હરિયાણામાં ભાજપના આ નેતાએ મુખ્યમંત્રી પદ ઉપર કર્યો દાવો, કહ્યું’ ક્યારેય કંઈ નથી માંગ્યું’

નવી દિલ્હી, 15 સપ્ટેમ્બર : ભારતીય જનતા પાર્ટી (BJP)ના વરિષ્ઠ નેતા અનિલ વિજે રવિવારે હરિયાણા વિધાનસભા ચૂંટણી પહેલા મુખ્યમંત્રી પદ માટે દાવો રજૂ કર્યો છે. પોતાની વરિષ્ઠતા દર્શાવતા અનિલ વિજે પાર્ટી પાસેથી સીએમ પદની માંગ કરી હતી. અનિલ વિજે કહ્યું કે હું હરિયાણામાં ભાજપનો સૌથી વરિષ્ઠ ધારાસભ્ય છું. હું છ વખત ચૂંટણી લડ્યો છું. મેં પાર્ટી પાસેથી ક્યારેય કંઈ માંગ્યું નથી. પરંતુ લોકોની માંગ પર આ વખતે હું મારી સિનિયોરિટીના આધારે સીએમ પદ માટે દાવો કરીશ.

હું હરિયાણાનું ચિત્ર બદલીશ

અનિલ બિજે કહ્યું કે હું જ્યાં પણ ગયો છું ત્યાં બધા મને કહે છે કે તમે સિનિયર મોસ્ટ છો તો તમે સીએમ કેમ ન બન્યા?  આવી સ્થિતિમાં લોકોની માંગ પર આ વખતે હું મારી સિનિયોરિટીના આધારે મુખ્યમંત્રી બનવાનો દાવો કરીશ.  જો સરકાર બનશે અને પાર્ટી મને સીએમ પદ આપશે તો હું હરિયાણાનું ભાગ્ય અને ચિત્ર બંને બદલી નાખીશ.

અનિલ વિજ અંબાલા કેન્ટ ઉપરથી ઉમેદવાર

જો કે, વિજે કહ્યું કે આ નિર્ણય ‘હાઈ કમાન્ડ’ના હાથમાં છે.  તેમણે કહ્યું કે તેઓ મને સીએમ બનાવવા માંગે છે કે નહીં, તે હાઈકમાન્ડના હાથમાં છે. ઉલ્લેખનીય છે કે અનિલ વિજ અંબાલા કેન્ટ વિધાનસભા સીટથી ભાજપના ઉમેદવાર છે.  તેઓ મનોહર લાલ ખટ્ટર સરકાર દરમિયાન હરિયાણાના ગૃહ પ્રધાન હતા અને તાજેતરના ફેરબદલ જેમાં નાયબ સિંહ સૈનીએ મુખ્યમંત્રી તરીકે શપથ લીધા ત્યારે તેમને કેબિનેટમાંથી કાઢી મૂકવામાં આવ્યા હતા. આ પહેલા વિજે કેબિનેટમાંથી બહાર થવા પર નારાજગી વ્યક્ત કરી હતી અને કહ્યું હતું કે કેટલાક લોકોએ તેમને તેમની પાર્ટીમાં ‘અજાણી’ બનાવી દીધા છે. મહત્વનું છે કે હરિયાણામાં 5 ઓક્ટોબરે વિધાનસભા ચૂંટણી યોજાવાની છે.