લોરેન્સ બિશ્નોઈના નામે પપ્પુ યાદવને ધમકી આપનાર વ્યક્તિ ઝડપાયો

પૂર્ણિયા, 2 નવેમ્બર, 2024: લોરેન્સ બિશ્નોઈના નામે પૂર્ણિયાના સાંસદ પપ્પુ યાદવને ધમકી આપનાર વ્યક્તિની પોલીસે દિલ્હીથી ધરપકડ કરી છે. આ કેસમાં મહેશ પાંડે નામના વ્યક્તિની ધરપકડ કરવામાં આવી હોવાનું પોલીસ વડા કાર્તિકેય શર્માએ જણાવ્યું છે. પોલીસનો દાવો છે કે, દિલ્હીમાં ઝડપાયેલા આરોપીએ પોતાનો ગુનો કબૂલી લીધો છે અને તે દિલ્હીનો રહેવાસી છે. આરોપી એઈમ્સ અને સંરક્ષણ મંત્રાલયની કેન્ટીનમાં પણ કામ કરી ચૂક્યો છે.

બિહારમાં પૂર્ણિયાના એસપીએ કહ્યું કે મહેશ પાંડેનો કોઈ ગેંગ સાથે કોઈ સંબંધ નથી. તે કેટલાક મોટા નેતાઓ સાથે કામ કરી ચૂક્યો છે. મહેશે UAEમાં રહેતી તેની ભાભીના સિમથી સાંસદ પપ્પુ યાદવને ધમકી આપવાનું કાવતરું ઘડ્યું હતું. એસપીએ કહ્યું કે આ કેસમાં ટૂંક સમયમાં વધુ ખુલાસા થશે. તેમણે કહ્યું કે મહેશ પાંડેની દિલ્હીથી ધરપકડ કરવામાં આવી છે.

પોલીસે કહ્યું કે પપ્પુ યાદવને જાનથી મારી નાખવાની ધમકી આપવા પાછળના હેતુની તપાસ કરવામાં આવી રહી છે. પોલીસે મોબાઈલ ફોન અને સીમકાર્ડ પણ જપ્ત કર્યા છે જેનો ઉપયોગ સાંસદને મારી નાખવાની ધમકી આપવા માટે કરવામાં આવ્યો હતો.

28 ઓક્ટોબરના રોજ સાંસદ પપ્પુ યાદવે દાવો કર્યો હતો કે તેમને ગેંગસ્ટર લોરેન્સ બિશ્નોઈના નામે ફોન પર જાનથી મારી નાખવાની ધમકી મળી છે. મુંબઈમાં NCP નેતા બાબા સિદ્દીકીની હત્યા બાદ, પપ્પુ યાદવે X પર કહ્યું હતું કે જો કાયદો પરવાનગી આપે છે, તો તે 24 કલાકની અંદર બિશ્નોઈના સમગ્ર નેટવર્કને ખતમ કરી દેશે. આ પછી તેને ફોન પર ધમકીઓ મળવા લાગી હતી. આ અંગે યાદવે કેસ પણ દાખલ કર્યો હતો.

પપ્પુ યાદવે કેન્દ્રીય ગૃહમંત્રી અમિત શાહને પત્ર લખીને સુરક્ષા વધારવાની માંગ કરી હતી. એવો દાવો કરવામાં આવ્યો હતો કે તેને લોરેન્સ બિશ્નોઈ ગેંગ તરફથી ધમકીભર્યો ફોન આવ્યો હતો. તેમની ‘વાય’ શ્રેણીની સુરક્ષાને ‘ઝેડ’ શ્રેણીમાં અપગ્રેડ કરવાની માંગ કરવા ઉપરાંત, સાંસદે બિહારમાં તેમના તમામ કાર્યોમાં પોલીસ એસ્કોર્ટની પણ માંગ કરી હતી.

આ પણ વાંચોઃ અમિત શાહ અંગે કેનેડિયન મંત્રીના નિવેદનથી ફરી તંગદિલી, કેનેડિયન રાજદ્વારીને સમન્સ