- મહારાષ્ટ્રના પુણેમાં ચાલતો હતો શો
- રાત્રે 10 વાગ્યા બાદ શો બંધ ન થતા સ્ટેજ ઉપર પહોંચી હતી પોલીસ
- સમય મર્યાદા કરતા આગળ શો ચાલતા પોલીસે રોકાવ્યો હતો
એઆર રહેમાન દેશના પ્રખ્યાત સંગીતકારોમાંના એક છે. તેમણે હિન્દી અને તમિલ ભાષા માટે ઘણા ગીતો ગાયા છે. સિંગરનો અવાજ માત્ર દેશમાં જ નહીં વિદેશમાં પણ પસંદ કરવામાં આવે છે. ભૂતકાળમાં, જ્યારે સિંગરે તેની પત્નીને સ્ટેજ પર તમિલમાં બોલવાનું કહ્યું હતું, ત્યારથી તે લાઇમલાઇટમાં છે. હવે તાજેતરમાં સમાચાર આવી રહ્યા છે કે પુણે પોલીસે એઆર રહેમાનનો મ્યુઝિક કોન્સર્ટ બંધ કરી દીધો છે. ત્યારે ચાલો જાણીએ શું છે આ મામલો.
પોલીસે શો બંધ કરી દીધો
મળતી માહિતી મુજબ, ગઈકાલે રાત્રે પુણેના રાજા બહાદુર મિલ વિસ્તારમાં એઆર રહેમાનનો કોન્સર્ટ ચાલી રહ્યો હતો. આ દરમિયાન હજારો લોકો ત્યાં હાજર હતા જેઓ તે કોન્સર્ટ માણી રહ્યા હતા. જ્યારે આ કોન્સર્ટ ચાલી રહ્યો હતો ત્યારે પોલીસે આવીને કોન્સર્ટ બંધ કરી દીધો હતો. તેની તસવીરો પણ વાયરલ થઈ રહી છે કે જ્યારે એઆર રહેમાન ગીત ગાતા હોય છે ત્યારે પોલીસ આવીને તેનો શો બંધ કરી દે છે.
અધિકારીઓએ રહેમાનની પૂછપરછ કરી
પૂણેના રાજા બહાદુર મિલ વિસ્તારમાં રાત્રે 10 વાગ્યા પછી કોન્સર્ટની મંજૂરી આપવામાં આવી ન હતી. અહેવાલો અનુસાર શોનો સમય રાત્રે 8 વાગ્યાથી રાત્રે 10 વાગ્યા સુધીનો હતો. જ્યારે શો સમય મર્યાદાથી આગળ ચાલવા લાગ્યો ત્યારે પોલીસ ત્યાં પહોંચી અને દરમિયાનગીરી કરવી પડી. આ દરમિયાન રહેમાનને વરિષ્ઠ અધિકારીઓ દ્વારા પૂછવામાં આવ્યું કે તેણે રાત્રે 10 વાગ્યા પછી કોન્સર્ટ કેમ ચાલુ રાખ્યો.
રહેમાને કોન્સર્ટની તસવીરો શેર કરી હતી
જોકે પોલીસ દ્વારા શો બંધ કરવા અંગે એઆર રહેમાને સત્તાવાર રીતે કંઈ કહ્યું નથી, પરંતુ તેણે ઈન્સ્ટાગ્રામ પર પુણેમાં તેના શોની કેટલીક તસવીરો ચોક્કસ શેર કરી છે. આ સાથે તેણે પુણેનો તેને પ્રેમ આપવા બદલ આભાર માન્યો છે.
