હવે ગૂગલ મેપ પર મળશે નજીકના આધાર સેન્ટરની સચોટ માહિતી, UIDAI અને ગૂગલ વચ્ચે મહત્વની ભાગીદારી
નવી દિલ્હી: 26 ફેબ્રુઆરી, 2026: Aadhaar Update Online: જો તમારે નવું આધાર કાર્ડ કઢાવવું હોય કે જૂના આધારમાં કોઈ સુધારો કરાવવો હોય, તો હવે તમારે આધાર સેન્ટર શોધવા માટે અહીં-તહીં ભટકવું નહીં પડે. UIDAI (Unique Identification Authority of India) એ લોકોની સુવિધા માટે ગૂગલ (Google) સાથે હાથ મિલાવ્યા છે. હવે તમે માત્ર એક ક્લિક પર તમારા ઘરની નજીક કાર્યરત આધાર કેન્દ્રની માહિતી મેળવી શકશો.
ગૂગલ મેપ પર કઈ સુવિધાઓ જોવા મળશે?
આઈટી મંત્રાલય દ્વારા આપવામાં આવેલી માહિતી મુજબ, આગામી થોડા મહિનામાં ગૂગલ મેપમાં આ ખાસ ફીચર આવી જશે. જેના દ્વારા તમે નીચે મુજબની વિગતો જાણી શકશો.
* સેન્ટરનો પ્રકાર: કયા કેન્દ્ર પર પુખ્ત વયના લોકોનું નોંધણી (Enrollment) થાય છે અને ક્યાં બાળકોના આધાર કાર્ડ બને છે તેની માહિતી મળશે.
* સુધારાની સુવિધા: કયા સેન્ટર પર માત્ર સરનામું કે મોબાઈલ નંબર અપડેટ થાય છે તેની વિગત પણ ઉપલબ્ધ હશે.
* અન્ય સુવિધાઓ: આધાર સેન્ટર દિવ્યાંગ મૈત્રીપૂર્ણ (Disabled Friendly) છે કે નહીં, ત્યાં પાર્કિંગની સુવિધા છે કે નહીં, તે પણ જાણી શકાશે.
* સમય અને રજા: સેન્ટર ખુલવાનો સમય અને કયા દિવસે રજા હોય છે તેની તમામ વિગતો મેપ પર જ મળી જશે.
છેતરપિંડીથી બચવા માટે મોટું પગલું
UIDAI ના જણાવ્યા અનુસાર, દેશભરમાં અંદાજે 60,000 આધાર સેવા કેન્દ્રો છે. ઘણીવાર લોકો જૂની કે ખોટી માહિતીને કારણે બંધ થઈ ગયેલા સેન્ટર પર પહોંચી જાય છે અથવા તો આધારના નામે ગેરકાયદેસર પૈસા વસૂલતા લોકોનો શિકાર બને છે. ગૂગલ મેપ પર માત્ર સત્તાવાર (Official) કેન્દ્રો જ દેખાડવામાં આવશે, જેથી લોકો ઠગાઈથી બચી શકે અને પારદર્શક વ્યવસ્થાનો લાભ લઈ શકે.
શા માટે આ નિર્ણય લેવામાં આવ્યો?
UIDAI ના CEO એ જણાવ્યું કે, અમારો મુખ્ય ઉદ્દેશ્ય આધાર ધારકો માટે પ્રક્રિયા સરળ બનાવવાનો છે. ગૂગલ ઈન્ડિયાના સ્ટ્રેટેજિક પાર્ટનરશિપ કન્ટ્રી હેડ રોલી અગ્રવાલે ઉમેર્યું કે, આ સહયોગથી લાખો લોકોને ફાયદો થશે અને જનતા તથા સરકારી સંસ્થાઓ વચ્ચેનું અંતર ઘટશે.
યાદ રાખવા જેવી બાબતો:
* તમારા નજીકના આધાર કેન્દ્ર સુધી પહોંચવા માટે ગૂગલ મેપ પર માત્ર ‘Aadhaar Seva Kendra’ સર્ચ કરવાનું રહેશે.
* સત્તાવાર કેન્દ્ર પર જવાથી તમે વધારાના ચાર્જ કે છેતરપિંડીથી સુરક્ષિત રહેશો.
* જતા પહેલા મેપ પર સેન્ટરની સુવિધાઓ અને સમય ચોક્કસ ચેક કરી લેવો.
