આ સમગ્ર કલ્યાણ માટેની ચૂંટણી, ભાજપ તેના માટે પ્રતિબદ્ધ: હરિયાણા ચૂંટણી પર ગડકરી

• હરિયાણા વિધાનસભા ચૂંટણીના મતદાનને હવે ગણતરીના દિવસો જ બાકી 

હરિયાણા, 26 સપ્ટેમ્બર: હરિયાણા વિધાનસભા ચૂંટણીના મતદાનને હવે ગણતરીના દિવસો જ બાકી રહ્યા છે. તે પહેલા થાનેસર (કુરુક્ષેત્ર) વિધાનસભા બેઠક પરથી ભાજપના ઉમેદવાર સુભાષ સુધાની તરફેણમાં ચૂંટણી રેલીને સંબોધતા કેન્દ્રીય મંત્રી નીતિન ગડકરીએ કહ્યું કે, “હરિયાણામાં 5 ઓક્ટોબરે યોજાનારી વિધાનસભાની ચૂંટણી માત્ર ભાજપ અને કોંગ્રેસ વચ્ચેની હરીફાઈ નથી, પરંતુ તે હરિયાણાના લોકોના સર્વાંગી કલ્યાણ માટે છે અને તેમની પાર્ટી તેના માટે પ્રતિબદ્ધ છે.” ભાજપની આગેવાની હેઠળની સરકારમાં છેલ્લા 10 વર્ષમાં દેશ અને હરિયાણામાં થયેલા વિકાસ કાર્યોને જોતા કેન્દ્રીય માર્ગ પરિવહન અને રાજમાર્ગ મંત્રીએ કહ્યું કે, આ શક્ય બન્યું કારણ કે યોગ્ય સરકાર આવી અને યોગ્ય નીતિ બનાવવામાં આવી.

હરિયાણા અને પંજાબને અનાજના ભંડાર ગણાવતા ગડકરીએ કહ્યું કે, મહેનતુ ખેડૂતો અહીં એક એકરમાં જેટલું અનાજ ઉત્પન્ન કરે છે તે દેશના અન્ય કોઈ ખૂણે શક્ય નથી. આવી સ્થિતિમાં કેન્દ્ર સરકાર ખેડૂતોની સમૃદ્ધિ માટે એક મોટી યોજના પર કામ કરી રહી છે. આ સાથે, ખેડૂત હવે માત્ર અન્ન પ્રદાતા જ નહીં પરંતુ ઉર્જા પ્રદાતા પણ બનશે.

ખેડૂતોને પરાળ ન બાળવા અપીલ

નીતિન ગડકરીએ કહ્યું કે, જ્યારે તેઓ અહીં આવી રહ્યા હતા, ત્યારે તેમણે કેટલીક જગ્યાએ પરાળ સળગતા જોયા હતા. તેમણે કહ્યું કે, “હું ખેડૂતોને અપીલ કરીશ કે, તેઓ પરાળ ન બાળે. હવે નવી ટેક્નોલોજી આવી ગઈ છે. આપણા દેશમાં પરાળમાંથી બાયો-સીએનજી અને બાયો-એલએનજી તૈયાર કરવા માટે લગભગ 400 પ્લાન્ટ પ્રક્રિયા હેઠળ છે અને પંજાબ, હરિયાણા , પશ્ચિમ ઉત્તર પ્રદેશ, કર્ણાટક અને મહારાષ્ટ્રમાં 60 પ્લાન્ટ શરૂ કરવામાં આવ્યા છે. આ ઈંધણથી સ્કૂટર, કાર અને ટ્રક જેવા વાહનો ચલાવી શકાય છે.”

“હરિયાણાને દરેક જગ્યાએ હાઇવે અને એક્સપ્રેસ વે દ્વારા જોડવામાં આવી રહ્યું છે.”

ગડકરીએ કહ્યું કે, “છેલ્લા 10 વર્ષમાં દેશ બદલાઈ રહ્યો છે. કેટલીક જગ્યાએ એક્સપ્રેસ વે બનાવવામાં આવી રહ્યા છે, તો કેટલીક જગ્યાએ રોપ-વે. કાશ્મીરથી કન્યાકુમારી સુધીના આ એક્સપ્રેસ વેને કારણે ભારતમાં પરિવહનની સરળતા વધી છે.” તેમણે કહ્યું કે, “હરિયાણાને દરેક જગ્યાએ હાઈવે અને એક્સપ્રેસ વે દ્વારા જોડવામાં આવી રહ્યું છે. હવે અહીંથી થોડા કલાકોમાં દિલ્હી અને મુંબઈ જવાનું સરળ બની ગયું છે.” કુરુક્ષેત્ર સાથેના તેમના જોડાણને યાદ કરતા ગડકરીએ કહ્યું કે, “ઘણા વર્ષો પહેલા પાર્ટીએ તેમને હરિયાણાની જવાબદારી સોંપી હતી અને તેઓ કુરુક્ષેત્ર, યમુનાનગરમાં ઘણા મહિનાઓ સુધી રહ્યા હતા.”

આ પણ જૂઓ: PM મોદી ચેસ ઓલિમ્પિયાડ વિજેતાઓને મળ્યા, જૂઓ આ ખાસ વીડિયો