ખેડા જિલ્લામાં ત્રણ સ્થળે સર્જાયેલા અકસ્માતમાં 3 લોકોના મૃત્યુ

• બે મોટરસાયકલ ચાલક તેમજ એક ટ્રક ચાલકનું ગંભીર ઈજા થતાં મોત
• પાછળથી પુર ઝડપે આવેલી આઇસરનો ચાલક ટક્કર મારી નાસી ગયો
• પોલીસે ગુનો નોંધી કાયદેસર કાર્યવાહી હાથ ધરી હતી

ખેડા જિલ્લામાં વિવિધ ત્રણ સ્થળે સર્જાયેલા અકસ્માતમાં 3 લોકોના મૃત્યુ થયા છે. જેમાં બનાવમાં બે મોટરસાયકલ ચાલક તેમજ એક ટ્રક ચાલકનું ગંભીર ઈજા થતાં મોત નિપજ્યું હતું. આ બનાવ અંગે જે તે પોલીસે ગુનો નોંધી કાયદેસર કાર્યવાહી હાથ ધરી હતી.

હાઈવે પર જતા અમદાવાદ તરફથી આવેલી ગાડીએ ટક્કર મારી હતી

ઉલ્લેખનીય છે કે માતર તાલુકાના રતનપુરમાં રહેતા શબ્બીર ખાન મહંમદખાન પઠાણ તથા હબીબ મિયા એમદ મિયા કુરેશી મોટરસાયકલ લઈને માતર દરગાહ પર છઠ્ઠીમાં હાજરી આપવા ગયા હતા. જ્યાંથી પરત ફરતા માતર પરિશ્રમ ફાર્મ નજીક કટ ઉપરથી હાઈવે પર જતા અમદાવાદ તરફથી આવેલી ગાડીએ ટક્કર મારી હતી. અકસ્માતમાં હબીબભાઈ એમદભાઈ કુરેશીને માથામાં તેમજ શરીર ઉપર ગંભીર ઈજા થતા ખેડા સિવિલ હોસ્પિટલમાં લઈ જવાયો હતો. જ્યાં મેડિકલ ઓફિસરે હબીબ મિયાં કુરેશીને મૃત જાહેર કર્યા હતા.

પાછળથી પુર ઝડપે આવેલી આઇસરનો ચાલક ટક્કર મારી નાસી ગયો

બીજા અકસ્માતના બનાવમાં રખિયાલ અમદાવાદમાં રહેતા ભુપેન્દ્રભાઇ ભગવાનભાઇ પટેલ આઇસર લઈ અંકલેશ્વર ગયા હતા. તેઓ અંકલેશ્વરથી રાત્રે પ્લાસ્ટિકનો ભંગાર ભરી પરત આવતા હતા. ત્યારે અમદાવાદ વડોદરા એક્સપ્રેસ હાઈવે પર અરેરા સીમ નજીક ટ્રક ચાલક ટ્રક સાઈડ પર ઉભી રાખી ઉતરીને લઘુ શંકા કરતા હતા. ત્યારે પાછળથી પુર ઝડપે આવેલી આઇસરનો ચાલક ટક્કર મારી નાસી ગયો હતો. જેથી ભુપેન્દ્રભાઈ ભગવાનભાઇ પટેલનું ઘટના સ્થળે જ મોત થયું હતું.

નડિયાદ હેલિપેડ પાસે પાર્થ પાર્ટી પ્લોટ નજીક ગાડીએ મોટરસાયકલને ટક્કર મારી

ત્રીજા બનાવમાં ઉમરેઠ તાલુકાના હેમરાજપુરામાં રહેતા મહેશભાઈ જુવાનસિંહ ચૌહાણના કાકાનો દીકરો કિરીટભાઈ ખાચરભાઈ ચૌહાણ અંકિતને સાથે લઈ મોટરસાયકલ પર સાસરી દસક્રોઈ તાલુકાના ઉંદરેલ જઈ રહ્યો હતો. ત્યારે નડિયાદ હેલિપેડ પાસે પાર્થ પાર્ટી પ્લોટ નજીક ગાડીએ મોટરસાયકલને ટક્કર મારતા બાઈક સવાર બંનેને ઈજા થતા સારવાર માટે ખસેડાયા હતા. વધુ સારવાર માટે અમદાવાદ ખસેડાયેલા કિરીટભાઈ ચૌહાણનું મોત થયું હતું.

આ પણ વાંચો: જૂનાગઢ-અમરેલી પરિક્રમા મેળા સ્પેશિયલ ટ્રેન ચલાવવાનો નિર્ણય લેવામાં આવ્યો