શાકભાજીના ભાવો ઉપર પણ હવે સરકાર દેખરેખ-નિયંત્રણ રાખશે

• સરકાર આવશ્યક ચીજવસ્તુઓની યાદીમાં ઉમેરી શકે છે વધુ 16 વસ્તુઓ
• શાકભાજીનો પણ સરકાર મોનિટરિંગ લિસ્ટમાં કરી શકે છે સમાવેશ
• શાકભાજીના ભાવઓમાં સૌથી વધુ જોવા મળે છે વધઘટ

દિલ્હી, 15 જૂન: દેશમાં વધતી જતી ખાદ્ય મોંઘવારી સરકાર માટે પડકાર બની રહી છે. ખાદ્ય મોંઘવારી પર અંકુશ મેળવવા માટે સરકાર હવે આવશ્યક ચીજવસ્તુઓની યાદીમાં 16 નવી ચીજવસ્તુઓ સામેલ કરવા વિચારી રહી છે. સરકાર શાકભાજીને પણ મોનિટરિંગ લિસ્ટમાં મૂકવાની યોજના ધરાવે છે. સરકાર આવશ્યક ચીજવસ્તુઓની યાદીમાં સમાવિષ્ટ ચીજવસ્તુઓની કિંમતો પર નજર રાખે છે. નજર રાખવાથી તેમના દરોમાં થતી વધઘટને વધુ સારી રીતે સમજવામાં મદદ મળે છે. આ ઉપરાંત, જ્યારે કિંમતો ખૂબ વધી જાય છે, ત્યારે સરકાર પણ દરોને નિયંત્રિત કરવા માટે હસ્તક્ષેપ કરે છે.

નિષ્ણાતોના મતે શાકભાજીના ભાવમાં સૌથી વધુ વધઘટ થાય છે. તેથી ભાવની દેખરેખ માટે 16 નવી સંભવિત વસ્તુઓમાં શાકભાજીનો સમાવેશ કરી શકાય છે. હાલમાં સરકારની દેખરેખ યાદીમાં 22 વસ્તુઓનો સમાવેશ કરવામાં આવ્યો છે. વધુ 16 વસ્તુઓના સમાવેશ સાથે તેમની સંખ્યા વધીને 38 થશે.

કિંમતોને નિયંત્રિત કરવા માટે આ યાદી અસરકારક

સરકાર આવશ્યક ચીજવસ્તુઓના ભાવમાં ફેરફાર પર નજર રાખે છે. આનાથી સરકાર ગ્રાહક ભાવ સૂચકાંક પર તેમની અસરનું મૂલ્યાંકન કરી શકશે. આ કોમોડિટીઝના જથ્થાબંધ અને છૂટક ભાવો દરરોજ એકત્ર કરવામાં આવે છે અને સમગ્ર દેશમાં 167 કેન્દ્રો પરથી તેનું વિશ્લેષણ કરવામાં આવે છે. જ્યારે આવશ્યક ચીજવસ્તુઓના ભાવ વધે છે, ત્યારે સરકાર હસ્તક્ષેપ કરે છે અને દરોને નિયંત્રિત કરે છે. આ હસ્તક્ષેપોને પ્રાઇસ સ્ટેબિલાઇઝેશન ફંડ અથવા પ્રાઇસ સપોર્ટ સ્કીમ જેવી યોજનાઓ દ્વારા આગળ વધારવામાં આવે છે.

મે મહિનામાં છૂટક ફુગાવો ઘટ્યો

ખાદ્ય ચીજવસ્તુઓના ભાવમાં નજીવા ઘટાડાને કારણે મે મહિનામાં છૂટક ફુગાવો ઘટીને 4.75 ટકા પર આવી ગયો છે. એપ્રિલ 2024માં કન્ઝ્યુમર પ્રાઇસ ઇન્ડેક્સ (CPI) પર આધારિત છૂટક ફુગાવો 4.83 ટકા હતો. જ્યારે એક વર્ષ પહેલા એટલે કે મે, 2023માં તે 4.31 ટકા હતો. નેશનલ સ્ટેટિસ્ટિકલ ઑફિસ (NSO) દ્વારા જારી કરવામાં આવેલા આંકડા અનુસાર ખાદ્ય ચીજવસ્તુઓમાં ફુગાવો મે મહિનામાં 8.69 ટકા રહ્યો હતો જે એપ્રિલમાં 8.70 ટકા હતો.

એકંદરે ફુગાવો ફેબ્રુઆરી 2024 થી સતત ઘટી રહ્યો છે. ફેબ્રુઆરી 2024માં તે 5.1 ટકા હતો અને એપ્રિલ 2024માં તે ઘટીને 4.8 ટકા થઈ ગયો. સરકારે ભારતીય રિઝર્વ બેંકને એ સુનિશ્ચિત કરવાનું કામ સોંપ્યું છે કે CPI ફુગાવો બે ટકાના તફાવત સાથે ચાર ટકા પર રહે.

આ પણ વાંચો: જથ્થાબંધ ફુગાવો વધ્યો, શાકભાજી, કઠોળ સહિત ખાદ્ય ચીજોના ભાવો પર અસર