નવી દિલ્હી, 27 મે : ડિફેન્સ રિસર્ચ ડેવલપમેન્ટ ઓર્ગેનાઈઝેશન (DRDO)ના અધ્યક્ષ ડૉ. સમીર વી. કામતનો કાર્યકાળ એક વર્ષ લંબાવવામાં આવ્યો છે. ભારત સરકારે સોમવારે કામતની સેવાના વિસ્તરણને મંજૂરી આપી હતી. વિસ્તરણ પછી ડૉ.કામત 31 મે 2025 સુધી DRDOના અધ્યક્ષ રહેશે. ડો.કામત ડીઆરડીઓના અધ્યક્ષ તેમજ સંરક્ષણ સંશોધન અને વિકાસ વિભાગના સચિવ છે.
બંગાળના મુખ્ય સચિવને પણ સેવાનું વિસ્તરણ
DRDOના અધ્યક્ષ ઉપરાંત પશ્ચિમ બંગાળના મુખ્ય સચિવ ભગવતી પ્રસાદ ગોપાલિકાને પણ સેવામાં વધારો આપવામાં આવ્યો છે. ગોપાલિકા હવે વધુ ત્રણ મહિના માટે મુખ્ય સચિવ રહેશે. તેઓ આ શુક્રવારે નિવૃત્ત થવાના હતા. ગોપાલિકા હવે 31 ઓગસ્ટ સુધી રાજ્યના મુખ્ય સચિવ તરીકે ચાલુ રહેશે. ગોપાલિકા 1989 બેચના IAS અધિકારી છે. 31 ડિસેમ્બર, 2023 ના રોજ એચકે દ્વિવેદીની નિવૃત્તિ પછી ગોપાલિકા બંગાળના મુખ્ય સચિવ બન્યા હતા. આ પહેલા તેઓ ગૃહ સચિવ તરીકે કામ કરતા હતા.
જનરલ પાંડેનો કાર્યકાળ પણ લંબાયો
આના એક દિવસ પહેલા જ આર્મી ચીફ જનરલ મનોજ પાંડેનો કાર્યકાળ એક મહિના માટે લંબાવવામાં આવ્યો હતો. કેબિનેટની નિમણૂક સમિતિએ રવિવારે જનરલ પાંડેની સેવાના વિસ્તરણને મંજૂરી આપી હતી. એક્સટેન્શન બાદ જનરલ પાંડે 30 જૂન સુધી આર્મી ચીફ રહેશે. ઉલ્લેખનીય છે કે, પાંડે 31 મેના રોજ નિવૃત્ત થવાના હતા પરંતુ તે પહેલા જ તેમને એક્સટેન્શન આપવામાં આવ્યું હતું.
આર્મી ચીફ બનનાર કોર્પ્સ ઓફ એન્જિનિયર્સના પ્રથમ અધિકારી
મહત્વનું છે કે, લેફ્ટનન્ટ જનરલ મનોજ પાંડેએ 30 એપ્રિલ, 2022ના રોજ આર્મી ચીફ તરીકેનો કાર્યભાર સંભાળ્યો હતો. તેઓ જનરલ એમ.એમ. નરવણેનું સ્થાન લીધું હતું. આર્મી ચીફ બનતા પહેલા પાંડે આર્મીના વાઇસ ચીફ હતા. પાંડે આર્મી ચીફ બનનાર પ્રથમ કોર્પ્સ ઓફ એન્જિનિયર્સ અધિકારી છે. અત્યાર સુધી, પાયદળ, બખ્તરધારી અને તોપખાના અધિકારીઓ મોટાભાગે સેનાના વડા બન્યા છે. પાંડે ઈસ્ટર્ન આર્મીના કમાન્ડર પણ રહી ચૂક્યા છે. આ કમાન્ડ ઉત્તર-પૂર્વીય રાજ્યો સિક્કિમ અને અરુણાચલ પ્રદેશ વિસ્તારોમાં ચીન સાથેની વાસ્તવિક નિયંત્રણ રેખા (LAC) ની સુરક્ષા માટે તૈનાત છે. તેનું મુખ્યાલય કોલકાતામાં છે. લેફ્ટનન્ટ જનરલ પાંડે ઈસ્ટર્ન કમાન્ડના ચીફ બનતા પહેલા આંદામાન અને નિકોબાર કમાન્ડના કમાન્ડર-ઈન-ચીફ હતા.
