આ દેશ મહિલાઓ સાથે સૌથી ખરાબ વ્યવહાર કરે છે, UNએ રિપોર્ટ કર્યો જાહેર

દુનિયાભરમાંથી મહિલાઓ સાથે ભેદભાવ અને હિંસાના સમાચારો આવતા રહે છે, પરંતુ અફઘાનિસ્તાન પર તાલિબાનોના કબજા બાદ આ દેશ મહિલાઓ માટે અત્યંત જોખમી બની ગયો છે. બુધવારે, આંતરરાષ્ટ્રીય મહિલા દિવસના અવસર પર સંયુક્ત રાષ્ટ્ર (યુએન) એ પણ આ હકીકતનો સ્વીકાર કર્યો. સંયુક્ત રાષ્ટ્રએ બુધવારે કહ્યું કે તાલિબાનના કબજા બાદ અફઘાનિસ્તાનની મહિલાઓને તેમના મૂળભૂત અધિકારો પણ નથી મળી રહ્યા. અફઘાનિસ્તાન મહિલાઓ અને છોકરીઓ માટે વિશ્વનો સૌથી જુલમી દેશ બની ગયો છે. યુએનએ આ અંગે એક રિપોર્ટ જાહેર કર્યો છે.

આંતરરાષ્ટ્રીય મહિલા દિવસ પર જાહેર કરાયેલા એક નિવેદનમાં યુએન મિશનએ કહ્યું કે અફઘાનિસ્તાનમાં નવા શાસનથી મહિલા વિરોધી કાયદા અમલમાં આવ્યા છે. જેના કારણે ત્યાંની મહિલાઓને તેમના ઘરમાં કેદ રહેવાની ફરજ પડી છે. ઓગસ્ટ 2021 માં સત્તા પર કબજો કર્યા પછી, તાલિબાને મહિલાઓ પાસેથી તેમના અધિકારો છીનવી લેવાનું કામ કર્યું છે. નોંધપાત્ર રીતે, બે દાયકાના યુદ્ધ પછી યુએસ અને નાટો દળો અફઘાનિસ્તાનમાંથી પાછા ફર્યા અને દેશ પર તાલિબાનો દ્વારા ફરીથી કબજો કરવામાં આવ્યો.

તાલિબાન પોતાના વચનથી ફરી ગયું

સંયુક્ત રાષ્ટ્રના નિવેદન અનુસાર, ઓગસ્ટ 2021માં અફઘાનિસ્તાનની સત્તા સંભાળ્યા બાદ તાલિબાને મધ્યમ વલણ અપનાવવાનું વચન આપ્યું હતું, પરંતુ તેમ છતાં તેણે કડક નિયમો લાગુ કર્યા છે. યુએન સેક્રેટરી-જનરલના વિશેષ પ્રતિનિધિ અને અફઘાનિસ્તાનમાં મિશનના વડા, રોઝા ઓતુનબાયેવાએ કહ્યું કે અફઘાન મહિલાઓ અને છોકરીઓ પરના પ્રતિબંધો જોઈને દુઃખ થાય છે. હાલમાં તાલિબાનમાં મહિલાઓને લગતા ઘણા કાયદા લાગુ કરવામાં આવ્યા છે, જેનો વિરોધ પણ જોવા મળ્યો હતો.

તાલિબાને તેની સ્પષ્ટતા કરી છે

યુનિવર્સિટીઓમાં મહિલા શિક્ષણ પર પ્રતિબંધને લઈને તાલિબાન સરકારે તેની સ્પષ્ટતામાં કહ્યું કે જે વિષયો ભણાવવામાં આવી રહ્યા છે તેમાંથી કેટલાક અફઘાન અને ઈસ્લામિક મૂલ્યો અનુસાર નથી. જો કે, આંતરરાષ્ટ્રીય નિંદા છતાં તાલિબાને તેના કડક વલણથી પીછેહઠ કરવાનો કોઈ સંકેત દર્શાવ્યો નથી.

આ પણ વાંચો : ઓસ્ટ્રેલિયાના વડાપ્રધાને ભારતમાં રમી હોળી, પરંપરાગત ડાન્સનો પણ આનંદ માણ્યો, જુઓ તસવીરો