આવી રહ્યું છે સૌથી વિકરાળ ચક્રવાત ‘રેમલ’, માછીમારોને દરિયાથી દૂર રહેવાની સલાહ
- બાંગ્લાદેશ અને પશ્ચિમ બંગાળના દરિયાકાંઠે ટકરાશે રેમલ ચક્રવાત
- 102 કિલોમીટર પ્રતિ કલાકની ઝડપે ફૂંકાઈ શકે છે પવન
- દરિયાકાંઠાના જિલ્લાઓમાં જારી કરવામાં આવી ભારે વરસાદની ચેતવણી
નવી દિલ્હી, 24 મે: બંગાળની ખાડીમાં એક નવું દબાણ ક્ષેત્ર બની રહ્યું છે જે ટૂંક સમયમાં ચક્રવાતનું સ્વરૂપ લઈ લેશે.હવામાન વિભાગે માહિતી આપી છે કે બંગાળની ખાડી પર ઓછા દબાણવાળો એરિયા ઝડપથી ચક્રવાતી તોફાનનું સ્વરૂપ લઈ રહ્યું છે. આ ચક્રવાતને રેમલ નામ આપવામાં આવ્યું છે. હવામાન વિભાગના જણાવ્યા અનુસાર આ ચક્રવાત રવિવાર સાંજ સુધીમાં બાંગ્લાદેશ અને તેને અડીને આવેલા પશ્ચિમ બંગાળના દરિયાકાંઠે ટકરાશે. જેના કારણે પશ્ચિમ બંગાળના ઘણા જિલ્લાઓ અને આસપાસના રાજ્યોના ઘણા વિસ્તારોમાં ભારે વરસાદની સંભાવના છે. હવામાન વિભાગે વિસ્તારના માછીમારો માટે એલર્ટ પણ જાહેર કર્યું છે અને તેમને દરિયામાં ન જવાની સલાહ આપી છે. આવો જાણીએ આ ચક્રવાત વિશે મહત્ત્વની માહિતી.
રવિવારે દરિયાકાંઠે ટકરાશે રેમલ
ભારતીય હવામાન વિભાગે કહ્યું છે કે ચોમાસા પહેલા બંગાળની ખાડીમાં આ પ્રથમ ચક્રવાત છે. પ્રાપ્ત માહિતી મુજબ, રેમલ શનિવાર સવાર સુધીમાં ચક્રવાતી તોફાનમાં ફેરવાઈ જશે અને તે વધુ તીવ્ર બનશે. આ પછી, રવિવાર સાંજ સુધીમાં રેમલ ગંભીર ચક્રવાત તરીકે બાંગ્લાદેશ અને પડોશી પશ્ચિમ બંગાળના દરિયાકાંઠે અથડાશે.
102 કિમીની ઝડપે ફૂંકાશે પવન
ભારતીય હવામાન વિભાગે કહ્યું છે કે રેમલ ચક્રવાત દરમિયાન લગભગ 102 કિલોમીટર પ્રતિ કલાકની ઝડપે પવન ફૂંકાઈ શકે છે. જેના કારણે પશ્ચિમ બંગાળ, ઉત્તર ઓડિશા, મિઝોરમ, ત્રિપુરા અને દક્ષિણ મણિપુરના દરિયાકાંઠાના જિલ્લાઓમાં 26 અને 27 મેના રોજ ભારે વરસાદની ચેતવણી જારી કરવામાં આવી છે. હવામાન વિભાગે દરિયામાં માછીમારી કરવા ગયેલા માછીમારોને કિનારે પાછા ફરવા કહ્યું છે અને 27 મે સુધી બંગાળની ખાડીમાં ન જવાની એડવાઈઝરી પણ જારી કરી છે.
રેમલનું નામ કેવી રીતે પડ્યું?
ચક્રવાત રેમલનું નામ હિંદ મહાસાગર ક્ષેત્રમાં ચક્રવાતની નામકરણ પદ્ધતિ અનુસાર રાખવામાં આવ્યું છે. હવામાન વિભાગના જણાવ્યા અનુસાર, બંગાળની ખાડી અને અરબ સાગર આ સમયે ખૂબ જ ગરમ છે, તેથી ઉષ્ણકટિબંધીય ચક્રવાત સરળતાથી બની શકે છે. દરિયાની સપાટીના ગરમ તાપમાનને કારણે ચક્રવાતી તોફાનો ઝડપથી તેમની ઝડપ વધારી રહ્યા છે અને લાંબા સમય સુધી તેમની તાકાત જાળવી રહ્યાં છે.
આ પણ વાંચો: દૂરદર્શનને પણ લાગ્યો AIનો રંગ: એઆઈ એન્કર દ્વારા હવે કાર્યક્રમની રજૂઆત!
