નવી દિલ્હી, 21 મે : જમ્મુ કાશ્મીરમાંથી બંધારણની કલમ 370 નાબૂદ કરવાના તેના ચુકાદાની સમીક્ષાની માંગ કરતી અરજીઓને સુપ્રીમ કોર્ટે ફગાવી દીધી છે અને કેન્દ્ર સરકારના 2019 ના નિર્ણયની માન્યતાને સમર્થન આપ્યું હતું. ઉલ્લેખનીય છે કે, કલમ 370એ જમ્મુ-કાશ્મીરને વિશેષ દરજ્જો આપ્યો હતો.
સુપ્રીમ કોર્ટે આ નિર્ણય સંભળાવ્યો હતો
મહત્વનું છે કે સુપ્રીમ કોર્ટે બંધારણમાં જમ્મુ-કાશ્મીર સાથે સંબંધિત કલમ 370ને લઈને પોતાનો ચુકાદો આપ્યો હતો. પોતાના નિર્ણયમાં સર્વોચ્ચ અદાલતે કેન્દ્ર સરકારના નિર્ણયને યથાવત રાખ્યો હતો અને બંધારણની કલમ 370 હટાવવાના નિર્ણયને માન્ય ગણાવ્યો હતો. અગાઉ, 5 ઓગસ્ટ, 2019 ના રોજ, કેન્દ્ર સરકારે જમ્મુ અને કાશ્મીર સંબંધિત બંધારણની કલમ 370 ને તટસ્થ કરી દીધી હતી. આ નિર્ણય સામે 23 અરજીઓ દાખલ કરવામાં આવી હતી. જેના પર સુપ્રીમ કોર્ટમાં 16 દિવસ સુધી સુનાવણી ચાલી અને 5 સપ્ટેમ્બર 2023ના રોજ સુનાવણી પૂર્ણ કર્યા બાદ સુપ્રીમ કોર્ટે પોતાનો નિર્ણય સુરક્ષિત રાખ્યો હતો.
2019 ના બિલ સંસદમાં રજૂ કરવામાં આવ્યું હતું
કેન્દ્ર સરકાર વતી, ગૃહ પ્રધાન અમિત શાહે 5 ઓગસ્ટ 2019 ના રોજ રાજ્યસભામાં જમ્મુ અને કાશ્મીર પુનર્ગઠન અધિનિયમ બિલ રજૂ કર્યું હતું. જેમાં જમ્મુ અને કાશ્મીરને બે કેન્દ્રશાસિત પ્રદેશો જમ્મુ કાશ્મીર અને લદ્દાખમાં વિભાજિત કરવામાં આવ્યું હતું. તે જ દિવસે રાજ્યસભામાં પસાર કરવામાં આવ્યું હતું. 6 ઓગસ્ટ 2019 ના રોજ, આ બિલ લોકસભામાં રજૂ કરવામાં આવ્યું હતું અને તે જ દિવસે તે પસાર થયું હતું. તેને 9 ઓગસ્ટ 2019 ના રોજ રાષ્ટ્રપતિની મંજૂરી મળી, ત્યારબાદ જમ્મુ અને કાશ્મીરનો વિશેષ દરજ્જો દૂર કરવામાં આવ્યો હતો.
