પાકિસ્તાનના પૂર્વ PM ઈમરાનના ઘરને પોલીસે ઘેરી લીધું, કહ્યું- 40 આતંકીઓને આશ્રય આપ્યો
પાકિસ્તાનથી મોટા સમાચાર આવ્યા છે. પોલીસ ટીમે પૂર્વ પીએમ ઈમરાન ખાનના ઘરની ઘેરાબંધી કરી છે. ઈમરાન પર આતંકવાદીઓને આશ્રય આપવાનો આરોપ છે
ઈમરાનના ઘરને પોલીસે ઘેર્યું
પોલીસ ટીમોએ પાકિસ્તાનના પૂર્વ વડાપ્રધાન અને પાકિસ્તાન તહરીક-એ-ઈન્સાફ (પીટીઆઈ)ના વડા ઈમરાન ખાનના ઘરને ઘેરી લીધું છે. પોલીસ અધિકારીઓના જણાવ્યા અનુસાર, તેમને ઈમરાનના ઘરમાં 30 થી 40 આતંકવાદીઓ છુપાયા હોવાની માહિતી મળી હતી. જે બાદ ઇમરાનના ઘરે જમાન પાર્કમાં સૈન્ય ઓપરેશનની તૈયારીઓ શરૂ કરી દેવામાં આવી છે.
પોલીસે આતંકીઓને 24 અલ્ટીમેટમ આપ્યું
મીડિયા અહેવાલો અનુસાર, પાકિસ્તાની પોલીસ અને ગુપ્તચર એજન્સીઓને બુધવારે (17 મે) બપોરે ઈનપુટ મળ્યા હતા કે પેશાવર કોપ્સ કમાન્ડરના ઘર પર હુમલાના આરોપીઓ ઈમરાનના ઘરમાં છુપાયેલા છે. જે બાદ ઈમરાનના ઘરની ઘેરાબંધી કરવામાં આવી હતી. પોલીસે આતંકીઓને 24 કલાકમાં ઘરની બહાર નીકળવાનું અલ્ટીમેટમ આપ્યું છે. એવું કહેવામાં આવી રહ્યું છે કે જો આવું નહીં થાય તો પોલીસ-ફોર્સની ટીમ ઈમરાનના ઘરમાં ઘૂસીને આતંકીઓને ઠાર કરશે. આ વખતે ઈમરાન સામે પણ કડક કાર્યવાહી થઈ શકે છે.
આતંકવાદીઓને આશ્રય આપ્યો હાવાનો દાવો
આમીર મીર (કાર્યકારી), પાકિસ્તાનના પંજાબ પ્રાંતની વચગાળાની સરકારના માહિતી મંત્રીએ લાહોરમાં પાકિસ્તાન તહરીક-એ-ઈન્સાફ (પીટીઆઈ) પર નિશાન સાધતા કહ્યું, “ઈમરાન ખાનના લાહોરમાં 30-40 આતંકવાદીઓએ જમાન પાર્કના આવાસમાં આશ્રય લીધો છે. તેમને પોલીસને સોંપવા જોઈએ. પીટીઆઈએ સમજવું જોઈએ કે કાયદો પોતાનો માર્ગ અપનાવશે.” અમીરે કહ્યું, “જમાન પાર્કમાં છુપાયેલા આતંકવાદીઓને પોલીસને સોંપવા માટે તમારી પાસે 24 કલાક છે.”
આમીર મીરે લગાવ્યા આરોપ
અમીરે એમ પણ કહ્યું કે સરકાર “આતંકવાદીઓ” ની હાજરી વિશે અગાઉથી સારી રીતે વાકેફ હતી, કારણ કે ઘણા વિશ્વસનીય ગુપ્તચર અહેવાલો હતા. તેમણે કહ્યું કે 9 મેના રોજ દેશના ઘણા ભાગોમાં હિંસા અને આગચંપી કરનારાઓને સખત સજા આપવામાં આવશે. આ માટે તે ‘આતંકવાદીઓ’ને લશ્કરી અદાલતોમાં રજૂ કરવામાં આવશે.
9 મેના રોજ થયા હતા રમખાણો
ઉલ્લેખનીય છે કે 9 મે 2023ના રોજ ઈમરાન ખાનની ધરપકડ બાદ તેમના સમર્થકોએ લાહોરમાં પીએમના નિવાસસ્થાન પર હુમલો કર્યો હતો. આ સિવાય સેના કમાન્ડરોના નિવાસસ્થાન અને ઓફિસ પર પણ હુમલો કરવામાં આવ્યો હતો. રાવલપિંડીમાં આર્મી હેડક્વાર્ટર પર પેટ્રોલ બોમ્બ ફેંકવામાં આવ્યો હતો. દેશભરમાં હિંસક પ્રદર્શનમાં 15 લોકોએ જીવ ગુમાવ્યા હતા. જે બાદ 2 હજારથી વધુ લોકોની ધરપકડ કરવામાં આવી હતી. જેમાંથી મોટા ભાગના ઈમરાનની પાર્ટી પીટીઆઈના કાર્યકરો હતા.
આ પણ વાંચો : લ્યો બોલો હવે વરિયાળીમાં પણ ભેળસેળ ! 49,130 કિલો કેમિકલ યુક્ત વરિયાળીનો જથ્થો ઝડપાયો
