ચીનમાં કોરોના બાદ નવી મહામારીનો ખતરો, બાળકોમાં લક્ષણો દેખાતાં સ્કૂલો બંધ કરવાની તૈયારી

• ચીનના વુહાનથી કોરોના શરૂ થયો અને દુનિયામાં વકર્યો હતો
• બાળકોમાં ઉધરસ, ફ્લૂ અને શ્વાસ લેવામાં તકલીફ જેવી સમસ્યાઓ
• નવાઈની વાત એ છે કે તેની શરૂઆત પણ ચીનથી થઈ છે.

ચીન: કોરોનાનો કહેર જોયા બાદ હવે લોકો રોગચાળાનું નામ લેતા પણ ડરવા લાગ્યા છે. આવા સમયે ફરી એક નવી મહામારીનો ખતરો તોળાઈ રહ્યો છે. કોવિડ-19ની જેમ આ રોગનો ફેલાવો પણ ચીનથી શરૂ થઈ રહ્યો છે. ચીનની ઘણી હોસ્પિટલોમાં આ રહસ્યમય રોગના દર્દીઓ જોવા મળ્યા છે, જેમની સંખ્યા ઝડપથી વધી રહી છે. આ અંગેના અહેવાલો બાદ વર્લ્ડ હેલ્થ ઓર્ગેનાઈઝેશન (WHO)ની ચિંતા પણ વધી ગઈ છે. આ રોગ ખાસ કરીને શાળાના બાળકોમાં જોવા મળે છે.

ચીન સહિત વિશ્વના ઘણા દેશોમાં હજુ પણ કોરોના સંપૂર્ણ રીતે નાબૂદ થયો નથી. આવી સ્થિતિમાં હવે લોકોને એ સમય યાદ આવવા લાગ્યો છે જ્યારે કોરોના પ્રારંભિક તબક્કામાં હતો. જો કે આ રોગચાળો ન્યુમોનિયા જેવો જ હોવાનું કહેવાય છે પરંતુ તેના ઘણા લક્ષણો ન્યુમોનિયાથી અલગ છે. તેનાથી પ્રભાવિત બાળકોના ફેફસામાં સોજો જોવા મળી રહ્યો છે. તેમજ તાવની સાથે તેઓ ઉધરસ, ફ્લૂ અને શ્વાસ લેવામાં તકલીફ જેવી સમસ્યાઓનો પણ સામનો કરી રહ્યા છે.

ચીનમાં સૌથી વધુ અસર બાળકો પર જ જોવા મળે છે.

રહસ્યમય ન્યુમોનિયા સાથે સંકળાયેલા મોટાભાગના દર્દીઓ ઉત્તર-પૂર્વ ચીન, બેઇજિંગ અને લિયાઓનિંગની હોસ્પિટલોમાં જોવા મળી રહ્યા છે. સ્થિતિ એટલી ખરાબ છે કે સંસાધનો પર ઘણું દબાણ છે. આ રોગનો પ્રકોપ એટલો ગંભીર છે કે સરકારે અહીંની શાળાઓ બંધ કરવાની તૈયારી કરી લીધી છે. પ્રોમેડ એલર્ટ, ઓપન-એક્સેસ મોનિટરિંગ સિસ્ટમે રોગ વિશે વિશ્વવ્યાપી ચેતવણી જાહેર કરી છે. આ પ્લેટફોર્મ સમગ્ર વિશ્વમાં મનુષ્યો અને પ્રાણીઓમાં થતી બીમારીઓ પર નજર રાખે છે. ચીનમાં જોવા મળેલા રહસ્યમય ન્યુમોનિયા વિશે ચેતવણી આપતા આ સંગઠને કહ્યું છે કે, આ રોગનો પ્રકોપ ખાસ કરીને બાળકોમાં જોવા મળી રહ્યો છે.

આ એજન્સીએ પોતે જ કોવિડ એલર્ટ જાહેર કર્યું હતું

પ્રોમેડ એલર્ટે ડિસેમ્બર 2019 ના અંતમાં એક નવા વાયરસ વિશે પ્રારંભિક ચેતવણી જારી કરી હતી, જેને પાછળથી SARS કોવિડ-2 તરીકે ઓળખવામાં આવ્યો હતો. સંસ્થાના એલર્ટને કારણે વિશ્વ આરોગ્ય સંસ્થાના ઉચ્ચ અધિકારીઓ અને તબીબી વ્યાવસાયિકો તેમજ વૈજ્ઞાનિકોના મોટા જૂથને એલર્ટ કરવામાં આવ્યા હતા. પ્રોમેડ એલર્ટે કહ્યું કે, તેઓએ એક અજાણી બીમારી વિશે એલર્ટ જારી કર્યું છે, જે ખાસ કરીને શ્વસન કાર્યને અસર કરે છે. જો કે પ્રોમેડ એલર્ટે એમ પણ કહ્યું છે કે, આ બિમારી ક્યારે શરૂ થઈ તે સ્પષ્ટ નથી. આટલા બધા બાળકોને એકસાથે આટલી ઝડપથી અસર થઈ શકે નહીં.

WHOએ નિવેદન જારી કર્યું, કહી આ વાત

આ રોગના ચોંકાવનારા અહેવાલો મળ્યા બાદ વર્લ્ડ હેલ્થ ઓર્ગેનાઈઝેશન (WHO) એ ચીનને વિગતવાર માહિતી આપવા વિનંતી કરી છે. WHOએ પ્રેસ કોન્ફરન્સમાં કહ્યું કે ચીને 13 નવેમ્બર 2023ના રોજ સ્થાનિક મીડિયાને આ રોગ વિશે જણાવ્યું હતું. આરોગ્ય એજન્સીએ ચીનને આ રોગથી સંબંધિત મામલા પર નજીકથી નજર રાખવા કહ્યું છે. WHOએ કહ્યું છે કે, 21 નવેમ્બરના રોજ પ્રોમેડે ઉત્તર ચીનમાં આ રોગ ફેલાતો હોવાની જાણ કરી હતી. WHO ચીન પાસેથી આ રોગ વિશે વધુ માહિતી માંગે છે.

આ પણ વાંચો, પંજાબના ગુરુદ્વારામાં નિહંગોના ગોળીબારમાં એક પોલીસકર્મીનું મૃત્યુ, 2 જવાન ઘાયલ