રાજકોટમાં લુખ્ખા તત્વો બેફામ, ખાખી વર્દીનો કોઈ ખૌફ નથી; એક શોરૂમમાં તોડફોડ કરતાં બે શખ્સો CCTVમાં કેદ

રાજકોટઃ જાણે કે લુખ્ખાઓને પોલીસનો કોઈ ખૌફ જ નથી તેવું લાગી રહ્યું છે. રાજકોટમાં રોજ લુખ્ખાગીરીના વીડિયો સામે આવી રહ્યા છે. શહેરના પોશ વિસ્તાર ગણાતા એવા ટાગોર રોડ પર જનરેટરના શો રૂમમાં બે જેટલા અજાણ્યાં વ્યક્તિઓ દ્વારા માથાકૂટ કરવામાં આવી હતી, જે બાદ ભારે તોડફોડ પણ કરવામાં આવી હતી. આ સમગ્ર ઘટના CCTVમાં કેદ થતા પોલીસે વધુ તપાસ હાથ ધરી છે. રાજકોટ શહેરમાં કેટલા સમયથી લુખ્ખાગીરીના વીડિયો વાયરલ થઈ રહ્યા છે. દિવસેને દિવસે શહેરમાં લુખ્ખાતત્વોનો આતંક વધતો જાય છે.

મળતી વિગતો અનુસાર શહેરના ટાગોર રોડ પર આવેલ પાવર હાઉસ નામના જનરેટર શો રૂમમાં તોડફોડ કરવામાં આવી હતી. બે શખ્સોએ જનરેટર બદલાવવા માથાકૂટ કર્યાં બાદ તોડફોડ કરી હતી. તોડફોડની સમગ્ર ઘટના CCTVમાં કેદ થઈ હતી. પોલીસ દ્વારા CCTVના આધારે વધુ તપાસ હાથ ધરી છે.

ઉલ્લેખનિય છે કે છેલ્લા અઠવાડિયાથી રાજકોટમાં અનેક વીડિયો વાયરલ થઈ રહ્યા છે, ક્યાંક વિદ્યાર્થી તોડફોડ કરી રહ્યા છે તો ક્યાંક દારૂ પીને રસ્તા પર લુખ્ખાગીરી જોવા મળી રહી છે.