નેપાળમાં સંસદીય ચૂંટણી પછી સત્તાધારી ગઠબંધન માટે અત્યાર સુધીનું વલણ નિરાશાજનક

નેપાળમાં સંસદીય ચૂંટણી પછી ઉભરી રહેલું ચિત્ર કંઈક અંશે સ્પષ્ટ થઈ રહ્યું છે. નેપાળી કોંગ્રેસના નેતૃત્વમાં સત્તાધારી ગઠબંધન માટે અત્યાર સુધીનું વલણ નિરાશાજનક માનવામાં આવે છે. એવા સંકેતો મળી રહ્યા છે કે પાંચ પક્ષોની ભાગીદારી છતાં ગઠબંધન નિર્ણાયક જનાદેશ મેળવી શકશે નહીં. બીજી તરફ પૂર્વ વડાપ્રધાન કેપી શર્મા ઓલીની કોમ્યુનિસ્ટ પાર્ટી ઓફ નેપાળ (યુએમએલ)નું પ્રદર્શન અપેક્ષા કરતા વધુ સારું રહ્યું છે.

8 ડીસેમ્બર સુધીમાં જાહેર થઈ શકે છે પરિણામ

જો કે, રાજકીય નિરીક્ષકોનું માનવું છે કે જો શાસક ગઠબંધન એકજૂટ રહેશે તો તે કદાચ સરકાર બનાવવાની સ્થિતિમાં આવી જશે. સાતેય પ્રાંતોમાં તેની સરકાર પણ બની શકે છે. પરંતુ શક્ય છે કે આ માટે ગઠબંધનને સંઘીય અને પ્રાંતીય સ્તરે કેટલાક નવા પક્ષોનું સમર્થન મેળવવું પડશે. ચૂંટણીના તમામ પરિણામો 8મી ડિસેમ્બર સુધીમાં જાહેર થશે.

કોને કેટલી બેઠકો મળી શકે છે ?

શાસક ગઠબંધનમાં નેપાળની કોમ્યુનિસ્ટ પાર્ટી માઓઇસ્ટ સેન્ટર, નેપાળની કોમ્યુનિસ્ટ પાર્ટી યુનિફાઇડ સોશ્યલિસ્ટ, રાષ્ટ્રીય જન મોરચા અને લોકતાંત્રિક સમાજવાદી પાર્ટી ઉપરાંત નેપાળી કોંગ્રેસનો સમાવેશ થાય છે. અત્યાર સુધી જે પરિણામો જાહેર થયા છે અથવા જ્યાં વલણો બહાર આવ્યા છે તે મુજબ સીધી ચૂંટણી સાથેની 165 બેઠકોમાંથી સત્તારૂઢ ગઠબંધન સંસદના નીચલા ગૃહ પ્રતિનિધિ સભામાં 84 બેઠકો મેળવી શકે છે. UMLને 42 બેઠકો મળવાની ધારણા છે. બાકીની બેઠકો અન્ય પક્ષોના ખાતામાં જઈ શકે છે. પ્રમાણસર પ્રતિનિધિત્વ હેઠળ યોજાયેલા મતદાનમાં UML આગળ છે.