમુખપદની રેસમાં વર્તમાન રાષ્ટ્રપતિ જો બિડેનને પાછળ છોડી દીધા છે. એક રાષ્ટ્રીય સર્વેમાં ડોનાલ્ડ ટ્રમ્પ 47 ટકા લોકોની પ્રથમ પસંદગી તરીકે ઉભરી આવ્યા છે. જ્યારે 43 ટકા લોકોએ જો બિડેનને પોતાની પસંદગી ગણાવી હતી. આ રીતે ટ્રમ્પે બિડેન પર ચાર ટકાની લીડ મેળવી લીધી છે. સર્વેમાં આ પહેલીવાર છે જ્યારે ટ્રમ્પે બિડેન પર સીધી લીડ લીધી છે.
જો બિડેનનું ભવિષ્ય મુશ્કેલીઓમાં ?
આ અંગે જાણવા મળ્યા મુજબ વોલ સ્ટ્રીટ જર્નલે આ સર્વે કર્યો છે. સર્વેમાં ધ્યાન આપવા જેવી બીજી બાબત એ છે કે જો બિડેનનું એપ્રુવલ રેટિંગ તેના સૌથી નીચા સ્તરે પહોંચી ગયું છે. એવું લાગે છે કે આગામી ટર્મ માટે ઉમેદવાર બનવાના જો બિડેનના પ્રયત્નોને ફટકો પડી શકે છે. ડેમોક્રેટિક પાર્ટીમાં પણ જો બિડેનને બીજી ટર્મ આપવાને લઈને મતભેદો ઉભા થઈ રહ્યા છે.
બિડેનની ઉંમર હાલમાં 81 વર્ષ
જો કે, જો બિડેને કહ્યું છે કે તેઓ આવતા વર્ષની ચૂંટણીમાં પણ પોતાની ઉમેદવારી રજૂ કરશે. સૌથી મોટી ચિંતા જે ઉભરી આવી છે તે જો બિડેનની ઉંમર છે કારણ કે આવતા વર્ષે ચૂંટણી યોજાશે ત્યારે બિડેન 81 વર્ષના હશે અને આગામી કાર્યકાળના અંતે તેઓ 86 વર્ષના થશે. આ ઉપરાંત જો બિડેનના પુત્ર હન્ટર બિડેન પર પણ ટેક્સ મામલે આરોપો લગાવવામાં આવ્યા છે, જેના કારણે જો બિડેનની મુસીબતમાં પણ વધારો થયો છે.
ટ્રમ્પની લોકપ્રિયતા સતત વધી રહી છે
ડોનાલ્ડ ટ્રમ્પ ઘણા મુકદ્દમાનો સામનો કરી રહ્યા છે પરંતુ તેમ છતાં તેમની લોકપ્રિયતા વધી રહી છે. ડોનાલ્ડ ટ્રમ્પ તેમના રિપબ્લિકન પાર્ટીના ઉમેદવારો કરતા ઘણા આગળ છે. કદાચ બિડેન પણ આનો અહેસાસ કરી રહ્યા છે, એટલે જ શુક્રવારે કેલિફોર્નિયામાં એક ફંડ રેઈઝિંગ ઈવેન્ટમાં જો બિડેને ટ્રમ્પ પર સીધો હુમલો કર્યો અને ટ્રમ્પ સમર્થકો દ્વારા યુએસ કેપિટોલ પર થયેલા હુમલાને નિશાન બનાવ્યો હતો. તેણે ટ્રમ્પના તે નિવેદનની પણ ટીકા કરી હતી જેમાં તેણે કહ્યું હતું કે તે માત્ર એક દિવસ માટે સરમુખત્યાર બની જશે.
