જમ્મુ-કાશ્મીરના લેફ્ટનન્ટ ગવર્નરને દિલ્હીના એલજી જેવી સત્તા આપવામાં આવી

• કેન્દ્રીય ગૃહ મંત્રાલય (MHA) એ જમ્મુ અને કાશ્મીરના લેફ્ટનન્ટ ગવર્નરના વ્યવસાયના નિયમોમાં કર્યો સુધારો
• સુધારા હેઠળ એલજીને પોલીસ, જાહેર વ્યવસ્થા, અખિલ ભારતીય સેવા (AIS) સંબંધિત બાબતોમાં આપવામાં આવી વધુ સત્તા

જમ્મુ-કાશ્મીર, 13 જુલાઈ: કેન્દ્ર સરકારે જમ્મુ-કાશ્મીરને દિલ્હીની જેમ બંધારણીય અધિકારો આપવાની તૈયારી કરી લીધી છે. હવે જમ્મુ-કાશ્મીરના એલજીને પણ દિલ્હીના એલજીની જેમ વહીવટી સત્તા આપવામાં આવશે. અહીં પણ સરકાર એલજીની પરવાનગી વિના ટ્રાન્સફર પોસ્ટિંગ કરી શકશે નહીં. ગૃહ મંત્રાલયે જમ્મુ અને કાશ્મીર પુનર્ગઠન અધિનિયમ 2019 ની કલમ 55 હેઠળ સુધારેલા નિયમોને સૂચિત કર્યા છે. જેમાં LGને વધુ પાવર આપવા માટે નવા વિભાગોનો સમાવેશ કરવામાં આવ્યો છે.

જો કે જમ્મુ અને કાશ્મીરમાં પુનઃગઠન થયું ત્યારથી ચૂંટણીઓ યોજાઈ નથી, પરંતુ જ્યારે પણ ચૂંટણી થાય છે અને સરકાર રચાય છે, ત્યારે લેફ્ટનન્ટ ગવર્નર પાસે ચૂંટાયેલી સરકાર કરતાં વધુ સત્તા હશે. આ સત્તાઓ દિલ્હીના એલજી પાસે હોય તેવી જ છે.

કયા નિયમો બદલાયા?

જમ્મુ અને કાશ્મીર પુનર્ગઠન અધિનિયમ, 2019 ની કલમ 55 હેઠળ સુધારેલા નિયમોમાં જે મુદ્દો ઉમેરવામાં આવ્યો છે તે નીચે મુજબ છે:

• 42A: અધિનિયમ હેઠળ ‘પોલીસ’, ‘પબ્લિક ઓર્ડર’, ‘ઓલ ઈન્ડિયા સર્વિસ’ અને ‘એન્ટિ-કરપ્શન બ્યુરો’ (ACB) ના સંબંધમાં નાણા વિભાગની પૂર્વ સંમતિની આવશ્યકતા ધરાવતી કોઈપણ દરખાસ્ત મંજૂર અથવા નામંજૂર કરવામાં આવશે નહીં સિવાય કે જ્યાં સુધી તેને મુખ્ય સચિવ દ્વારા લેફ્ટનન્ટ ગવર્નર સમક્ષ મૂકવામાં ન આવે.
• 42B: કાર્યવાહીની મંજૂરી આપવા અથવા નકારવા અથવા અપીલ દાખલ કરવા અંગેની કોઈપણ દરખાસ્ત કાયદા વિભાગ દ્વારા મુખ્ય સચિવ દ્વારા લેફ્ટનન્ટ ગવર્નર સમક્ષ મૂકવામાં આવશે.

ઓમર અબ્દુલ્લાએ કરી ટીકા

કેન્દ્રના આ નિર્ણય પર જમ્મુ-કાશ્મીરના નેતાઓએ આકરી પ્રતિક્રિયા આપી છે. નેશનલ કોન્ફરન્સના નેતા ઓમર અબ્દુલ્લાએ કહ્યું, ‘જમ્મુ અને કાશ્મીરમાં ચૂંટણી નજીક હોવાનો આ બીજો સંકેત છે. એટલા માટે જમ્મુ અને કાશ્મીર માટે સંપૂર્ણ, અવિભાજિત રાજ્યનો દરજ્જો પુનઃસ્થાપિત કરવા માટે સમયરેખા નિર્ધારિત કરવાની નિશ્ચિત પ્રતિબદ્ધતા આ ચૂંટણીઓ માટેની પૂર્વશરત છે. જમ્મુ અને કાશ્મીરના લોકો શક્તિવિહીન, રબર સ્ટેમ્પ સીએમ કરતાં વધુ સારી રીતે લાયક છે, જેમને તેના પટાવાળાની નિમણૂક કરવા માટે એલજી પાસે ભીખ માંગવી પડશે.’

5 ઓગસ્ટ, 2019ના રોજ બંધારણની કલમ 370 હેઠળ જમ્મુ-કાશ્મીરને આપવામાં આવેલ વિશેષ દરજ્જો રદ કરવામાં આવ્યો હતો. આ ઉપરાંત અગાઉના રાજ્યને બે કેન્દ્રશાસિત પ્રદેશોમાં વહેંચવામાં આવ્યું હતું જેમાં જમ્મુ અને કાશ્મીર અને લદ્દાખનો સમાવેશ થાય છે. તેમાંથી લદ્દાખમાં એકપણ વિધાનસભા નથી.

આ પણ વાંચો: પાલીતાણા વિશ્વનું પ્રથમ માંસાહાર મુક્ત શહેર જાહેર કરવામાં આવ્યું