તેલંગાણા સરકારે મહિલાઓ, ટ્રાન્સજેન્ડરો માટે મફત બસ મુસાફરી યોજના શરૂ કરી

• તેલંગાણા સરકારે ‘6 ગેરંટી – મહા લક્ષ્મી’ યોજના શરૂ કરી
• તેલંગણા સરકાર મહિલા મુસાફરોનું ભાડું ચૂકવશે
• મહિલાઓ માટે રાજીવ આરોગ્યશ્રી આરોગ્ય યોજના પણ શરૂ થઈ

હૈદરાબાદ, 09 ડિસેમ્બર: તેલંગાણા સરકારે રાજ્યની માલિકીની સ્ટેટ ટ્રાન્સપોર્ટ કોર્પોરેશનની બસોમાં મહિલાઓ અને ટ્રાન્સજેન્ડરો માટે મફત મુસાફરીનું વચન પૂરું કર્યું છે. રાજ્ય સરકારે શુક્રવારે આ અંગે આદેશ જારી કર્યો હતો. આ પહેલ તાજેતરમાં પૂર્ણ થયેલી વિધાનસભા ચૂંટણી દરમિયાન કોંગ્રેસ દ્વારા આપવામાં આવેલી છ ગેરંટીનો એક ભાગ છે.

સરકારી આદેશમાં જણાવ્યું હતું કે, તેલંગાણા સરકારે 6 ગેરંટી – મહા લક્ષ્મી યોજના શરૂ કરી છે, જેના હેઠળ તમામ વય જૂથોની છોકરીઓ અને મહિલાઓ અને તેલંગાણાના નિવાસી ટ્રાન્સજેન્ડર વ્યક્તિઓ તેલંગાણા રાજ્ય માર્ગ પરિવહન નિગમ દ્વારા સંચાલિત બસોમાં મફત મુસાફરી કરી શકે છે. તેમાં કહેવામાં આવ્યું છે કે તેઓ 9 ડિસેમ્બરની બપોરથી ગ્રામીણ સેવા અને એક્સપ્રેસ બસોમાં તેલંગાણા રાજ્યની મર્યાદામાં ગમે ત્યાં મુસાફરી કરી શકે છે.

રાજીવ આરોગ્યશ્રી ની ગેરંટી પણ પૂરી થઈ…

આદેશમાં જણાવાયું છે કે, રાજ્ય સરકાર મહિલા મુસાફરો માટેનું ભાડું તેલંગાણા સ્ટેટ રોડ ટ્રાન્સપોર્ટ કોર્પોરેશન (TSRTC)ને ચૂકવશે. કોંગ્રેસ સરકારે ગુરુવારે તેની પ્રથમ કેબિનેટ બેઠકમાં, કોંગ્રેસના ટોચના નેતા સોનિયા ગાંધીના જન્મદિવસ 9 ડિસેમ્બરે મહિલાઓ માટે મફત મુસાફરી અને રાજીવ આરોગ્યશ્રી સ્વાસ્થ્ય યોજના શરૂ કરવાનો નિર્ણય લીધો હતો. રાજીવ આરોગ્યશ્રી હેઠળ રૂ. 10 લાખનું વીમા કવરેજ આપવામાં આવશે.

મુખ્યમંત્રી રેવંત રેડ્ડીએ પ્રજા દરબારનું આયોજન કર્યું હતું

તેલંગાણાના મુખ્યમંત્રી પદ સંભાળ્યાના એક દિવસ બાદ એ. રેવન્ત રેડ્ડીએ શુક્રવારે તેમના કેમ્પ ઓફિસ-કમ-સત્તાવાર નિવાસસ્થાને ‘પ્રજા દરબાર’ યોજ્યો હતો અને સામાન્ય લોકોની ફરિયાદો સાંભળી હતી અને તેને વહેલી તકે ઉકેલવાનું વચન આપ્યું હતું. જ્યોતિરાવ ફૂલે પ્રજા ભવનમાં પ્રજા દરબાર માટે લોકો મોટી સંખ્યામાં હાજર રહ્યા હતા. એક સત્તાવાર નિવેદનમાં જણાવાયું છે કે, મુખ્યમંત્રીએ વિકલાંગ વ્યક્તિઓ પાસેથી રજૂઆતો મેળવવાને પ્રાથમિકતા આપી અને તેમની સમસ્યાઓ વિશે પૂછપરછ કરી હતી. મુખ્યમંત્રીએ કહ્યું કે, લોકોની ફરિયાદોના નિરાકરણ માટે તાત્કાલિક પગલાં લેવામાં આવશે. નિવેદનમાં કહેવામાં આવ્યું છે કે મુખ્યમંત્રી બાદમાં બેઠકમાં ભાગ લેવા માટે સચિવાલય જવા રવાના થયા હતા.

આ પણ વાંચો, ઉત્તરપ્રદેશ: લગ્નનો માહોલ માતમમાં છવાયો, દિવાલ ધરાશાયી થતાં છ લોકો મૃત્યુ પામ્યા