ભારતીય ટીમે બનાવ્યો રેકોર્ડ, ટેસ્ટ ક્રિકેટના 92 વર્ષના ઈતિહાસમાં પહેલીવાર આવું બન્યું
- ભારતની 280 રનની શાનદાર જીતને પરિણામે ટીમને ટેસ્ટ ક્રિકેટના ઇતિહાસમાં પ્રથમ વખત હાર કરતાં વધુ જીત મળી છે
ચેન્નઈ, 22 સપ્ટેમ્બર: ભારતીય ક્રિકેટ ટીમે ચેન્નઈમાં બે મેચની સિરીઝની પ્રથમ ટેસ્ટમાં બાંગ્લાદેશને હરાવીને તેની 92 વર્ષની લાંબી રાહનો અંત લાવ્યો હતો. ચેપોકમાં ભારતની 280 રનની શાનદાર જીતને પરિણામે ટીમને ટેસ્ટ ક્રિકેટના ઇતિહાસમાં પ્રથમ વખત હાર કરતાં વધુ જીત મળી છે. ભારતે તેની પ્રથમ ટેસ્ટ 1932માં સીકે નાયડુના નેતૃત્વમાં રમી હતી, પરંતુ ત્યારે 158 રનથી હાર્યું હતું. તે મેચ પછી, ભારત ક્યારેય હાર કરતાં વધુ જીત હાંસલ કરવામાં સફળ રહ્યું ન હતું.
બાંગ્લાદેશ સામેની જીતએ ભારતની ટેસ્ટ ઈતિહાસમાં 179મી જીત હતી. ભારતીય ટીમે અત્યાર સુધીમાં 581 ટેસ્ટ મેચ રમી છે અને 178માં હારનો સામનો કરવો પડ્યો છે. 222 ટેસ્ટ ડ્રો રહી છે અને એક મેચ ટાઈ રહી છે. ટીમ ઈન્ડિયા એકમાત્ર એવી ટીમ નથી જેણે ટેસ્ટ ક્રિકેટમાં હાર કરતાં વધુ જીત નોંધાવી છે. આ યાદીમાં ઓસ્ટ્રેલિયા, ઈંગ્લેન્ડ, દક્ષિણ આફ્રિકા અને પાકિસ્તાન પણ સામેલ છે. જો કે ન્યુઝીલેન્ડ, શ્રીલંકા, ઝિમ્બાબ્વે, બાંગ્લાદેશ અને આયર્લેન્ડ હજુ સુધી આ સિદ્ધિ મેળવી શક્યા નથી.
ટેસ્ટ ક્રિકેટમાં હાર કરતાં વધુ જીત મેળવનારી ટીમો:
- ઓસ્ટ્રેલિયા: 414 જીત; 232 હાર
- ઈંગ્લેન્ડ: 397 જીત; 325 હાર
- દક્ષિણ આફ્રિકા: 179 જીત; 161 હાર
- ભારત: 179 જીત; 178 હાર
- પાકિસ્તાન: 148 જીત; 144 હાર
મેચમાં શું થયું?
ભારતે ચેન્નઈમાં રમાયેલી પ્રથમ ટેસ્ટમાં બાંગ્લાદેશને 280 રને હરાવીને બે મેચની સિરીઝમાં 1-0ની લીડ મેળવી લીધી છે. 515 રનના લક્ષ્યાંકનો પીછો કરતા બાંગ્લાદેશનો બીજો દાવ 234 રનમાં સમેટાઈ ગયો હતો. રવિચંદ્રન અશ્વિને તબાહી મચાવી હતી અને છ વિકેટ લીધી હતી. ટેસ્ટમાં આ તેની 37મી પાંચ વિકેટ હતી અને તેણે આ મામલે મહાન શેન વોર્નની બરાબરી કરી હતી. બાંગ્લાદેશ તરફથી નઝમુલ હુસૈન શાંતોએ સૌથી વધુ 82 રન બનાવ્યા હતા. ટોસ હાર્યા બાદ પ્રથમ બેટિંગ કરતા ભારતે પ્રથમ દાવમાં 376 રન બનાવ્યા હતા. જવાબમાં બાંગ્લાદેશનો પ્રથમ દાવ 149 રન પર સમાપ્ત થયો હતો. ભારતીય ટીમે બીજી ઇનિંગમાં બાંગ્લાદેશને ફોલોઓન થવા દીધા વિના 227 રનની લીડ સાથે બેટિંગ કરી હતી. ભારતે તેનો બીજો દાવ ચાર વિકેટે 287 રન પર ડિકલેર કર્યો હતો અને કુલ 514 રનની લીડ મેળવી હતી.
ટેસ્ટ સિરીઝના ઘરઆંગણે જીતવાના આંકડા શું કહે છે?
ભારતે 2012 બાદ ઘરઆંગણે એકપણ ટેસ્ટ સિરીઝ ગુમાવી નથી. ભારત 4302 દિવસથી ઘરઆંગણે એકપણ ટેસ્ટ સિરીઝ હાર્યું નથી. આ અન્ય કોઈપણ દેશ કરતાં વધુ છે. આ યાદીમાં ભારત બાદ દક્ષિણ આફ્રિકાનો નંબર આવે છે. આફ્રિકન ટીમ વર્ષ 2020થી શરૂ થતા 1702 દિવસ સુધી એકપણ ટેસ્ટ સિરીઝ હાર્યું નથી. ઓસ્ટ્રેલિયા 1348 દિવસ સાથે ત્રીજા સ્થાને છે. 2013થી ઘરઆંગણે ટેસ્ટમાં ભારતનો રેકોર્ડ શાનદાર રહ્યો છે. તેણે 52 ટેસ્ટ રમી છે અને 41માં જીત મેળવી છે. ભારત આ સમયગાળા દરમિયાન માત્ર ચાર ટેસ્ટ હારી છે અને સાત મેચ ડ્રો રહી છે. ભારત 2013થી ઘરઆંગણે સતત 17 ટેસ્ટ સિરીઝમાં અજેય છે.
આ પણ જૂઓ: રવિચંદ્રન અશ્વિને રચ્યો ઇતિહાસ: સચિન-કુંબલેથી લઈને અકરમ બધાના તોડયા રેકોર્ડ
