હિટ એન્ડ રનના કાયદા વિરુદ્ધ ટ્રક-બસ ચાલકો હડતાલ પર ઉતર્યા, પાછો ખેંચવાની માંગ

• કેન્દ્ર સરકાર દ્વારા લાવવામાં આવેલા હિટ એન્ડ રનના કાયદાનો મુંબઈ, દિલ્હી, UPમાં વિરોધ
• ટ્રક ચાલકો દ્વારા પોતાની ટ્રકોને રસ્તાઓ પર પાર્ક કરીને રસ્તોને બ્લોક કરવામાં આવ્યો  

નવી દિલ્હી, 2 જાન્યુઆરી : કેન્દ્ર સરકાર દ્વારા લાવવામાં આવેલા હિટ એન્ડ રન કાયદાના વિરોધમાં દેશભરના ટ્રક અને ડમ્પર ચાલકો હડતાલ પર ઉતર્યા છે. તેમનું કહેવું છે કે, આ કાયદો ખોટો છે અને તેને પાછો ખેંચવો જોઈએ. આ માંગ સાથે ટ્રક ચાલકોએ પોતાની ટ્રકોને રસ્તાઓ પર પાર્ક કરી હતી અને મુંબઈ, ઈન્દોર, દિલ્હી-હરિયાણા, યુપી સહિત અનેક જગ્યાએ રસ્તા બ્લોક કરી દીધા હતા.

હિટ એન્ડ રન કાયદો શું છે?

હકીકતમાં, કેન્દ્ર સરકારે ગુનાને લઈને નવો કાયદો બનાવ્યો છે, જે અંતર્ગત જો કોઈ ટ્રક અથવા ડમ્પર ચાલક કોઈની ઉપર વાહન ચડાવીને ભાગી જાય તો તેને 10 વર્ષની જેલ થઈ શકે છે. આ સિવાય 7 લાખ રૂપિયાનો દંડ પણ ભરવો પડશે. અગાઉ આ કેસમાં આરોપી ડ્રાઈવરને થોડા દિવસોમાં જ જામીન મળી જતા હતા અને તે પોલીસ સ્ટેશનમાંથી બહાર આવી જતો હતો. જો કે આ કાયદા હેઠળ બે વર્ષની જેલની જોગવાઈ પણ હતી.

હિટ એન્ડ રનને લઈને કેન્દ્ર સરકાર દ્વારા લાવવામાં આવેલા નવા કાયદા સામે બસ-ટ્રક ચાલકો હડતાળ પર છે, જેના કારણે વાહનવ્યવહાર વ્યવસ્થા સંપૂર્ણ રીતે ઠપ થઈ ગઈ છે. ઈંધણ ન મળવાને કારણે પેટ્રોલ પંપ પર લાંબી લાઈનો લાગી ગઈ છે.

નવા કાયદા સામે ટ્રક ચાલકોમાં રોષ

સરકારના આ નિર્ણય બાદ ટ્રક ચાલકોમાં ભારે રોષ જોવા મળી રહ્યો છે. તેઓ કહે છે કે, “આ સંપૂર્ણપણે ખોટું છે. સરકારે આ કાયદો પાછો ખેંચવો પડશે. આ અંગે ગ્રેટર નોઈડાના ઈકોટેક 3 વિસ્તારમાં ટ્રક ડ્રાઈવરોએ પોતાના વાહનો પાર્ક કરીને રોડ બ્લોક કરી દીધો હતો અને સૂત્રોચ્ચાર કર્યા હતા. જોકે, પોલીસની સમજાવટ બાદ તેઓએ પોતાના વાહનો હટાવ્યા હતા.

ઈન્દોરમાં પણ ચક્કાજામ

મધ્યપ્રદેશના ઈન્દોરમાં ટ્રક ડ્રાઈવરોની હડતાલની અસર પેટ્રોલ પંપ પર પણ પડી હતી. અહીંના પેટ્રોલ પંપ પર વાહનોની લાંબી લાઇનો લાગી હતી. મળતી માહિતી મુજબ, ટ્રક ડ્રાઈવરોની આ હડતાલ ત્રણ દિવસ સુધી ચાલશે. જેના કારણે પેટ્રોલ પંપ સુધી ઈંધણ પહોંચી શકશે નહીં. આ સમાચાર ફેલાતાની સાથે જ લોકો પેટ્રોલ પંપ પર પહોંચવા લાગ્યા છે, જેના કારણે વાહનોની લાંબી કતારો જોવા મળી છે.

મુંબઈ, મધ્યપ્રદેશ અને રાજસ્થાનમાં ટ્રક ડ્રાઈવરોનો વિરોધ  

મધ્યપ્રદેશ, દિલ્હી તેમજ મહારાષ્ટ્રમાં હડતાલની અસર જોવા મળી હતી. જ્યાં સરકાર દ્વારા લાવવામાં આવેલા નવા કાયદાનો ભારે વિરોધ કરવામાં આવ્યો હતો. તેમની હડતાળને કારણે માર્ગો પર લાંબો ટ્રાફિક જામ થયો હતો. મધ્યપ્રદેશના દેવાસ જિલ્લામાં બસ અને ટ્રક ચાલકોનો ગુસ્સો જોવા મળ્યો હતો. આ દરમિયાન તેઓએ શહેરમાં 2-3 જગ્યાએ રોડ બ્લોક કરવાનો પ્રયાસ કર્યો હતો. જે બાદ રસૂલપુર બાયપાસ પર બે કલાક સુધી નાકાબંધી કરી દેવામાં આવી હતી જેના કારણે વાહનોની લાંબી કતારો લાગી ગઈ હતી. અહીં પોલીસ અને પ્રશાસનના ખુલાસા છતાં વાહનચાલકો રાજી ન થયા અને દેખાવો ચાલુ રાખ્યા. તેમજ મધ્યપ્રદેશના પન્ના જિલ્લામાં બસ અને ટ્રક ચાલકોએ નેશનલ હાઈવે-39ને બ્લોક કરી દીધો હતો. બસ ચાલકોની હડતાળના કારણે મુસાફરો પણ પરેશાન થયા હતા. જેને લઈને માર્ગો પર વાહનોની લાંબી લાઈનો લાગી ગઈ હતી. આ દરમિયાન તેઓએ ‘કાળો કાયદો પાછો લો’ના નારા પણ લગાવ્યા હતા.

રાજસ્થાનના હનુમાનગઢ જિલ્લામાં પણ ટ્રક અને બસના ચાલકો રસ્તા પર ઉતરી આવ્યા હતા. તેઓએ હાઈવે બ્લોક કરીને આ કાયદાનો વિરોધ કર્યો હતો. આ પછી ડ્રાઈવર જિલ્લા કલેક્ટર કચેરી પહોંચ્યો, જ્યાં તેણે સરકાર અને પ્રશાસનને કડક ચેતવણી પણ આપી.

આ પણ જુઓ :જાપાનમાં 7.5 તીવ્રતાના ભૂકંપમાં અત્યાર સુધી 13નાં મૃત્યુ, સેંકડો ઘરો અને દુકાનો બળીને રાખ