પાકિસ્તાનના પંજાબ પ્રાંતના મુખ્યમંત્રીએ વિધાનસભા ભંગનો પ્રસ્તાવ રાજ્યપાલને મોકલ્યો

પાકિસ્તાનના રાજકીય વર્તુળોમાં ગરમાવો છે. પૂર્વ પીએમ ઈમરાન ખાન દેશમાં વહેલી તકે સામાન્ય ચૂંટણી કરાવવા પર અડગ છે. તેમણે પહેલેથી જ જાહેરાત કરી હતી કે તેમની પાર્ટી પંજાબ અને ખૈબર પખ્તુનખ્વા બંને બહુમતી રાજ્યોમાં પ્રાંતીય એસેમ્બલીઓનું વિસર્જન કરશે. આ ઘટનાક્રમમાં ગુરુવારે પાકિસ્તાનના પંજાબ પ્રાંતના મુખ્યમંત્રી ચૌધરી પરવેઝ ઈલાહીએ પ્રાંતીય વિધાનસભા ભંગ કરવાના પત્ર પર હસ્તાક્ષર કર્યા હતા. તેમનો પત્ર રાજ્યપાલને મંજૂરી માટે મોકલવામાં આવ્યો છે.

પત્ર મોકલ્યા પહેલા જ તેણે વિશ્વાસ મત મેળવ્યો હતો

ઉલ્લેખનીય છે કે, પંજાબ પ્રાંતમાં હકાલપટ્ટી કરાયેલા વડા પ્રધાન ઇમરાન ખાનની પાકિસ્તાન તહરીક-એ-ઇન્સાફ (PTI) પાર્ટી અને PML-Qની સંયુક્ત સરકાર છે. પંજાબ પ્રાંતના સીએમ પરવેઝ ઈલાહીએ થોડા કલાકો પહેલા જ વિશ્વાસ મત મેળવ્યા બાદ આ પગલું ભર્યું હતું. પંજાબ પ્રાંતના સીએમ પરવેઝ ઈલાહીએ રાજ્યપાલને સંબોધીને લખેલા પત્રમાં કહ્યું છે કે ‘હું, પંજાબના મુખ્યમંત્રી પરવેઝ ઈલાહી, તમને પ્રાંતીય વિધાનસભા ભંગ કરવાની સલાહ આપું છું’.

સૂચના મંત્રીએ શું જણાવ્યું હતું ?

મહત્વનું છે કે, રાજ્યપાલને આ પત્ર લખતા પહેલા સીએમ પરવેઝ ઈલાહીએ પૂર્વ પીએમ ઈમરાન ખાન સાથે તેમના જમાન પાર્ક સ્થિત આવાસ પર મુલાકાત કરી હતી. બંને નેતાઓની બેઠક બાદ પૂર્વ સૂચના મંત્રી ફવાદ ચૌધરીએ વિધાનસભા ભંગ કરવા માટે રાજ્યપાલને લખેલા પત્રની જાણકારી આપી. ફવાદ ચૌધરીએ જણાવ્યું કે મુખ્યમંત્રીએ વિધાનસભા ભંગ કરવાની સલાહ પંજાબના રાજ્યપાલને મોકલી છે.

48 કલાક પછી વિધાનસભા આપોઆપ ભંગ થઈ જશે

ફવાદ ચૌધરીએ કહ્યું કે પાકિસ્તાનના નિયમો અનુસાર, જો રાજ્યપાલ તેમની સલાહ નહીં માને તો 48 કલાક પછી વિધાનસભા આપોઆપ ભંગ થઈ જશે. આ દરમિયાન તેમણે શાસક પક્ષ પર નિશાન સાધતા દેશમાં સામાન્ય ચૂંટણીની માંગ કરી હતી. ચૌધરીએ કહ્યું કે કેન્દ્રમાં પીએમએલ-એનના નેતૃત્વવાળી ગઠબંધન સરકારે મધ્યસત્ર ચૂંટણીની જાહેરાત કરવી જોઈએ કારણ કે ચૂંટણી ટાળવાનો બીજો કોઈ રસ્તો નથી. ગયા મહિને, પીએમએલ-એનના પંજાબના ગવર્નર બલીગુર રહેમાને વિધાનસભાના વિસર્જનને રોકવા માટે સીએમ પરવેઝ ઈલાહી પાસેથી વિશ્વાસનો મત માંગ્યો હતો. જે બાદ તેમણે વિપક્ષના ભારે વિરોધ વચ્ચે પંજાબ વિધાનસભામાં જરૂરી 186 વોટ મેળવ્યા હતા.