કતરમાં મૃત્યુદંડની સજા મેળવનારા ભારતીય નૌકાદળના 8 ભૂતપૂર્વ અધિકારીઓના કેસમાં વિદેશ મંત્રાલયે કહ્યું કે આ એક સંવેદનશીલ મામલો છે. આ કેસ કાયદાકીય પ્રક્રિયાને આધીન છે. અપીલ દાખલ કરવામાં આવી છે. અમે આ મામલે કંપનીના એટર્ની સાથે પણ વાત કરી રહ્યા છીએ. એ પણ કહ્યું કે અમે 8 ભારતીયોને અમારી કાનૂની સહાયતા આપવાનું ચાલુ રાખીશું. આ બાબતે અટકળો કરવાનું ટાળો કેમકે આ સમગ્ર પ્રક્રિયા ગોપનીય રહેશે.
કતરની કોર્ટમાં અપીલ દાખલ કરવામાં આવી
વિદેશ મંત્રાલયના પ્રવક્તા અરિંદમ બાગચીએ કહ્યું કે ભારત આ મામલે કતરના અધિકારીઓ સાથે વાતચીત કરી રહ્યું છે અને સરકાર ભારતીય નાગરિકોને તમામ કાયદાકીય અને કોન્સ્યુલર સહાય પૂરી પાડવાનું ચાલુ રાખશે. સાથે જ કહ્યું કે આનાથી સકારાત્મક પરિણામ આવશે તેવી આશા છે. વધુમાં બાગચીએ કહ્યું કે આ કેસ હાલમાં કાયદાકીય પ્રક્રિયા હેઠળ છે. કતરની કોર્ટમાં અપીલ દાખલ કરવામાં આવી છે. અમે આ મામલે કતરના સત્તાવાળાઓ સાથે પણ જોડાયેલા છીએ. તેમણે કહ્યું કે હું ફરીથી દરેકને વિનંતી કરીશ કે મામલાના સંવેદનશીલ સ્વભાવને ધ્યાનમાં રાખીને અટકળોમાં વ્યસ્ત ન રહે. સમગ્ર પ્રક્રિયા દરમિયાન કતર પક્ષ દ્વારા નિર્ણયને ગુપ્ત રાખવામાં આવ્યો છે. તેમણે કેટલાક એવા અહેવાલોને પણ તથ્યપૂર્ણ રીતે ખોટા ગણાવ્યા હતા જેમાં કહેવામાં આવ્યું હતું કે કેસમાં અપીલ પર નિર્ણય આપવામાં આવ્યો છે.
કતર કોર્ટે ભારતીયોને આપી હતી મોતની સજા
મળતી માહિતી મુજબ, ગત 26 ઓક્ટોબરે કતરની કોર્ટે 8 ભારતીયોને મોતની સજા સંભળાવી હતી. ભારતે આ નિર્ણયને ચોંકાવનારો ગણાવ્યો અને કહ્યું કે તે આ મામલે તમામ કાયદાકીય વિકલ્પોની શોધ કરશે. આ 8 ભારતીયો ખાનગી કંપની અલ દહરા સાથે કામ કરતા હતા. જેમની કથિત રીતે ગયા વર્ષે ઓગસ્ટમાં જાસૂસી કેસમાં ધરપકડ કરવામાં આવી હતી. ત્યારે મ્યાનમારના મામલામાં, વિદેશ મંત્રાલયે કહ્યું કે ભારત-મ્યાનમાર સરહદ પર મ્યાનમારના નાગરિકોની ભારતીય સરહદમાં અવરજવર ચિંતાજનક છે. અમે અમારી સરહદ નજીક આવી ઘટનાઓથી અત્યંત ચિંતિત છીએ. મ્યાનમાર સાથે ચાલી રહેલી પરિસ્થિતિ પર અમારી સ્થિતિ સ્પષ્ટ છે. અમે તણાવ ઓછો કરવા અને વાતચીત દ્વારા પરિસ્થિતિનો ઉકેલ લાવવા માંગીએ છીએ. અમે મ્યાનમારમાં શાંતિ, સ્થિરતા અને લોકશાહીની વાપસી માટે હાકલ કરીએ છીએ.
