સરકારે ખેડૂતો પાસેથી 5 લાખ ટન ડુંગળીની સીધી ખરીદીનો નિર્દેશ આપ્યો

• આ ખરીદી માટે નાફેડ અને એનસીસીએફે ડુંગળીના ખેડૂતોની અગાઉથી નોંધણી કરાવવાની રહેશે

નવી દિલ્હી, 27 માર્ચ: ચાલુ વર્ષમાં, કેન્દ્ર સરકારે નેશનલ કો-ઓપરેટિવ કન્સ્યુમર્સ ફેડરેશન ઓફ ઈન્ડિયા લિમિટેડ (NCCF) અને નાફેડને બફર જરૂરિયાત માટે 5 લાખ ટન ડુંગળીની સીધી ખરીદી ખેડૂતો પાસેથી શરૂ કરવાનો નિર્દેશ આપ્યો છે કારણ કે 2024ના રવી પાકની લણણી બજારમાં આવવાનું શરૂ થઈ હતું. આ ખરીદી માટે નાફેડ અને એનસીસીએફે ડુંગળીના ખેડૂતોની અગાઉથી નોંધણી કરાવવાની રહેશે, જેથી ખેડૂતોને પ્રત્યક્ષ લાભ હસ્તાંતરણ મારફતે તેમનાં બેંક ખાતાઓમાં ચુકવણી હસ્તાંતરિત થાય તે સુનિશ્ચિત કરી શકાય.

રવી ડુંગળી દેશના વાર્ષિક ઉત્પાદનમાં 72-75 ટકા ફાળો અર્પે છે

દેશની ડુંગળીની ઉપલબ્ધતા માટે રવી ડુંગળી મહત્વપૂર્ણ છે કારણ કે તે દેશમાં વાર્ષિક ઉત્પાદનમાં 72-75 ટકા ફાળો આપે છે. ડુંગળીની વર્ષભર ઉપલબ્ધતા સુનિશ્ચિત કરવા માટે રવી ડુંગળી પણ મહત્ત્વપૂર્ણ છે, કારણ કે ખરીફ ડુંગળીની સરખામણીએ તેની શેલ્ફ લાઇફ સારી છે અને નવેમ્બર-ડિસેમ્બર સુધી તેને સપ્લાય માટે સ્ટોર કરી શકાય છે.

ઉલ્લેખનીય છે કે, ગ્રાહક બાબતોના વિભાગે નાફેડ અને એનસીસીએફ મારફતે વર્ષ 2023-24 દરમિયાન ડુંગળીના બફર સ્ટોકિંગ માટે તેમજ એક સાથે ખરીદી અને નિકાલના માર્ગે હસ્તક્ષેપ માટે આશરે 6.4 એલએમટી ડુંગળીની ખરીદી કરી હતી. નાફેડ અને એનસીસીએફ દ્વારા સતત ખરીદીથી 2023માં આખું વર્ષ ડુંગળીના ખેડુતો માટે મહેનતાણાના ભાવોની બાહેંધરી આપવામાં આવી છે. ત્યારબાદ, ગ્રાહક બાબતોના વિભાગે છૂટક આઉટલેટ્સ અને એનસીસીએફ, નાફેડ, કેન્દ્રીય ભંડાર અને અન્ય રાજ્ય નિયંત્રિત સહકારી મંડળીઓ દ્વારા સંચાલિત મોબાઇલ વાન દ્વારા ડુંગળીના નિકાલ માટે છૂટક વેચાણ હસ્તક્ષેપને અપનાવ્યો હતો, જે ગયા વર્ષ દરમિયાન રૂ. 25 પ્રતિ કિલોના સબસિડીવાળા ભાવે હતો. સમયસર હસ્તક્ષેપ અને કેલિબ્રેટેડ રિલીઝે ખેડૂતની અનુભૂતિને અસર કર્યા વિના છૂટક ભાવોને અસરકારક રીતે સ્થિર કરવાની ખાતરી આપી.

વૈશ્વિક પુરવઠાની સ્થિતિ અને અલ નીનો દ્વારા પ્રેરિત શુષ્ક સ્પેલને કારણે સરકારને નાણાકીય વર્ષ 2023-24 દરમિયાન ડુંગળીની નિકાસને નિયંત્રિત કરવા નીતિગત પગલાં લેવાની જરૂર પડી હતી. આ પગલાંમાં 19મી ઓગસ્ટ 2023ના રોજ લાદવામાં આવેલી ડુંગળીની નિકાસ પર 40% ડ્યુટી તો 29 ઓક્ટોબર, 2023થી લાગુ કરવા માટે 800 ડોલર પ્રતિ મેટ્રિક ટનની લઘુત્તમ નિકાસ કિંમત (MIP) લાગુ કરવા અને ઘરેલું ગ્રાહકોને સસ્તા ભાવે ડુંગળીની ઉપલબ્ધતા સુનિશ્ચિત કરવા માટે નિકાસ પ્રતિબંધ 8 ડિસેમ્બર, 2023થી લાગુ કરવાનો સમાવેશ થાય છે.

સરકારે પાડોશી દેશોને ડુંગળીના નિકાસની આપી છે મંજૂરી 

ડુંગળીના નિકાસ પ્રતિબંધને લંબાવવાનો તાજેતરનો નિર્ણય પ્રવર્તમાન આંતરરાષ્ટ્રીય ભાવો અને વૈશ્વિક ઉપલબ્ધતાની ચિંતાઓ સામે એકંદરે સ્થાનિક ઉપલબ્ધતાને કારણે જરૂરી બન્યો છે. આ દરમિયાન, સરકારે પાડોશી દેશોને નિકાસની મંજૂરી આપી છે, જેઓ તેમની સ્થાનિક વપરાશની જરૂરિયાતો માટે ભારત પર આધાર રાખે છે. સરકારે ભૂતાન (550 એમટી), બહેરીન (3,000 એમટી), મોરેશિયસ (1,200 એમટી), બાંગ્લાદેશ (50,000 એમટી) અને યુએઇ (14,400 મેટ્રિક ટન એટલે કે 3,600 એમટી/ત્રિમાસિક ગાળામાં) ડુંગળીની નિકાસ કરવાની મંજૂરી આપી છે.

આ પણ જુઓ:ગુજરાત: નાગરિકોને નહીં મળે કાળઝાળ ગરમીથી રાહત, જાણો તાપમાનના આંકડા