યુટિલીટી ડેસ્કઃ જુલાઈ મહિનો લગભગ પૂરો થવા આવ્યો છે. આવતીકાલથી ઓગસ્ટ મહિનો શરૂ થશે. દર મહિનાની જેમ આ વખતે પણ આવતા મહિનાથી ઘણા મહત્વપૂર્ણ ફેરફારો થવાના છે. આ એવા ફેરફારો છે જેની સીધી અસર તમારા ખિસ્સા પર પડશે. આ ફેરફારોમાં ગેસની કિંમત (LPG કિંમત), બેંકિંગ સિસ્ટમ, ITR, PM કિસાન સન્માન નિધિ (PM કિસાન), PM ફસલ બીમા યોજનામાં અપડેટ્સનો સમાવેશ થાય છે. તો ચાલો જાણીએ 1 ઓગસ્ટથી કયા નિયમો બદલાઈ રહ્યા છે.
બેંક ઓફ બરોડાએ ચેક દ્વારા ચુકવણી માટેના નિયમોમાં ફેરફાર કર્યો
જો તમારું બેંક ઓફ બરોડા (BoB) માં ખાતું છે, તો નોંધી લો કે 1 ઓગસ્ટથી બેંક ઓફ બરોડામાં ચેક દ્વારા ચૂકવણી કરવાના નિયમો બદલાશે. આરબીઆઈએ બેંક ઓફ બરોડાને ગાઈડલાઈન જારી કરી હતી. માર્ગદર્શિકા મુજબ રૂ. 5 લાખ કે તેથી વધુ રકમના ચેક માટે પોઝિટિવ પે સિસ્ટમ લાગુ કરવામાં આવી છે. આ અંતર્ગત બેંકે એસએમએસ, નેટ બેંકિંગ અથવા મોબાઈલ એપ દ્વારા ચેકથી સંબંધિત માહિતી આપવાની રહેશે.
PM કિસાન માટે KYC નિયમ બદલાશે
તમને PM કિસાન સન્માન નિધિ યોજનાના KYC માટે 31 જુલાઈનો સમય પણ આપવામાં આવ્યો છે. 1 ઓગસ્ટથી ખેડૂતો KYC કરી શકશે નહીં. ખેડૂતો તેમના નજીકના કોમન સર્વિસ સેન્ટર (CSC)ની મુલાકાત લઈને પણ તેમનું e-kyc કરાવી શકે છે. આ સિવાય PM કિસાનની સત્તાવાર વેબસાઇટ દ્વારા ઘરે બેઠાં EKYC ઓનલાઈન કરી શકાય છે. ઉલ્લેખનીય છે કે, ખેડૂતોની સુવિધા માટે કેન્દ્ર સરકાર દ્વારા ઈ-કેવાયસીની છેલ્લી તારીખ લંબાવવાની જાહેરાત કરવામાં આવી હતી. ઈ-કેવાયસી માટેની છેલ્લી તારીખ લંબાવીને 31 જુલાઈ કરવામાં આવી છે. અગાઉ ઈ-કેવાયસી કરાવવાની છેલ્લી તારીખ 31 મે હતી.
પ્રધાનમંત્રી પાક વીમા યોજના માટે રજિસ્ટ્રેશન કરાવવું પડશે
પ્રધાનમંત્રી પાક વીમા યોજના માટે રજિસ્ટ્રેશન કરાવવાનું રહેશે. રજિસ્ટ્રેશનની છેલ્લી તારીખ 31મી જુલાઈ છે. તે પછી કોઈ નોંધણી થશે નહીં અને તમે આ યોજનાથી વંચિત રહી શકો છો. તમને જણાવી દઈએ કે, આ રજિસ્ટ્રેશન ઓનલાઈન અથવા ઓફલાઈન થઈ શકે છે.
LPGની કિંમતો બદલાઈ શકે છે
તમને જણાવી દઈએ કે LPG ની કિંમતો દર મહિનાની 1 તારીખે બદલાય છે. આવી સ્થિતિમાં આ વખતે પણ 1 ઓગસ્ટથી ગેસ સિલિન્ડરની કિંમતમાં ફેરફાર થવાની સંભાવના છે. આ વખતે કંપનીઓ ઘરેલું અને કોમર્શિયલ બંને ગેસ સિલિન્ડરની કિંમતમાં ફેરફાર કરી શકે છે. તમને જણાવી દઈએ કે, ગત વખતે કોમર્શિયલ ગેસ સિલિન્ડર સસ્તું થયું હતું. જ્યારે ઘરેલું ગેસ સિલિન્ડરમાં 50 રૂપિયાનો વધારો કરવામાં આવ્યો હતો.
1 ઓગસ્ટથી દંડ ભરવો પડશે
31 જુલાઈ પછી ITR ફાઈલ કરવા માટે લેટ ફી ચૂકવવી પડશે. જો આવકવેરા દાતાની કરપાત્ર આવક 5 લાખ રૂપિયા અથવા તેનાથી ઓછી છે, તો તેણે લેટ ફી તરીકે 1,000 રૂપિયા ચૂકવવા પડશે. જો કરદાતાની કરપાત્ર આવક 5 લાખ રૂપિયાથી વધુ હોય તો તેણે 5000 રૂપિયાની લેટ ફી ચૂકવવી પડશે.
