દિલ્હીના કાઉન્સિલરોના ભથ્થામાં 83 ગણો વધારો, મીટિંગ માટે 300 રૂપિયા નહીં પરંતુ 25,000 મળશે
દિલ્હી મ્યુનિસિપલ કોર્પોરેશન (MCD)ના કાઉન્સિલરોના ભથ્થામાં 83 ગણો વધારો થવા જઈ રહ્યો છે. આ અંગેના પ્રસ્તાવને ગૃહમાં લીલી ઝંડી મળી ગઈ છે. આનો અર્થ એ થયો કે હવે દિલ્હીના MCD કાઉન્સિલરોને ગૃહની બેઠકમાં હાજરી આપવા પર 25,000 રૂપિયા ભથ્થા તરીકે મળશે. અત્યાર સુધી કાઉન્સિલરોને ગૃહની બેઠકમાં હાજરી આપવા માટે રૂ. 300 મળતા હતા.
દિલ્હી મ્યુનિસિપલ કોર્પોરેશનની બેઠકમાં કાઉન્સિલરોના ભથ્થામાં વધારો કરવાનો પ્રસ્તાવ પસાર કરવામાં આવ્યો હતો. જો કે, આ સાથે પ્રસ્તાવમાં કહેવામાં આવ્યું છે કે કાઉન્સિલરોને એક મહિનામાં 1 લાખ રૂપિયાથી વધુનું ભથ્થું નહીં મળે. દિલ્હીના મેયર ડો.શૈલી ઓબેરોયે તેને પાસ કર્યા બાદ આગળની કાનૂની પ્રક્રિયા માટે મોકલ્યો છે. મેયરના જણાવ્યા અનુસાર દિલ્હીના તમામ 250 કાઉન્સિલરોને આ વધારાનો લાભ મળશે.
દિલ્હી MCD કાઉન્સિલરોનું ભથ્થું કેમ વધ્યું?
મેયરે દરખાસ્ત પાછળ દલીલ કરી હતી કે કાઉન્સિલરોને ડીએમસી એક્ટ મુજબ વેતન ચૂકવવામાં આવતું નથી, તેથી કાઉન્સિલરો લાંબા સમયથી માંગ કરી રહ્યા હતા કે તેમના હાલના 300 રૂપિયાના ભથ્થામાં વધારો કરવામાં આવે, જે તેમની ઓફિસના ખર્ચને પહોંચી વળવા માટે ખૂબ ઓછું હતું. .
દિલ્હી મ્યુનિસિપલ કોર્પોરેશનમાં કાઉન્સિલરોને પગાર કે પેન્શન આપવામાં આવતું નથી. કાઉન્સિલરોને દરેક મીટીંગમાં હાજરી આપવા માટે 300 રૂપિયા પ્રતિ મીટીંગનું ભથ્થું આપવામાં આવે છે. જો કે હવે તેને વધારીને 25,000 રૂપિયા પ્રતિ મીટીંગ કરવાનો પ્રસ્તાવ પસાર કરવામાં આવ્યો છે. એક મહિનામાં સરેરાશ 6 જેટલી બેઠકો યોજાય છે.
જો પ્રશ્ન કાઉન્સિલરોની આવકનો છે તો તેનો કોઈ નક્કર જવાબ નથી. જો કે, તેમને ઘણાં વિવિધ ભથ્થાં મળે છે. આમાં મીટિંગ માટેના પૈસા અને અન્ય ખર્ચ માટે આપવામાં આવેલા પૈસાનો સમાવેશ થાય છે. દિલ્હીના કાઉન્સિલરોને તેમના વિસ્તારમાં વિકાસ કાર્યો માટે વાર્ષિક રૂ. 50 લાખથી રૂ. 1 કરોડ સુધીનું ભંડોળ મળે છે.
