નવી મુંબઈ, 8 ફેબ્રુઆરી : અંડર-19 વર્લ્ડ કપ 2024માં બીજી સેમિફાઇનલ મેચ ગુરુવારે (8 ફેબ્રુઆરી) પાકિસ્તાન અને ઓસ્ટ્રેલિયા વચ્ચે રમાઈ હતી. આ મેચ ખૂબ જ રોમાંચક રહી હતી, જેમાં કાંગારૂ ટીમે 1 વિકેટથી જીત મેળવીને ફાઇનલમાં પ્રવેશ કર્યો હતો. હવે ફાઈનલ મેચમાં ઓસ્ટ્રેલિયાનો મુકાબલો ભારતીય ટીમ સાથે થશે. આ ટાઈટલ મેચ રવિવારે (11 ફેબ્રુઆરી) બેનોનીમાં જ રમાશે. અગાઉ ભારતીય ટીમે તેની સેમિફાઇનલ મેચમાં દક્ષિણ આફ્રિકાને 2 વિકેટે હરાવ્યું હતું.
પાકિસ્તાનની ટીમે 180 રનનો નાનો ટાર્ગેટ આપ્યો
બીજી સેમી ફાઈનલ મેચમાં ટોસ હાર્યા બાદ પ્રથમ બેટિંગ કરતા પાકિસ્તાનની ટીમે ખૂબ જ ખરાબ શરૂઆત કરી હતી અને આખી ટીમ 179 રન પર જ સિમિત થઈ ગઈ હતી. મેચ દરમિયાન પાકિસ્તાન ટીમની હાલત ખૂબ જ ખરાબ જોવા મળી હતી. તેઓએ માત્ર 79 રનમાં પાંચ વિકેટ ગુમાવી દીધી હતી. આ પછી અઝાન ઔવેસ (52) અને અરાફાત મિન્હાસે (52) અર્ધસદી ફટકારીને પાકિસ્તાનને સન્માનજનક સ્કોર સુધી પહોંચાડ્યું હતું. પહેલા રમતા પાકિસ્તાને 48.5 ઓવરમાં ઓલઆઉટ થતાં 179 રન બનાવ્યા હતા. ઓસ્ટ્રેલિયા માટે ટોમ સ્ટ્રેકરે 9.5 ઓવરમાં 24 રન આપીને સૌથી વધુ 6 વિકેટ લીધી હતી.
છેલ્લી વિકેટ અને કાંગારૂ ટીમે 16 રન બનાવ્યા હતા
દરમિયાન 180 રનના ટાર્ગેટનો પીછો કરવા ઉતરેલી ઓસ્ટ્રેલિયન ટીમે 164 રનમાં 9 વિકેટ ગુમાવી દીધી હતી. તેને જીતવા માટે 24 બોલમાં 16 રનની જરૂર હતી. પરંતુ રાફ મેકમિલને 19 અણનમ રન બનાવીને સમગ્ર રમતને ફેરવી નાખી હતી. મેકમિલનને કેલમ વિડલરે ટેકો આપ્યો હતો, જે 9 બોલમાં 2 રન બનાવીને અણનમ રહ્યો હતો. પાકિસ્તાની બોલરો છેલ્લી ઓવર સુધી મેચ વિનિંગ વિકેટ લેવા તડપતા રહ્યા, પરંતુ કાંગારૂઓ જીતી ગયા હતા.
અલી રઝાએ 4 વિકેટ, અરાફાતને 2 સફળતા મળી
છેલ્લી ઓવરમાં ઓસ્ટ્રેલિયાની ટીમે 9 વિકેટ ગુમાવીને 181 રન બનાવીને મેચ જીતી લીધી હતી. આ રીતે કાંગારૂ ટીમે ફાઇનલમાં પ્રવેશ કરી લીધો છે. ઓસ્ટ્રેલિયા તરફથી હેરી ડિક્સને સૌથી વધુ 50 રન અને ઓલિવર પીકે 49 રનની ઇનિંગ્સ રમી હતી. જ્યારે પાકિસ્તાન તરફથી ઝડપી બોલર અલી રઝાએ સૌથી વધુ 4 વિકેટ ઝડપી હતી. સ્પિનર અરાફાત મિન્હાસને 2 વિકેટ મળી હતી.
