સહારનપુરથી પકડાયેલા આતંકી મોહમ્મદ નદીમના મામલામાં મોટો ખુલાસો થયો છે. સૂત્રો પાસેથી મળેલી માહિતી મુજબ મોહમ્મદ નદીમ અને સૈફુલ્લાહ બંને સપ્ટેમ્બરમાં પાકિસ્તાન જવાના હતા. તેને જેહાદી ટ્રેનિંગ લેવા માટે વિઝા મળ્યા હતા. સૈફુલ્લાહ ટેલિગ્રામ એપ પર પાકિસ્તાની હેન્ડલર્સ દ્વારા બનાવવામાં આવેલ રાહ-એ-હિદાયત જૂથ સાથે પણ સંકળાયેલો છે. આ જૂથમાં ઘણા પાકિસ્તાની અને અફઘાન જેહાદી લોકો જોડાયેલા હતા. આ ગ્રુપ દ્વારા તે સતત પાકિસ્તાન અને અફઘાનિસ્તાનના આતંકવાદીઓના સંપર્કમાં રહેતો હતો.
સૈફુલ્લાહની કાનપુરમાંથી ધરપકડ
યુપી ATSએ 12 ઓગસ્ટે મોહમ્મદ નદીમની સહારનપુરથી ધરપકડ કરી હતી. તે પાકિસ્તાનમાં જૈશ-એ-મોહમ્મદ અને તહરીક-એ-તાલિબાન સાથે સંકળાયેલો હતો અને ભારતમાં ફિદાયીન હુમલાઓ કરવા માંગતો હતો. તેને નૂપુર શર્માને મારવાનું કામ સોંપવામાં આવ્યું હતું. તે 2018થી વોટ્સએપ, ટેલિગ્રામ, આઈએમઓ, ફેસબુક મેસેન્જર, ક્લબહાઉસ વગેરે સાથે સંકળાયેલો હતો. આ પછી 14 ઓગસ્ટે કાનપુરમાંથી હબીબુલ ઈસ્લામ ઉર્ફે સૈફુલ્લાહની ધરપકડ કરવામાં આવી હતી. નદીમ સાથે તેને સંબંધ હતો. એવું કહેવાય છે કે તે વર્ચ્યુઅલ આઈડી બનાવવામાં નિષ્ણાત છે.
નદીમ અને સૈફુલ્લાહ જૈશ માટે કામ કરતા
જૈશના પાકિસ્તાની હેન્ડલરે 19 વર્ષીય સૈફુલ્લાને જેહાદી ટ્રેનિંગ લેવા અને પછી ભારતમાં જેહાદ કરવા પાકિસ્તાન આવવા કહ્યું હતું. તેની પાસેથી એક મોબાઈલ ફોન, એક સિમ અને એક છરી મળી આવી હતી. ADG (L&O) પ્રશાંત કુમારે કહ્યું હતું કે, જૈશ-એ-મોહમ્મદનો આતંકવાદી હબીબુલ ઈસ્લામ ઉર્ફે સૈફુલ્લાહ બિહારના મોતિહારીનો રહેવાસી છે. તેણે સ્વીકાર્યું કે તે નદીમને ઓળખતો હતો. આ બંને જૈશના હતા. હબીબુલ ઈસ્લામ વર્ચ્યુઅલ આઈડી બનાવવામાં નિષ્ણાત છે.
