આવકવેરા વિભાગે લોકસભા ચૂંટણી દરમિયાન 1100 કરોડની રોકડ-ઝવેરાત કરી જપ્ત

• લોકસભા ચૂંટણી દરમિયાન આવકવેરા વિભાગે દેશભરમાંથી 1100 કરોડ રૂપિયાની રોકડ-ઝવેરાત જપ્ત કરી છે, ગત ચૂંટણીની સરખામણીમાં 182 ટકા વધારે છે

દિલ્હી, 31 મે: લોકસભા ચૂંટણી માટે સાતમા અને અંતિમ તબક્કાનું મતદાન આવતીકાલે એટલે કે 1 જૂને થવાનું છે. આ દરમિયાન સમાચાર મળી રહ્યા છે કે 2024ની આ ચૂંટણી દરમિયાન આવકવેરા વિભાગની તો ચાંદી જ ચાંદી થઈ ગઈ છે. આ ચૂંટણી દરમિયાન વિભાગે 1000 કરોડ રૂપિયાથી વધુની રોકડ અને ઝવેરાત જપ્ત કર્યા છે. મળતી માહિતી મુજબ આ આંકડો હજુ વધી શકે છે. સૂત્રોના હવાલાથી આ માહિતી આપવામાં આવી છે.

દેશભરમાંથી 1100 કરોડ રુપિયાની રોકડ અને ઝવેરાત

સૂત્રોનું માનીએ તો વર્તમાન લોકસભા ચૂંટણી દરમિયાન આવકવેરા વિભાગે દેશભરમાં અલગ-અલગ જગ્યાએથી 1100 કરોડ રૂપિયાની રોકડ અને ઘરેણાં જપ્ત કર્યા છે. હજુ ઓપરેશન ચાલુ હોવાથી આ આંકડો હજુ વધી શકે છે. 2019ની લોકસભા ચૂંટણીમાં 390 કરોડ રૂપિયાની રોકડ અને ઝવેરાત જપ્ત કરવામાં આવ્યા હતા. આ લોકસભા ચૂંટણીમાં ગેરકાયદે રોકડ અને ઘરેણાં જપ્ત કરવાના કેસમાં 182 ટકાનો વધારો થયો છે.

મોટાભાગના કેસો ક્યાંથી છે?

સૂત્રોના જણાવ્યા અનુસાર જપ્તીના મોટાભાગના કેસ દિલ્હી અને કર્ણાટકમાંથી આવ્યા છે. દરેક રાજ્યમાં 200 કરોડ રૂપિયાથી વધુની રોકડ અને જ્વેલરી જપ્ત કરવામાં આવી છે. તે જ સમયે, તમિલનાડુ બીજા સ્થાને છે, જ્યાં 150 કરોડ રૂપિયા જપ્ત કરવામાં આવ્યા છે. ત્યારબાદ આંધ્રપ્રદેશ, તેલંગાણા અને ઓડિશામાં 100 કરોડ રૂપિયાથી વધુની રોકડ અને ઝવેરાત સામૂહિક રીતે જપ્ત કરવામાં આવી છે.

મતદાનની શરૂઆતથી જ એજન્સીઓ એલર્ટ

મતદાનની શરૂઆતથી જ કેન્દ્રીય એજન્સીઓને એલર્ટ મોડ પર રાખવામાં આવી હતી. એજન્સીઓ રોકડ, દારૂ, ફ્રીબીઝ, ડ્રગ્સ, જ્વેલરી અને અન્ય વસ્તુઓના ગેરઉપયોગ પર નજર રાખી રહી છે. દરેક રાજ્યએ રોકડની ગેરકાયદે હેરફેરને રોકવા માટે 24×7 કંટ્રોલ રૂમની સ્થાપના કરી છે. તે જ સમયે 16 મેથી તમામ રાજકીય પક્ષો અને તેમના ઉમેદવારો પર MCC (આચાર સંહિતા) લાગુ કરવામાં આવી હતી.

આ પણ વાંચો: અંતિમ તબક્કાનો ચૂંટણી પ્રચાર સમાપ્ત, શનિવારે સાતમા-છેલ્લા તબક્કાનું મતદાન