પીએમ મોદીની અધ્યક્ષતામાં કેન્દ્રીય કેબિનેટની બેઠક યોજાઈ હતી, જેમાં અનેક યોજનાઓને મંજૂરી આપવામાં આવી હતી. કેન્દ્રીય મંત્રી અનુરાગ ઠાકુરે બેઠક બાદ પત્રકાર પરિષદમાં જણાવ્યું કે કેબિનેટે વાઈબ્રન્ટ વિલેજ પ્રોગ્રામ માટે 4800 કરોડ રૂપિયાની ફાળવણીને મંજૂરી આપી છે. આ બજેટ નાણાકીય વર્ષ 2022-23 અને 2025-26 માટે છે. આ પહેલા નાણામંત્રી નિર્મલા સીતારમણે પણ બજેટ ભાષણમાં વાઈબ્રન્ટ વિલેજ પ્રોગ્રામનો ઉલ્લેખ કર્યો હતો. તેમણે કહ્યું હતું કે આ કાર્યક્રમ હેઠળ સરકાર ઉત્તરીય સરહદ પર કનેક્ટિવિટી સુધારવા માટે કામ કરવા જઈ રહી છે. જો કે, તેમણે કાર્યક્રમ વિશે વિગતો આપી ન હતી.
Union Cabinet approves Centrally sponsored scheme- Vibrant Villages Programme for the financial years 2022-23 to 2025-26 with financial allocation of Rs 4800 Crores: Union Minister Anurag Thakur pic.twitter.com/pPa9zc9rh1
— ANI (@ANI) February 15, 2023
વાઇબ્રન્ટ વિલેજ પ્રોગ્રામ શું છે?
સરકાર દ્વારા બહાર પાડવામાં આવેલી યાદી મુજબ, આ વાઈબ્રન્ટ વિલેજ કાર્યક્રમ ચીનની સરહદને અડીને આવેલા ભારતના ગામડાઓમાં ઈન્ફ્રાસ્ટ્રક્ચર સુધારવા માટે શરૂ કરવામાં આવ્યો છે. જેમાં લદ્દાખ, હિમાચલ પ્રદેશ, ઉત્તરાખંડ, સિક્કિમ અને અરુણાચલ પ્રદેશના કુલ 19 જિલ્લાના 2966 ગામોમાં રસ્તાઓ અને અન્ય ઈન્ફ્રાસ્ટ્રક્ચરને મજબૂત કરવામાં આવશે. આ સિવાય આ કાર્યક્રમ બોર્ડર એરિયા ડેવલપમેન્ટ પ્રોગ્રામથી અલગ હશે અને તેનો ખર્ચ કેન્દ્ર સરકાર ઉઠાવશે.
આ કાર્યક્રમ હેઠળ રહેણાંક અને પ્રવાસી કેન્દ્રોનું નિર્માણ કરવામાં આવશે. ઉત્તરીય સરહદે વિરલ વસ્તીવાળા ગામોની કનેક્ટિવિટી અને માળખાકીય જરૂરિયાતોને ધ્યાનમાં લેવામાં આવી છે. ભારતના આ વિસ્તારો વિકાસના લાભોથી વંચિત છે. આવા ગામોમાં રોડ કનેક્ટિવિટી સુધારવા અને ઉર્જા સ્ત્રોતો વિકસાવવા માટે આ કાર્યક્રમ હેઠળ કામ કરવામાં આવશે. આ ઉપરાંત, દૂરદર્શન અને શિક્ષણ સંબંધિત ચેનલોની સીધી ઍક્સેસ પ્રદાન કરવામાં આવશે અને આજીવિકા માટે પણ સહાય આપવામાં આવશે.
કાર્યક્રમ શા માટે મહત્વપૂર્ણ ?
ભારતમાં હિમાલયની સરહદ પર ચીનની હાજરી કોઈનાથી છુપી નથી. આવી સ્થિતિમાં આ કાર્યક્રમની જાહેરાતને એક મહત્વપૂર્ણ પગલું માનવામાં આવી રહ્યું છે. ભારત સાથેની સરહદ પર ચીન સક્રિયપણે બાંધકામનું કામ કરી રહ્યું છે. આવી સ્થિતિમાં, LACની નજીક આવેલા ગામડાઓમાં માળખાકીય સુવિધાઓને મજબૂત કરીને આ ઉદ્દેશ્ય પૂર્ણ થશે. તે સ્થળાંતર રોકવાનો પણ પ્રયાસ કરશે. ચીને તાજેતરના વર્ષોમાં ભારતમાં તેમજ ભૂટાન અને નેપાળના સરહદી વિસ્તારોમાં મોડલ ગામો વિકસાવ્યા છે. ભારતનો વાઈબ્રન્ટ વિલેજ પ્રોગ્રામ ચીનના મોડલ ગામડાઓનો પ્રતિસાદ હોવાનું માનવામાં આવે છે.
