વિરોધપક્ષોના INDI ગઠબંધનની આવતીકાલની બેઠક સ્થગિત, જાણો કેમ ?

• આવતીકાલે 6 ડિસેમ્બરે I.N.D.I ગઠબંધનની બેઠક થવાની હતી, જે હાલ પુરતી સ્થગિત રાખવામાં આવી છે.
• અનેક મોટા નેતાઓ બેઠકમાં આવી શકે તેમ ન હતા, જેના કારણે બેઠક સ્થગિત રાખવામાં આવી છે.
• I.N.D.I ગઠબંધનની આગામી બેઠક માટે હજુ સુધી કોઈ તારીખ આપવામાં આવી નથી.

નવી દિલ્હી, 05 ડિસેમ્બર: I.N.D.I ગઠબંધનની આવતી કાલે યોજાવા જઈ રહેલી બેઠક હાલ પુરતી સ્થગિત કરી દેવામાં આવી છે. કેટલાક મહત્વના લોકો મીટિંગમાં હાજર રહી શકે એમ ન હોવાના અહેવાલ હતા, જે બાદ હાલ માટે મીટીંગ સ્થગિત કરવાનો નિર્ણય લેવામાં આવ્યો છે. પાંચ રાજ્યોમાં યોજાયેલી વિધાનસભા ચૂંટણીની મતગણતરી રવિવાર અને સોમવારે થઈ હતી. ભાજપને પાંચમાંથી ત્રણ રાજ્યોમાં પૂર્ણ બહુમતી મળી છે. જ્યારે તેલંગાણામાં કોંગ્રેસને સંપૂર્ણ બહુમતી મળી છે, જ્યારે મિઝોરમમાં ZPMને સંપૂર્ણ બહુમતી મળી છે. રવિવારે જ કોંગ્રેસ અધ્યક્ષ મલ્લિકાર્જુન ખડગેએ તમામ 28 વિરોધ પક્ષોને બેઠક માટે બોલાવ્યા હતા. આ I.N.D.I ગઠબંધનની ચોથી મીટિંગ થવા જઈ રહી હતી જે સ્થગિત કરવામાં આવી છે.

I.N.D.I ગઠબંધનની ત્રણ બેઠકો થઈ ચૂકી છે

આ બેઠકમાં પાંચ રાજ્યોના ચૂંટણી પરિણામોની પણ સમીક્ષા થવાની હતી. આ પહેલા પણ I.N.D.I ગઠબંધનની ત્રણ બેઠકો થઈ ચૂકી છે. ઈન્ડિયા એલાયન્સની પ્રથમ બેઠક પટનામાં યોજાઈ હતી. બિહારના સીએમ નીતિશ કુમારે આ બેઠકનું નેતૃત્વ કર્યું હતું. I.N.D.I ગઠબંધનની પ્રથમ બેઠક 23 જૂને યોજાઈ હતી. આ પછી, 17-18 જુલાઈના રોજ બેંગલુરુમાં I.N.D.I ગઠબંધનની બીજી બેઠક બોલાવવામાં આવી હતી. આ બેઠકમાં I.N.D.I ગઠબંધનનું પૂર્ણ સ્વરૂપ જાહેર કરવામાં આવ્યું હતું. આ સાથે જ 31 ઓગસ્ટથી 1 સપ્ટેમ્બરની વચ્ચે I.N.D.I ગઠબંધનની ત્રીજી બેઠક મુંબઈમાં બોલાવવામાં આવી હતી. આ બેઠકમાં પાંચ રાજ્યોમાં યોજાનારી વિધાનસભાની ચૂંટણી માટે રણનીતિ તૈયાર કરવામાં આવી હતી. હવે I.N.D.I ગઠબંધનની ચોથી બેઠક આવતીકાલે એટલે કે 6 ડિસેમ્બરે મળવાની હતી, જે સ્થગિત રાખવામાં આવી છે.

આ બેઠકમાં ઘણા મોટા નેતાઓ હાજર રહી શકે એમ ન હતા

એવું પણ માનવામાં આવે છે કે આ બેઠકમાં ઘણા મોટા નેતાઓ આવવાના ન હતા, તેથી આ બેઠક સ્થગિત કરવામાં આવી છે. આ બેઠકમાં મમતા બેનર્જી, નીતીશ કુમાર અને અખિલેશ યાદવ જેવા નેતાઓ આવવાના ન હતા. એવું પણ કહેવામાં આવી રહ્યું છે કે કોંગ્રેસ દ્વારા વિધાનસભા ચૂંટણીમાં તેના ઘટક પક્ષોનો અનાદર કરવાથી પાર્ટીના કેટલાક નેતાઓ નારાજ છે. તે જ સમયે, I.N.D.I ગઠબંધનની આગામી બેઠક ક્યારે યોજાશે તે અંગે હજુ સુધી કોઈ તારીખ આપવામાં આવી નથી. આવી સ્થિતિમાં, એવું કહેવામાં આવી રહ્યું છે કે પાંચ રાજ્યોમાં મતગણતરી પછી, ગઠબંધનમાં બધું બરાબર નથી ચાલી રહ્યું અને I.N.D.I ગઠબંધનને આગામી લોકસભા ચૂંટણીમાં પણ આનું પરિણામ ભોગવવું પડી શકે છે.

આ પણ વાંચો: MP ચૂંટણી પરિણામ 2023: મધ્યપ્રદેશમાં બે નાયબ મુખ્યમંત્રી, એક આદિવાસી અને એક OBC ચહેરો હોઈ શકે