દિલ્હી-લખનઉ હાઈવે ઉપરથી મળી અજાણી યુવતીની લાશ, લાલ બેગમાં રાખેલો હતો મૃતદેહ

નવી દિલ્હી, 16 નવેમ્બર, 2024 : દિલ્હી-લખનૌ નેશનલ હાઈવે નજીક લાલ સૂટકેસમાંથી એક યુવતીની લાશ મળી આવતા ચકચાર મચી ગઈ હતી. આ ઘટના ગઈકાલે સવારે બની હતી. આ લાલ રંગની સૂટકેસ ઉત્તર પ્રદેશના હાપુડ જિલ્લામાંથી મળી આવી હતી. પોલીસ હાલ આ સમગ્ર મામલે તપાસ કરી રહી છે. ફોરેન્સિક ટીમે પણ ઘટનાસ્થળે જઈને સેમ્પલ લીધા છે, જેને હાલમાં તપાસ માટે મોકલવામાં આવ્યા છે. હજુ સુધી મૃતદેહની ઓળખ થઈ શકી નથી. પોલીસની ઘણી ટીમો હાલ આ સમગ્ર મામલાની તપાસમાં વ્યસ્ત છે.

મૃતકના શરીર પર ઈજાના ઘણા નિશાન જોવા મળ્યા હતા

પોલીસ સૂત્રોના જણાવ્યા અનુસાર હાઈવેની બાજુમાં પડેલી આ સૂટકેસને ખોલવામાં આવી ત્યારે તેમાંથી મહિલાનો મૃતદેહ મળી આવ્યો હતો. જ્યારે મૃતદેહની યોગ્ય તપાસ કરવામાં આવી તો તેના પર ઈજાના ઘણા નિશાન જોવા મળ્યા. પોલીસના જણાવ્યા અનુસાર મૃતક યુવતીની ઉંમર 25 થી 30 વર્ષની વચ્ચે હોવાનું કહેવાય છે. હાલ પોલીસે મૃતદેહને પોસ્ટમોર્ટમ માટે મોકલી આપ્યો છે. આ ઉપરાંત નજીકના પોલીસ સ્ટેશનોને પણ આ ઘટના અંગે જાણ કરવામાં આવી છે જેથી કરીને મૃતક યુવતીની ઓળખ થઈ શકે.

એક દિવસ પહેલા જ હત્યા કરાઈ હોવાનું અનુમાન

આ ઘટના અંગે એએસપી વિનીત ભટનાગરે જણાવ્યું કે, મૃતદેહ જોયા બાદ એવું લાગે છે કે એક દિવસ પહેલા જ કોઈએ યુવતીની હત્યા કરી હોય. જોકે, પોસ્ટમોર્ટમ રિપોર્ટ આવ્યા બાદ જ હત્યાનો સમય જાણી શકાશે. અમારી ઘણી ટીમો હાલમાં આ સમગ્ર મામલાની તપાસમાં વ્યસ્ત છે.

આ પણ વાંચો : ગુજરાતના ખેડૂતો માટે વધુ એક સારા સમાચાર, પાક સંગ્રહ સ્ટ્રક્ચરની સહાયમાં વધારો