ઉદ્ધવ ઠાકરે જૂથની મોટી જાહેરાત, ‘મંજૂરી મળે કે ન મળે શિવાજી પાર્કમાં જ યોજાશે દશેરા રેલી ‘

શિવાજી પાર્ક મેદાનમાં દશેરા રેલીને લઈને ઉદ્ધવ ઠાકરે જૂથ અને એકનાથ શિંદે જૂથ વચ્ચે સ્પર્ધા છે. તેની વચ્ચે ઉદ્ધવ ઠાકરે જૂથે આ રેલીને લઈને મોટી જાહેરાત કરી છે. ઉદ્ધવ ઠાકરેની આગેવાની હેઠળની શિવસેનાએ જણાવ્યું હતું કે BMC તેની મંજૂરી આપે કે ન આપે, તે શિવાજી પાર્ક મેદાનમાં પાર્ટીની વાર્ષિક દશેરા રેલી યોજશે.

‘મંજૂરી મળે કે ન મળે શિવાજી પાર્કમાં જ યોજાશે દશેરા રેલી’

મુંબઈના ભૂતપૂર્વ મેયર મિલિંદ વૈદ્યના નેતૃત્વમાં શિવસેનાના નેતાઓનું એક પ્રતિનિધિમંડળ રેલી યોજવાની પરવાનગી માટે તેમની અરજીની સ્થિતિ વિશે પૂછવા માટે નાગરિક અધિકારીઓને મળ્યું હતું. તેમણે કહ્યું કે અમને પરવાનગી મળે કે ન મળે અમે શિવાજી પાર્કમાં ભેગા થઈશું. વહીવટીતંત્રે અમને પરવાનગી આપવી જોઈએ અથવા અમને નામંજૂર કરવી જોઈએ. અમે અમારા નિર્ણય (શિવાજી પાર્કમાં રેલી કરવા) પર ખૂબ મક્કમ છીએ.

રેલીમાં બંને પક્ષો સામ-સામે

“જો અમને કોઈ જવાબ નહીં મળે, તો બાળાસાહેબના શિવસેના કાર્યકર્તાઓ દશેરા રેલી માટે શિવાજી પાર્કમાં એકઠા થશે,” તેમણે કહ્યું. તમને જણાવી દઈએ કે ઠાકરેના નેતૃત્વવાળા જૂથ અને મહારાષ્ટ્રના મુખ્ય પ્રધાન એકનાથ શિંદેના નેતૃત્વ હેઠળના શિવસેના જૂથ બંનેએ મુંબઈના શિવાજી પાર્કમાં દશેરા રેલીનું આયોજન કરવાની મંજૂરી માંગી છે. શિવસેના શરૂઆતથી જ આ સ્થળે દશેરા રેલીનું આયોજન કરે છે.

BMCએ હજુ સુધી આ મુદ્દે કોઈ નિર્ણય લીધો નથી. બંને પક્ષોએ વિકલ્પ તરીકે બાંદ્રા કુર્લા કોમ્પ્લેક્સના MMRDA મેદાનમાં રેલી યોજવાની પરવાનગી માટે પણ અરજી કરી છે. જો કે, ગયા અઠવાડિયે શિંદે જૂથને BKCમાં રેલી યોજવાની પરવાનગી આપવામાં આવી છે.

ઉદ્ધવ ઠાકરેની શિવસેનાને પરવાનગી મળવી જોઈએઃ પવાર

NCP નેતા અજિત પવારે જણાવ્યું હતું કે ઉદ્ધવ ઠાકરેની આગેવાની હેઠળની શિવસેનાને શિવાજી પાર્કમાં રેલી કરવાની મંજૂરી આપવી જોઈએ અને જો મંજૂરી ન મળે તો તેઓએ કાયદાનો સહારો લેવો જોઈએ. મહા વિકાસ અઘાડી ગઠબંધનમાં ઠાકરેની આગેવાની હેઠળની શિવસેનાના સાથી પવારે કહ્યું કે “જો શિંદે જૂથ માટે BKC મેદાન આપવામાં આવે તો ઉદ્ધવ ઠાકરેના નેતૃત્વવાળા જૂથને શિવાજી પાર્કમાં રેલી યોજવાની મંજૂરી આપવી જોઈએ.”