UP : લખનઉમાં પાંચ માળની બિલ્ડીંગ ધરાશાયી, ત્રણના મોત તેમજ ડઝનેક ઘાયલ

યુપીના પાટનગર લખનઉમાં મંગળવારે સાંજે એક મોટી દુર્ઘટના થઈ હતી. અહીંના વજીર હસન રોડ પર એક પાંચ માળની ઈમારત ધરાશાયી થઈ હતી. આ બનાવમાં ત્રણ લોકોના મોત થયા હતા. જ્યારે અનેક લોકો કાટમાળ નીચે દટાયા હોવાની આશંકા છે. ઘટનાની માહિતી પોલીસ અને ફાયર બ્રિગેડની ટીમને આપવામાં આવી હતી. આ સાથે જ માહિતી મળતા જ ડેપ્યુટી સીએમ બ્રિજેશ પાઠક પણ ઘટનાસ્થળે પહોંચી ગયા છે. બનાવ અંગે ડેપ્યુટી સીએમ બ્રિજેશ પાઠકે જણાવ્યું કે ત્રણ માળની ઈમારત અચાનક ધરાશાયી થઈ ગઈ હતી. NDRF, પોલીસ અને ફાયર બ્રિગેડની ટીમો સ્થળ પર છે. તેમણે કહ્યું કે ઘટનાસ્થળે ત્રણ લોકોના મૃતદેહ મળી આવ્યા છે. ત્રણેય મૃતદેહોને હોસ્પિટલ મોકલવામાં આવ્યા છે. દુર્ઘટના બાદ આસપાસમાં રહેતા લોકોને બહાર કાઢવામાં આવ્યા છે. રેસ્ક્યુ ટીમ કાટમાળમાંથી લોકોને બહાર કાઢી રહી છે.

બચાવ કામગીરી ઝડપી બનાવવા CM યોગીની સૂચના

એક સત્તાવાર નિવેદનમાં કહેવામાં આવ્યું છે કે મુખ્યમંત્રી યોગી આદિત્યનાથે અકસ્માતની નોંધ લીધી અને SDRF અને NDRF ટીમોને ઘટનાસ્થળે મોકલવા સૂચના આપી હતી. આ સાથે સીએમ યોગીએ જિલ્લા પ્રશાસનના અધિકારીઓને ઘાયલોને સારી સારવાર માટે તાત્કાલિક હોસ્પિટલમાં લઈ જવા સૂચના આપી હતી. નિવેદનમાં કહેવામાં આવ્યું છે કે મુખ્યમંત્રીએ ઘાયલોના જલ્દી સ્વસ્થ થવાની કામના કરી છે. આ સાથે જિલ્લા મેજિસ્ટ્રેટ અને વરિષ્ઠ પોલીસ અધિકારીઓ, SDRF અને NDRFની ટીમોને ઘટનાસ્થળે જઈને રાહત કાર્ય કરવા સૂચના આપવામાં આવી છે. આ સાથે અનેક હોસ્પિટલોને એલર્ટ રહેવા સૂચના આપવામાં આવી છે. NDRFની વધારાની ટીમ ઘટનાસ્થળે પહોંચી ગઈ છે. તેથી 45 જવાન રાહત અને બચાવ કાર્યમાં લાગેલા છે.

પાંચ માળની ઈમારતમાં 15 જેટલા પરિવારો રહેતા

ડેપ્યુટી સીએમ બ્રિજેશ પાઠક બાદ મુખ્યમંત્રીના માહિતી સલાહકાર અવનીશ અવસ્થી પણ ઘટનાસ્થળે પહોંચી ગયા છે. આ સાથે જ મુખ્ય સચિવ ગૃહ સંજય પ્રસાદ પણ ઘટનાસ્થળે છે. પાંચ માળની ઈમારતમાં 15 જેટલા પરિવારો રહેતા હતા. કહેવામાં આવી રહ્યું છે કે સમાજવાદી પાર્ટીના પ્રવક્તા અને નેતા શાહિદ મંજૂરનો પરિવાર પણ આ બિલ્ડિંગમાં રહેતો હતો. જ્યારે ઈમારત પડી ત્યારે સપા નેતા અબ્બાસ હૈદરના પિતા અને કોંગ્રેસ નેતા અમીર હૈદર અને તેમની પત્ની પણ ઈમારતમાં હાજર હતા.