આજે વર્લ્ડ સ્માઈલ ડે :  હસતા રહો, હસાવતા રહો  

આપણે બધાને હસતા રહેવાનું પસંદ છે. આપણા જીવનનો સૌથી ખરાબ તણાવ એક સરળ સ્મિતથી દૂર કરી શકાય છે. જ્યારે આપણે કોઈ બીજા માટે હસવાનું કારણ બનીયે ત્યારે તેનાથી સારું પુણ્ય કશું નથી. આજે વિશ્વ સ્મિત દિવસ એટલે કે વર્લ્ડ સ્માઈલ ડે છે. આ દિવસ દર વર્ષે ઓક્ટોબરના પહેલા શુક્રવારે ઉજવવામાં આવે છે.

આ રીતે થઈ વર્લ્ડ સ્માઈલ ડેની શોધ

હાર્વે બોલ એક અમેરિકન કલાકાર હતા જેમણે પ્રથમ વખત વિશ્વ સ્મિત દિવસની ઉજવણીનો પ્રસ્તાવ મૂક્યો હતો. ઈ.સ. 1963માં, તેમણે આઇકોનિક સ્માઈલી ચહેરાના ચિત્રની શોધ કરી. ઈ.સ.1970માં હસતાં ચહેરાના ચિત્રનો રાજકીય રીતે ઉપયોગમાં લેવાતો હતો, તેમજ ફિલ્મો, કાર્ટૂન અને કોમિક પુસ્તકોમાં પણ તેનો ઉપયોગ કરવામાં આવ્યો. ઈ.સ.1990માં ઇન્ટરનેટના ઉદભવ સાથે આ હસતો ચહેરો લોકપ્રિય બન્યો અને આજકાલ તેનો વ્યાપકપણે ઉપયોગ થાય છે.

હાર્વેએ સમય જતાં શોધ્યું કે વધતાં વ્યાપારીકરણને કારણે સ્માઈલી ચહેરાના પ્રતીકનું મૂળ મહત્વ જતું રહ્યું છે. તેમની ચિંતાના પરિણામે, તેમણે વિશ્વ સ્મિત દિવસનો ખ્યાલ ઘડી કાઢ્યો. ત્યારબાદ ઈ.સ.1999થી, ઓક્ટોબરના પ્રથમ શુક્રવારને વિશ્વ સ્મિત દિવસ તરીકે નિયુક્ત કરવામાં આવે છે. 2001માં તેમના મૃત્યુ પછી, હાર્વે બોલ વર્લ્ડ સ્માઇલ ફાઉન્ડેશનની સ્થાપના તેમના નામ અને યાદોને સન્માન કરવા માટે કરવામાં આવી હતી.

આ પણ વાંચો : World Animal Welfare Day : જાણો શા માટે છે જરુરી પશુઓનું કલ્યાણ ?

કેવી રીતે કરવામાં આવે છે વર્લ્ડ સ્માઈલ ડેની ઉજવણી

વિશ્વભરના લોકો વર્લ્ડ સ્માઈલ ડેની ઉજવણી અનન્ય અને કાલ્પનિક રીતે કરે છે. મોટેભાગે આ દિવસની ઉજવણી વિદેશોમાં વધારે કરવામાં આવે છે. યુનાઇટેડ સ્ટેટ્સના મેસેચ્યુસેટ્સમાં આવેલી વર્સેસ્ટર હિસ્ટોરિકલ સોસાયટી સન્ 2000થી આ દિવસની ઉજવણી સ્માઈલીવાળા બોલ ફેંકીને કરી રહી છે. આ બોલ હાર્વે બોલ સ્માઇલ એવોર્ડ અને સ્માઇલી-ફેસ થીમ આધારિત ઇવેન્ટ્સ અને ડિસ્પ્લેનું આયોજન કરે છે.

આ દિવસે હોટ એર બલૂન સ્પર્ધાઓ પણ યોજવામાં આવે છે, જેમાં વર્લ્ડ સ્માઈલ ડેના મેસેજને વહન કરતા ફુગ્ગાઓ લોન્ચ કરવામાં આવે છે. આ સિવાય વર્લ્ડ સ્માઈલ ડેના દિવસે અન્ય મનોરંજક પ્રવૃત્તિઓ અને સ્પર્ધાઓ જેમ કે કોરલ પ્રેઝન્ટેશન, ‘વ્હેર ઈઝ ધ સ્માઈલી?’ સ્પર્ધા, પાઈ ખાવાની સ્પર્ધા અને સર્કસ પર્ફોર્મન્સનું પણ વિવિધ દેશોમાં આયોજન કરવામાં આવે છે. ઘણી સંસ્થાઓ આ દિવસે જરૂરિયાતમંદોને મફત ભોજનનું વિતરણ પણ કરે છે. ઉપરાંત, દર્દીઓ અને વૃદ્ધોના ચહેરા પર સ્મિત લાવવા માટે હોસ્પિટલો અને કેર હોમ્સમાં પણ વિવિધ કાર્યક્રમોનું આયોજન કરવામાં આવે છે.

સ્માઈલની કોઈ સીમા નથી

આ દિવસ તમામ લોકોને સમર્પિત છે,  જેમાં વ્યક્તિઓને દયાળુ વર્તન કરવા અને અન્યને સ્મિત કરવા માટે પ્રોત્સાહિત કરવામાં આવે છે. આ દિવસની થીમ એ છે કે સ્મિત કોઈ પણ રાજકીય, ભૌગોલિક અથવા સાંસ્કૃતિક સીમાઓને ઓળખતું નથી.