ગેરકાયદે ઈમિગ્રેશન રોકવા માટે સરકાર લાવી છે નવું બિલ, જાણો શું છે તેમાં? 

• નવા બિલમાં 7 વર્ષની જેલ અને 10 લાખ દંડ સહિતની જોગવાઈઓ

નવી દિલ્હી, 11 માર્ચ : ઘૂસણખોરી અને ગેરકાયદે ઇમિગ્રેશનને રોકવાના ઉદ્દેશ્ય સાથે મંગળવારે લોકસભામાં ઇમિગ્રેશન એન્ડ ફોરેનર્સ બિલ 2025 રજૂ કરવામાં આવ્યું હતું. અમિત શાહ વતી બિલ રજૂ કરતી વખતે ગૃહ રાજ્ય મંત્રી નિત્યાનંદ રાયે કહ્યું કે આ બિલ કોઈને દેશમાં આવતા રોકવા માટે લાવવામાં આવ્યું નથી, પણ આ બિલનો હેતુ એ છે કે જે પણ વિદેશીઓ ભારતમાં આવે છે તેઓ અહીંના નિયમોનું પાલન કરે. કોંગ્રેસના સાંસદ મનીષ તિવારી અને ટીએમસીના સૌગતા રોયે આ બિલનો વિરોધ કર્યો છે.

આ બિલને શા માટે લાવવામાં આવ્યું?

આ બિલનો હેતુ ભારતના ઈમિગ્રેશન નિયમોને આધુનિક અને મજબૂત કરવાનો છે. આ બિલ કેન્દ્ર સરકારને ભારતમાં પ્રવેશતા અને બહાર જનારા વ્યક્તિઓ અને વિદેશીઓ સાથે સંબંધિત બાબતોના સંદર્ભમાં પાસપોર્ટ અથવા અન્ય મુસાફરી દસ્તાવેજોની જરૂરિયાતોને નિયંત્રિત કરવાની સત્તા આપશે. આમાં વિઝા અને નોંધણીની જરૂરિયાત અને સંબંધિત બાબતોનો સમાવેશ થાય છે.

ઈમિગ્રેશન સંબંધિત આ બિલ દેશની સુરક્ષા માટે ખૂબ જ મહત્વપૂર્ણ છે. આ બિલમાં કાનૂની દરજ્જો સાબિત કરવાની જવાબદારી રાજ્યને બદલે વ્યક્તિ પર મૂકવામાં આવી છે. આ ખરડો ભારતની રાષ્ટ્રીય સુરક્ષા, સાર્વભૌમત્વ અથવા અખંડિતતા માટે જોખમી ગણાતા કોઈપણ વિદેશી નાગરિકના પ્રવેશ અથવા નિવાસ પર સ્પષ્ટપણે પ્રતિબંધ મૂકે છે.

તે એ પણ ફરજિયાત બનાવે છે કે તમામ વિદેશીઓ આગમન પર નોંધણી કરાવે અને તેમની હિલચાલ, નામ બદલવા અને સુરક્ષિત અથવા પ્રતિબંધિત વિસ્તારોમાં પ્રવેશ પર સંપૂર્ણ પ્રતિબંધ છે. આ સિવાય શૈક્ષણિક સંસ્થાઓ, હોસ્પિટલો અને નર્સિંગ હોમ્સ જેવી સંસ્થાઓએ વિદેશી નાગરિકોની હાજરી વિશે ઈમિગ્રેશન ઓફિસરને જાણ કરવી પડશે.

નિયમો તોડવા માટે કડક સજા

પ્રસ્તાવિત કાયદામાં ઈમિગ્રેશન નિયમોના ઉલ્લંઘન માટે કડક સજાની જોગવાઈ પણ કરવામાં આવી છે.  માન્ય પાસપોર્ટ અથવા વિઝા વિના ભારતમાં ગેરકાયદેસર પ્રવેશ પર પાંચ વર્ષ સુધીની જેલ અને 5 લાખ રૂપિયા સુધીનો દંડ થઈ શકે છે.  નકલી દસ્તાવેજોનો ઉપયોગ કરનારને બેથી સાત વર્ષની જેલ અને 1 લાખથી 10 લાખ રૂપિયા સુધીનો દંડ થઈ શકે છે.  ઓવરસ્ટેઇંગ, વિઝા શરતોનું ઉલ્લંઘન અથવા પ્રતિબંધિત વિસ્તારોમાં પ્રવેશ કરવા જેવા ગુનાઓ માટે ત્રણ વર્ષ સુધીની જેલ, 3 લાખ રૂપિયા સુધીનો દંડ અથવા બંને સજા થઈ શકે છે.

 યોગ્ય દસ્તાવેજો વિના પરિવહન કરનાર વ્યક્તિઓને પણ જવાબદાર ગણવામાં આવશે. તેમને 5 લાખ રૂપિયા સુધીનો દંડ થઈ શકે છે અને જો તેઓ ચૂકવણી નહીં કરે તો તેમના વાહનો જપ્ત થઈ શકે છે. એવા કિસ્સાઓમાં કે જ્યાં કોઈ વિદેશીને પ્રવેશ નકારવામાં આવે છે, તે ટ્રાન્સપોર્ટરની જવાબદારી રહેશે કે તેઓ તેમના તાત્કાલિક પ્રસ્થાનને સુનિશ્ચિત કરે.  આ બિલ ઇમિગ્રેશન અધિકારીઓને વધુ સત્તાઓ પણ આપે છે, જેમાં વોરંટ વિના લોકોની ધરપકડ કરવાનો અધિકાર પણ સામેલ છે.

આ પણ વાંચો :- પાકિસ્તાનમાં આખી ટ્રેન હાઈજેક કરી લેવામાં આવી, સેના સાથે અથડામણમાં 6 જવાનોના મૃત્યુ