રશિયા અને યુક્રેન વચ્ચેનો સંઘર્ષ હજુ અટકવાનું નામ નથી લઈ રહ્યો. બંને દેશો સતત એકબીજા પર હુમલા કરી રહ્યા છે. એક રિપોર્ટ અનુસાર, શનિવારે મોસ્કો પર થયેલા ડ્રોન હુમલાને કારણે અહીંના ત્રણ મોટા એરપોર્ટને અસ્થાયી રૂપે બંધ કરવા પડ્યા હતા.
એક અહેવાલ અનુસાર, શેરેમેટ્યેવો, ડોમોડેડોવો અને વનુકોવો એરપોર્ટ્સે શનિવારે તમામ ફ્લાઇટ્સ સ્થગિત કરી દીધી હતી. રશિયાની રાજધાની પર ડ્રોન હુમલાના પરિણામે મોસ્કોએ અઠવાડિયામાં ત્રીજી વખત મોટા એરપોર્ટ બંધ કર્યા છે.
તે જ સમયે, રશિયન અધિકારીઓએ રાજધાની અને આસપાસના વિસ્તાર પર હુમલાની ઘટના માટે યુક્રેનને જવાબદાર ઠેરવ્યું છે, પરંતુ યુક્રેનના અધિકારીઓએ હજુ સુધી પુષ્ટિ કરી નથી.
યુક્રેનિયન ડ્રોન હુમલા પહેલા પણ, મોસ્કો ક્ષેત્રના તમામ મોટા એરપોર્ટ બંધ કરવા પડ્યા હતા, ડઝનેક ફ્લાઇટ્સ ખોરવાઈ હતી. મીડિયા રિપોર્ટ અનુસાર, આ હુમલામાં કોઈ જાનહાનિ કે નુકસાનના સમાચાર નથી.
