યુક્રેનના રાષ્ટ્રપતિ ઝેલેન્સકીને ટાઈમ મેગેઝીને ‘પર્સન ઓફ ધ યર 2022’ પસંદ કર્યા

ટાઈમ મેગેઝીને યુક્રેનના રાષ્ટ્રપતિ ઝેલેન્સકી અને ‘સ્પિરિટ ઓફ યુક્રેન’ને ‘પર્સન ઓફ ધ યર 2022’ તરીકે પસંદ કર્યા છે. ટાઈમ મેગેઝીને તાજેતરના અંકમાં ઝેલેન્સકીને કવર પેજ પર સ્થાન આપ્યું છે.  રશિયા-યુક્રેન યુદ્ધની વચ્ચે ઝેલેન્સકી છેલ્લા 10 મહિનાથી પોતાના દેશ અને દેશવાસીઓની સાથે અડગ ઊભા છે. ટાઈમ મેગેઝીને બુધવારે આની જાહેરાત કરી હતી.

કોને મળે છે આ એવોર્ડ ?

આ એવોર્ડ એવા વ્યક્તિઓને આપવામાં આવે છે જેમણે પાછલા વર્ષમાં વૈશ્વિક ઘટનાઓ પર સૌથી વધુ પ્રભાવ પાડ્યો હોય. ટાઇમના એડિટર-ઇન-ચીફ એડવર્ડ ફેલસેન્થલના જણાવ્યા મુજબ, “જ્યારે યુક્રેન માટેની લડત ભયભીત થઈ શકે છે અથવા આશાથી ભરે છે, વોલોડિમિર ઝેલેન્સકીએ વિશ્વને એવી રીતે પ્રેરણા આપી છે જે આપણે દાયકાઓમાં જોઈ નથી.”

શા માટે ઝીલેન્સકીની પસંદગી કરવામાં આવી ?

તેમણે કહ્યું કે, આ પદ માટે યુક્રેનના રાષ્ટ્રપતિને પસંદ કરવાનું સૌથી મોટું અને સ્પષ્ટ કારણ છે. છેલ્લા 9-10 મહિનાથી તે એક એવી લડાઈનું નેતૃત્વ કરી રહ્યો છે જ્યાં તેનો પ્રતિસ્પર્ધી તાકાત અને ફાયરપાવરમાં તેના કરતા અનેક ગણો મોટો છે, તેમ છતાં ઝેલેન્સકી તેની સેનાનું મનોબળ જાળવી રાખવામાં સફળ રહ્યો છે. 24 ફેબ્રુઆરીએ યુક્રેન પર રશિયાના હુમલા પછી રાષ્ટ્રપતિ ઝેલેન્સકીએ જે પણ કહ્યું તે માત્ર યુક્રેનિયનો માટે જ નહીં પરંતુ સમગ્ર વિશ્વની મોટી વસ્તી અને સરકારો માટે પ્રેરણારૂપ છે.