કતરમાં વર્ષ 2022ના ઓગસ્ટ મહિનામાં ભારતીય નૌકાદળના 8 પૂર્વ કર્મચારીઓની દોહા ખાતેથી જાસૂસી કરવાના કથિત આરોપોસર અટકાયત કરવામાં આવી હતી. દરમિયાન ગત મહિનામાં કતરની કોર્ટે તેઓને મૃત્યુદંડની સજા સંભળાવી હતી. દરમિયાન આ કેસમાં હવે ભારતીય વિદેશ મંત્રાલય (MEA) એ પોતાની પ્રથમ પ્રતિક્રિયા આપી છે. જેમાં આજે ગુરુવારે જણાવ્યું હતું કે સરકારે ગયા મહિને કતારની અદાલત દ્વારા આઠ ભારતીયોને આપવામાં આવેલી મૃત્યુદંડ સામે અપીલ દાખલ કરી છે.
મળતી માહિતી મુજબ, મંત્રાલયના સાપ્તાહિક બ્રીફિંગ દરમિયાન એમઇએના પ્રવક્તા અરિંદમ બાગચીએ જણાવ્યું હતું કે, ભારત આ મુદ્દાના સંદર્ભમાં કતારના અધિકારીઓના સંપર્કમાં છે. બાગચીએ જણાવ્યું હતું કે, કતાર પાસે એક અદાલતનો પ્રથમ દાખલો છે જેણે આઠ ભારતીય કર્મચારીઓ પર ચુકાદો આપ્યો હતો. ચુકાદો ગોપનીય છે અને તેને કાનૂની ટીમ સાથે શેર કરવામાં આવ્યો છે. આ સંદર્ભે એક અપીલ દાખલ કરવામાં આવી છે. અમે કતારના અધિકારીઓના સંપર્કમાં પણ છીએ.
વધુમાં એમઇએના પ્રવક્તા બાગચીએ કહ્યું હતું કે, ભારતીય સત્તાવાળાઓ પણ આઠ માણસોના પરિવારના સભ્યોના સંપર્કમાં છે અને ખુદ વિદેશમંત્રી એસ જયશંકર તેમને મળ્યા હતા. મહત્વનું છે કે, ધરપકડ કરાયેલા ભારતીયોની ઓળખ કેપ્ટન નવતેજ સિંહ ગિલ, કેપ્ટન બિરેન્દ્ર કુમાર વર્મા, કેપ્ટન સૌરભ વસિષ્ઠ, કમાન્ડર અમિત નાગપાલ, કમાન્ડર પૂર્ણેન્દુ તિવારી, કમાન્ડર સુગુનાકર પાકલા, કમાન્ડર સંજીવ ગુપ્તા અને નાવિક રાગેશ તરીકે કરવામાં આવી છે જે તમામ ભારતીય નૌકાદળના ભૂતપૂર્વ અધિકારીઓ અને કર્મચારીઓ છે.
