ત્રિપુરામાં 60 વિધાનસભા બેઠકો માટે આજે સવારે 7 વાગ્યાથી મતદાન શરૂ થઈ ગયું છે. મતગણતરી 2 માર્ચે થશે. ચુસ્ત સુરક્ષા વચ્ચે સવારે 7 થી સાંજે 4 વાગ્યા સુધી મતદાન યોજાશે. મુખ્ય ચૂંટણી અધિકારી (CEO) જી કિરણકુમાર દિનાકારોએ જણાવ્યું હતું કે, કડક સુરક્ષા વચ્ચે લોકો સવારે 7 વાગ્યે 3,337 મતદાન મથકો પર મતદાન કરવા માટે પહોંચી રહ્યા છે. જેમાંથી 1100ને સંવેદનશીલ અને 28ને અતિસંવેદનશીલ વિસ્તારો તરીકે ઓળખવામાં આવ્યા છે.
આ પણ વાંચો : ઓમકારેશ્વરમાં નર્મદા પરનો સસ્પેન્શન બ્રીજ તૂટ્યો, બેદરકારીથી મોરબી જેવો અકસ્માત સર્જાઈ શકે છે
ત્રિપુરામાં કુલ 259 ઉમેદવારો મેદાનમાં છે, જેમાંથી 20 મહિલાઓ છે. ભાજપ 55 વિધાનસભા બેઠકો પર ચૂંટણી લડી રહી છે, જ્યારે તેના સહયોગી આઈપીએફટીએ છ બેઠકો પર ઉમેદવારો ઉભા રાખ્યા છે અને એક બેઠક પર મૈત્રીપૂર્ણ સ્પર્ધા છે. સીપીએમ 47 સીટો પર ચૂંટણી લડી રહી છે અને તેની સહયોગી પાર્ટી કોંગ્રેસ 13 સીટો પર ચૂંટણી લડી રહી છે. ચૂંટણીની હરીફાઈ BJP-IPFT ગઠબંધન, CPI(M)-કોંગ્રેસ ગઠબંધન અને પૂર્વોત્તર રાજ્યના પૂર્વ રાજવી પરિવારના વંશનું પ્રતિનિધિત્વ કરતી પ્રાદેશિક પાર્ટી ટીપ્રા મોથા વચ્ચે છે.
ચુસ્ત સુરક્ષા વ્યવસ્થા
31,000 મતદાન કર્મચારીઓ અને કેન્દ્રીય દળોના 25,000 સુરક્ષા કર્મચારીઓને નિષ્પક્ષ અને શાંતિપૂર્ણ રીતે ચૂંટણી કરાવવા માટે તૈનાત કરવામાં આવ્યા છે. આ ઉપરાંત રાજ્ય સશસ્ત્ર પોલીસ અને રાજ્ય પોલીસના 31,000 જવાનો કાયદો અને વ્યવસ્થા જાળવવા માટે તૈનાત રહેશે. સાવચેતીના પગલા તરીકે, રાજ્યભરમાં પહેલાથી જ પ્રતિબંધિત આદેશો લાદવામાં આવ્યા છે અને 17 ફેબ્રુઆરીના રોજ સવારે 6 વાગ્યા સુધી અમલમાં રહેશે.
તમામની નજર આ ઉમેદવારો પર છે
મુખ્યમંત્રી માણિક સાહા ટાઉન બારડોવલી બેઠક પરથી ભાજપના ઉમેદવાર છે. કેન્દ્રીય મંત્રી પ્રતિમા ભૌમિક ભાજપની ટિકિટ પર ધાનપુરથી ચૂંટણી લડી રહ્યા છે. CPIM રાજ્ય સચિવ જીતેન્દ્ર ચૌધરી, જે ડાબેરી-કોંગ્રેસ ગઠબંધનનો ચહેરો છે, તે સબરૂમ વિધાનસભા બેઠક પરથી ચૂંટણી લડી રહ્યા છે.
28 લાખ મતદારો 259 ઉમેદવારોના ભાવિનો નિર્ણય કરશે
ત્રિપુરામાં 13.53 લાખ મહિલાઓ સહિત કુલ 28.13 લાખ મતદારો 259 ઉમેદવારોના ભાવિનો નિર્ણય કરશે. બદમાશોને રાજ્યમાં પ્રવેશતા અટકાવવા માટે આંતરરાષ્ટ્રીય અને આંતરરાજ્ય સરહદો પણ સીલ કરી દેવામાં આવી છે.
Urging the people of Tripura to vote in record numbers and strengthen the festival of democracy. I specially call upon the youth to exercise their franchise.
— Narendra Modi (@narendramodi) February 16, 2023
વડાપ્રધાન નરેન્દ્ર મોદી અને ભાજપના અધ્યક્ષ જેપી નડ્ડાએ મતદારોને આપ્યો સંદેશ
વડા પ્રધાન નરેન્દ્ર મોદીએ ત્રિપુરાના લોકોને રેકોર્ડ સંખ્યામાં મતદાન કરવા અને લોકશાહીના તહેવારને મજબૂત કરવા વિનંતી કરી હતી. તેમણે ખાસ કરીને યુવાનોને તેમના મતાધિકારનો ઉપયોગ કરવા અપીલ કરી હતી.
I urge all the voters to take part in this festival of democracy & show up to vote for the Tripura assembly elections.
Each vote will count towards continuing the journey of good governance, development & will prove to be decisive for a prosperous, corruption- free Tripura.
— Jagat Prakash Nadda (@JPNadda) February 16, 2023
ભાજપના રાષ્ટ્રીય અધ્યક્ષ જેપી નડ્ડાએ તમામ મતદારોને લોકશાહીના આ તહેવારમાં ભાગ લેવા અને ત્રિપુરા વિધાનસભા ચૂંટણીમાં મતદાન કરવાની અપીલ કરી છે. તેમણે કહ્યું કે દરેક મત સુશાસન, વિકાસની યાત્રા ચાલુ રાખવા માટે ગણાશે અને સમૃદ્ધ, ભ્રષ્ટાચાર મુક્ત ત્રિપુરા માટે નિર્ણાયક સાબિત થશે.
ત્રિપુરા આ વર્ષે ચૂંટણી યોજનાર પ્રથમ રાજ્ય છે
ત્રિપુરા આ વર્ષે એટલે કે 2023માં ચૂંટણી યોજનાર પ્રથમ રાજ્ય છે. જ્યારે નાગાલેન્ડ અને મેઘાલય વિધાનસભા માટે 27 ફેબ્રુઆરીએ મતદાન થશે.
